Angan Tamneira bwa E na Tautaekani Rabwatara
Teuana te bwai ae te kabanea ni kakawaki ae ti kona n reiakinna n te maiu aei bwa ti na kanga ni katereterea rikira n tamnei ae akea tokina ao n tararuai ara iango aika buakaka.
Tariu ao mwaaneu aika tangiraki, n rokon te Maungatabu ni Kabuta n te ririki ae nako, I katauraoa au marooro ibukin te maungatabu ni kanikinaea te ka 100 n ririki ni kanuringaan te kaotioti ibukin te aonaaba n tamnei are e anganaki Beretitenti Joseph F. Smith n Okitobwa 3, 1918.
Tabeua te bong imwiin are I anga au marooro ibukin te rairairi, raou n aki toki ae tangiraki irou, Barbara, e a roko n tokin mwanangana n te maiu aei ao n nako te aonaaba n tamnei.
Ngkai a bitaki boong nakon wiiki, namwakaina, ao ngkai e a ririki man te tai are e mate iai Barbara, I kunea bwa e a kakorakoraaki riki au kakaitau n te kibu aei: “Kam na uaia ni maeka i nanon te tangira, n te aro are kam na tang ibukin buaia akana a mate.”1 Ngai ma Barbara ti kakabwaiaaki ni “uaia ni maeka i nanon te tangira” inanon 67 te ririki. Ma I reiakinna n te kawai ae koaua bwa tera ae nanonaki n “tang ibukin buaia” akana ti tangiriia. O, I tangiria ao I aki kona ni mwaninga taekana!
I taku bwa ngaira n tatabemaniia ti kabwaka n anga ara kakaitau ni bwaai aika a karaoi tabeman ibukira ni karokoa are a mate. I ataia bwa e tatabetabe Barbara n taainako, ma I aki oota raoi n aron anaakin ana tai n taai nako iaon te utu, te Ekaretia, ao te komiuniti. Aikai bon anganano ni katoa bong aika a okioki karaoakiia tengaa te tai rinanon ririki are a kateimatoa ni kanakoraoa ara utu. Ao rinanon bwaai ni kabane, akea temanna n ara utu ae e a tia n ongo bwanaana n takarua ke n taetae n aki akaaka.
A mwaiti ururing are a kaona au iango n te ririki ae nako aei. I uringa ana rinerine ae kaangaanga are e karaoia bwa e na riki bwa tinaia itiman ataei. N riki bwa te tia tararua te mweenga ao ni kaikawakiia natira bon tii ana mwakuri ae e tangiria, ao inanon aanga nako e rangi ni konabwai iai.
N angin te tai, I miimi bwa e kanga n tararuaiia natira ao ngai. Te mwakuri ni katauraoan te amwarake, n aki taekin aron waaki n aron uatian bareka aika mwaiti kurikuri are a karaoi ara utu ni katoa wiiki ao kawakinan taian kau ao kunnikai aika a tararaoi ao n tau iaoia natira. Ti bane ni katan iaana ni bwaai aika a mwaiti ake a kakawaki nakoira. Ao ibukina ngkai a kakawaki iroura, a kakawaki naba irouna. Bon te aine, ni kabwarabwaraana n te taeka, e kamiimi—te buuaine, te tina, te rao, te rao nakoia kaain rarikina, ao natin te Atua te aine.
Ngkai ngkae e a tia ni mwawa nako, I kukurei ngke I a tia n rineia n tekateka irarikina ngkana I okira mweengara man au aobiti tabeua namwakaina inanon maiuna, n taua baina ngke ti mataku n anene tabeua ake mamaten nanona—ni kaokiokia ibukina bwa te aoraki ae te Alzheimer e kabuaa ana ururing ni baike e a tibwa tia n noori n te bwakantaai are mai imwaaina. Ururingan tekatekau irarikina ao n taua baina a bon rangi, n rangi ni kakawaki irou.
Tariu ao mwaaneu, taiaoka tai kabuaa am tai n tarai mataia am utuu ma te tangira. Ataei ao kaaro, ibuobuoki imarenami ao kaota ami tangira ao ami kakaitau. N ai arou, tabeman ibuakomi kam na bae n uti teuana te bong ni kunea bwa kakawakin te tai n reitaki e a bua. Uaia ni maiu ni katoa bong ma nanomi ae kaonaki n te kakaitau, ururing aika raraoi, te mwakuri n ibuobuoki, ao te tangira ae bati.
N te ririki ae e a tibwa nako, I a tia n rangi ni iangoia raoi n aron are mai imwaaina ibukin ana babaire Tamara are i Karawa. N ana tai n reireina natina te mwaane ae Korianton, Aramwa e taekina bwa “te babaire ni kakukurei are e korakora.”2
Te taeka are I aki toki n iangoia ngkai ngkana I iangoa te babaire bon te “ikotaki.” Bon te babaire, ae barongaaki mai iroun Tamara are i Karawa, are botona raoi bon korakoran mimitongin manga botakin te utu—n ikotakiia buumwaane ao buuaine n akea tokina, kaaro ao naati, te roro teuana ma teuana n ana utu te Atua.
