Kakabwaia n te Tamnei
Ngkai ko kamwakura am onimaki iroun te Uea ao ni mwaakan Ana nakoanibonga, am konabwai ni karekei kakabwaia n te tamnei are e a tia ni katauraoia te Uea nakoim e na rikirake.
Kam rabwa ibukin te katangitang ae tamaroa. Ngkai ti bane n tei n anenea te kuna ni kamotirawa, “Ti Karabwako, te Atua, ibukin am Burabeti,” Iai uoua iango aika a taonai. Teuana bon ibukin te Burabeti Iotebwa Timiti, te burabeti ni Kaokanbwaai. Au tangira ao au kamoamoa ibukina e rikirake ni katoa bong. Te kauoua ni iango ae e roko irou ngke I taraa kainabau, natiu aine, tibu aine, ao tibutoriu aine. I namakina ae I kan tabekii ngkami bwa kain au utu.
Tabeua te namakaina n nako, ni banen te entaumente tietin, I taku nakon kainabau Wendy, “Au kantaninga bwa aine a mataata n te kakabwaia n te tamnei ake bon aia bwai n te tembora.” Aine, I aki toki ni iango ibukimi, ni ikotaki ma uoua te namakaina n nako ngke Wendy ao Ngai ti kawara Harmony, Pennsylvania.
Aio bon ara kauatai ni mwananga nako ikekei. Inanon taai akanne ti rangi n riingaki ngke ti nakonako n te tabo ae tabu anne. Bon i aon Harmony are e kaoti iai Ioane te Tia Bwabetito nakon Iotebwa Timiti ao ni kaoka te Nakoanibonga ae te Aaron.
Bon ikekei ae a kaoti Betero, Iakobo, ao Ioane ni kaoka te Nakoanibonga ae te Merekitereka.
Bon i Harmony ae Emma Hale Smith e beku bwa te moan tia koroboki nakon kainabana n ana tai te Burabeti n raira Ana Boki Moomon.
Bon i Harmony naba ngke Iotebwa e karekea te kaotioti are e kaotaki nanon te Uea nakon Emma. Te Uea e tuanga Emma bwa e na kabwaranakoi koroboki aika tabu, ni kaunga te Ekaretia, ni karekea te Tamnei ae e Raoiroi, ao ni kabanea ana tai n “reiakin aika a mwaiti.” E reiakinaki naba Emma bwa e na “katikui bwain te aonaaba aei ao n ukoukori bwaai aika a raoiroi riki,” ao n taua ni kateimatoa ana berita ma te Atua. E kaina ana reirei te Uea ma taeka aika a anai nano aikai: “Aio bwanaau nakoimi ni kabane.”1
Ni kabane bwaai ake a riki i Harmony bon iai irekereke aika a kakawaki ibukin maium. Kaokan te nakoanibonga, n reitaki ma ana taeka n reirei te Uea nakon Emma, a kona ni kairi ao ni kakabwaiai ngkami ni kabane. I rangi n tangiria bwa kam na mataata bwa kaokan te nakoanibonga e bon rang kaineti naba nakoim ngkami aine n aroia naba mwaane. Ibukina bwa e a tia ni kaokaki te Nakoanibonga ae te Merekitereka, mwaane ao aine ake a kakawakin aia berita e kona n reke irouia “ni kabane kakabwaia n te tamnei n te Ekaretia”2 ke, ti kona ni kangai, ni kabane kakabwaia n te tamnei are iroun te Uea ibukiia Natina.
Ni kabane aine ao mwaane ake a karaoi berita ma te Atua ao ni kawakin berita akanne, ao a mwakuri ma te kororaoi n otenanti n te nakoanibonga, iai aia kona ni karekea mwaakan te Atua. Naake a tia n entaute n ana auti te Uea a tia ni karekea te bwai n tangira ae mwaakan te nakoanibonga man karaoan nanon aia berita, ni ikotaki ma te bwai n tangira n atatai bwa ana kanga ni karekea te mwaaka anne.
E uki karawa nakoia naba aine ake a tia n entaute ma mwaakan te nakoanibonga are e roko man aia berita n te nakoanibonga n aroia naba mwaane ake iai irouia te nakoanibonga. Au tataro bwa te koaua e na tiku i nanomi n tatabemanii ngkami ibukina bwa I kakoaua ae e na kona ni bitii maiumi. Aine, iai te kariaia iroumi n anaa ae bati man mwaakan te Tia Kamaiu ni buokiia am utu ao tabeman ake kam tangiriia.
Ngkai, tao ko na bae ni kangai ibon iroum, “E rangi n tamaroa aei, ma N na kanga ni karaoia? N na kanga n anaa mwaakan te Tia Kamaiu nakon maiu?”