Te iango anne e anganai te rau ao te kakoaua bwa N na manga maeka irarikin Barbara. E ngae ngke e a tia ni korakai i mwaain motirawana, e korakora tamneina, e kakannato, ao n itiaki. E a tia ni katauraoia ni bwaai ni kabane bwa ngkana e roko ana tai, e na kona n tei imatan “ana kai ni motikitaeka te Atua ae kakukurei,”3 ma te onimaki ae bwanin ao te kakoaua ae rau. Ma aio Ngai, inanon uabong te bong e nang koro 91 au ririki, ao I teimatoa ni kakataninga, “I a tauraoi? I karaoi bwaai ni kabane ae I riai ni karaoi bwa I aonga ni manga taua riki baina?”
Te kabanea n aki kaangaanga, aan te maiu ae koaua bon aei: Ti na bane ni mate. Tao ngkana ti a mate ao ti a kara ke inanon ataeira, e bebete ke e kaangaanga, ni kaubwai ke ni kainnano, n tangiraki ke ni maroaa, akea ae e na birinako man te mate.
Tabeua te ririki n nako, Beretitenti Gordon B. Hinckleying e taekina te bwai ae kakawaki ibukin aei: “Ai tamaroara kakoauaana, ai kamweengaraoira te rau are e roko man te rabakau are ngkana ti mare n ae eeti ao ni maiuna te raoiroi, e na reitinako ara reitaki, n aki tabe ma te mate ao waakin te tai.”4
I bon mare inanon te eti. Akea te nanououa n anne. Ma anne e bon aki tau, ni kaineti ma ae taku Beretitenti Hinckley. I riai ni maiu inanon te eti.5
N te bong aei, “maiuakinan te eti” e kona n riki bwa te iango ae kararaoma, ai moarara riki ngkana ko kabanea am tai iaon bwaai ni kaongora, te tabo ike bwaana a na kaoti bwaai aika koaua ke iango aika kewe ibukin te Atua ao Ana babaire ibukiia Natina. Ma te kakaitau, membwa n te Ekaretia a karekei reirein te euangkerio ae koaua n ataia bwa a na kanga ni maiu bwa ti aonga n tauraoi raoi ngkana it riai ni mate.
Tabeua te miniti imwaain bungiakiu, tibuu te unimwaane ae te Abotoro, Unimwaane Melvin J. Ballard, e anga ana marooro bwa, ibukiia tabeman aomata, a kabwarabwara aan raoi maiuakinan te eti. Ae atunaki “Korakain te Tamnei,” ana marooro e boboto iaon reitinakon te buaka imarenan rabwata aika mamate ao tamneira ae akea tokina.
E taku, “Te buaka ae te kabanea ni korakora are e karekea te mwaane ke te aine … bon te buaka i bon irouna,” ni kabwarabwara bwa Tatan “ana kairiribai tamneira,” e kaikuakira rinanon “te kaibwabwaru, are e tangiria nanora, ana iango te iriko.”6 “Ngaia moan te buaka bon imarenan aron rikira ao rikira n tamnei ao te aro n aomata n te iriko. Tariu ao mwaaneu, uringnga, ti kona ni karekea buokara n tamnei rinanon ana wirikiriki te Tamnei ae Raoiroi are e kona n “reireiningkami bai ni kabane”7 Te buoka e kona n roko rinanon mwaakan ana kakabwaia te nakoanibonga.
Ngkai, I titiraki, “kam uara n tatabemani ngkami n te buaka aei?
E taku Beretietnti David O. McKay: “Maiun te aomata iaon te aba bon te kataaki ngkana e na kona ni kabanea nanona iaon ana konabwai, ana iango, tamneina, iaon bwaai are e anga te rau ao ni kakaukureia rikin rabwatana, ke tao ngkana e kakoroi bukin [tibwangana] ni maiuna ao n tau n te maiu n tamnei”8
Te buaka aei imarenan rikira n iriko ao n tamnei bon tiaki te bwai ae boou. N ana kabanea ni kabwarabwara nakoia ana aomata, e taku te Uea ae Beniamina bwa “bon ana kairiribai te Atua te aro n aomata, man moan bwakan Atam, ao e na teimatoa n aki toki, ni karokoa ae e kakauongo nakon ana wirikiriki te Tamnei ae Tabu, ao n tokanikai i aon te aro n aomata ao n riki bwa te aomata ae itiaki rinanon ana mwakuri ni kamaiu Kristo ae te Uea.”9
E taku te Abotoro ae Bauro bwa “akana taua bukin te rabata ao a mutiakin ana bai te rabata; ma akana taua bukin te Tamnei ao a mutiakin ana bai te Tamnei.
“Ba te nano ae ana bai te rabata bon te mate; ao te nano ae ana bai te tamnei bon te maiu ao te raoi”10
E taraa ni mataata nakoiu bwa teuana te bwai ae te kabanea ni kakawaki ae ti kona n reiakinna n te maiu aei bwa ti na kanga ni katereterea rikira n tamnei ae akea tokina ao n tararuai ara iango aika buakaka. E riai n aki kaangaanga aei. Ibukin bwaai nako, tamneira, ae memena irarikira n te tai ae maan nakon rabwatara ae mamate, e a kaman tokanikai n rinekin te raoiroi iaon te buakaka n te maiu imwaain te maiu aei. Imwaain karikan te aonaaba aei, ti maeka n te aonaaba n tamnei bwa naati mwane ao aine irouia ara Karo ake i Karawa, ake a tangiriira ao n teimatoa n tangirira ngkai.
Ao eng, iai ara babaire ibukin bitakin maiura ao ara rinerine n te maiu imwaain te maiu aei. Aomata nako ake a maeka ke ni maeka n te buraneti aei a karaoa aia babaire ae kakawaki ni butimwaea ana babaire te Tamara are i Karawa ibukin kamaiuakira. Ngaia are ti bane n roko n te aonaaba aei ma kakoauan tauan mwiin arora n tokanikai iaon rikira n tamnei ao tokin kawaira ae akea tokina.
Iangoa anne teutana te tai. Boni ngkoe ao Ngai aei ao boni kaman ngkoe n taainako: te nati te mwaane ke te aine iroun te Atua, ma aan tamneim ae akea tokina ao taai aika a na roko ae kaonaki ma am konabwai ae akea tiana. Boni ngkoe—te tamnei ae kororaoi, te moan, ae rangi ni kakawaki, n taainako—ae maiu. Ao ngaia are ngkana ti rineia ni karimoai nanora n iriko nakon rikira n tamnei, ti rinea te bwai are e kaitarai arora n tamnei aika eti, ao ni koaua.
N ae teimatoa, a na akea te titiraki bwa te iriko ao tangiran bwain te aonaaba e kamangaoa aron karaoan te babaire. Ma te rabuna ni mwamwaninga ae katikaki imarenan te aonaaba n tamnei ao te maiu n aonaaba, ti kona ni kabuaa ana reitaki ma te Atua ao rikira n tamnei, ao rikira n iriko bwa aonga ni moanibwai bwaai ake ti tangiri n te tai aei. N reireiniira n rinei bwain te Tamnei iaon te iriko bon teuana bukina bwa bukin tera ngkai te taneiai n te aonaaba aei bon mwakoron ana babaire Tamara are i Karawa. Aei naba bukina ngkai te babaire e kateaki iaon ae matoatoa, aan ni koaua ana Mwakuri ni Kamaiu te Uea ao ara Tia Kamaiu Iesu Kristo bwa aonga ara bure, n raonaki ma kairua ake ti karaoi ngke ti butimwaea nakon te iriko, ti na taekikaira rinanon te rairannano ae teimatoa ao ni maiu ni kaineti ma tii bwain te tamnei. Ngkai aei te tai n tararua te bwai ae tangiria rabwatara ni kabooraoia ma ana reirei Kristo n te maiu n tamnei. Anne bukina ae ti riai n aki taotona ara bong n rairannano.11
Te rairannano, ma ngaia ae, e riki bwa te bwai ni buaka ae kakawaki i bon ibukira. N te maungatabu ni kabuta ae nako, Beretitenti Russell M. Nelson e nanona te buaka aei ao ni kauringiira bwa “ngkana ti rineia bwa ti na rairananora, ti rineia bwa ti na bitaki! Ti kariaia te Tia Kamaiu bwa e na bitiira nakon te kabanea n tamaroa. Ti rineia bwa tina rikirake n te maiu n tamnei ao ni karekea te kimwareirei—ni kimwareirei ibukin te kamaiuaki Irouna. Ngkana ti rineia bwa tina rairi nanora, ti rineia bwa tina riki n ai aron raoi Iesu Kristo!”12
Ni katoa ririki ngkai I rinanoa au bong n au tataro nakon Tamau are i Karawa, I bubuti kabwaraakin au bure ngkana arona bwa I a tia ni karaoa te kairua ao ni berita bwa N na kataia n raoiroi ningabong. I kakoaua te rairannano ni katoa bong e buoka tamneiu ni kauringa rabwatau bwa antai ae e tararuaai.
Teuana riki te buoka bon ara tai ni katoa wiiki are ti karekea ni kaboouira n te tamnei man kanakin te toa ni kauringa ana Mwakuri ni Kamaiu ao ana tangira ara Uea ao ara Tia Kamaiu, Iesu Kristo, ibukira.
Tariu ao mwaaneu, I kaungai ngkami bwa kam na karaurau ao n iangoia bwa kam mena iaa ngkai n tokanikai iaon rikimi ao ni kakorakorai rikimi n tamnei mai ieta bwa ngkana e roko te tai, kam na nako n te aonaaba n tamnei ni kaitiboaki inanon te kimwareirei ma aika a tangiraki—are I kakoaua n tataro ma te nanorinano n aran te Iesu Kristo ae tabu, amen.