Ko aki kona ni kunea aei inanon booki n reirei. E na riki te Tamnei ae Raoiroi bwa am tia reirei ngkai ko ukora te kamataata bwa tera ae e tangiria te Uea bwa ko na ataia ao ni karaoia. E aki waetata ke ni bebete te waaki aio, ma e bon karina angim n te maiu n tamnei. Tera ae e na moanibaan riki te kakukurei nakon te beku ma te Tamnei ni mataata ni mwaakan te Atua—mwaakan te nakoanibonga?
Te bwai ae I kona n tuangko bon aio bwa karekean mwaakan te Atua inanon maium e tangira aekakin te bwai are te Uea e tuanga Emma ao ngkami nako bwa kam na karaoia.
Ngaia are, I kaoi ngkami bwa kam na kamatebwai ma te tataromwaaka mwakoro 25 n Reirei ao Berita aika Tabu ao ni kunea bwa tera ae e na reireinikote Tamnei ae e Raoiroi. Karekean rikirakem ni bon oin maiun tamneim e na uota nakoim te kimwareirei ngkai ko karekea, mataata, ao ni kabongana te mwaaka are ko a tia n anganaki.
Mwakoron te rikirake aio e na kainnanoa ae ko na katikui n aki tabeakinii bwain te aonaaba aei. N tabetai ti taekina n aki rang n nanona bwa ti na nakonako ni katuka te aonaaba ma ana kakauntaeka, ana kariiri n taabo nako, ao ana iango aika a kairua iaon bwaai nako. Ma ni koauana karaoakina e kainanoa ae ko na karaua n tirobaea maium ao ni katoatai. Ngkana ko karaoia, te Tamnei ae Raoiroi e na kairiko bwa baikara bwaai aika aki kainanoaki, baikara aika aki tau ibukin am tai ao korakoram.
Ngkai ko bita am taratara ni kitana kaririin te aonaaba, bwaai tebeua ake a taraa ni kakawaki nakoim a mwaing nako bwa moanibwai. Ko na riai n taekina ae tiaki nakon bwaai tabeua, e ngae ngke a taraa n aki rangi ni buakaka. Inanon am tai ni moana mwanangam iaon ao n reitinako ni waaki n te maiu aei ni katabua maium nakon te Uea, bitaki nakon am nonori, am namakin, ao korakoram n te maiu n tamnei ko na bon miimii iai!
Taeka ni Kauring teutana. Iai ake a na kakeaa am konabwai ni wetea mwaakan te Atua. Iai tabeman ake a na anganiko te raraoma ao ni ka kekerikaaka tamaroan mwaitin maiun tamneim ngkai te aine ngkoe ae e kororaoi.
Ni koauana, te tia kakaitara e aki tangiriko bwa ko na mataata n te berita ake ko karaoi n te bwabetito ke rabakau aika a korakora ao te mwaaka ake ko a tia ni karekei ke ko na karekei n te tembora—ana auti te Uea. Ao Tatan e bon aki tangiria naba bwa ko na mataata ae ni katoatai are ko beku ma te kororaoi ao n nebonebo n te tembora, ko otinako ma korakoran mwaakan te Atua iaom ao Ana anera a “tararua i aoia”.3
Tatan ma ake a iriiria a na teimatoa ni katei kawai n te aro ni kamwane n totokoiko man ataakin ana bwai n tangira te tamnei are ko kona ni karekei ao ni kakabwaiaki iai. Te kananokawaki, bwa tabeua kawai n totoko bon mai imwin aroaron temanna ae e aki raoiroi. I nanokawaki ni iangoia tabeman mai iroumi a tia n namakina te aki tabeakinaki ke n aki kakoauaaki iroun te tia kairiiri n te nakoanibonga, ke ko a tia ni bwainikirinaki ke ni kamwaneaki iroun te kainaba, te karo, ke ae e na riki bwa raraom. E rotai te rawawata bwa tabeman mai ibuakomi a tia n namakina te katinanikuaki, te aki karineaki, ke ni motikaki taekana n ae e kairua. Mwakuri ni ioawa aikai bon akea neia n abanuean te Atua.
Ni kaitarana, e kaonai te kukurei ngkana I reiakinna bwa taan kairiiri n te nakoanibong a ingainga n ukorii kairakiia aine n te waaki inanon te uoote ke te titeiki ni kauntira. E kaungaaki nanou irouia kainaba n tatabemaniia ake a kaotia bwa te kabanea ni kakawaki ni bukinaia n te nakoanibonga bon tararuakiia buuia.4 I kaitaua te mwaane are e rangi ni karinea ana konabwai kainabana ni karekea te kaotioti ao ni kawakina bwa toana ae titebo aroia i nanon aia mare.
Ngkana te mwaane e mataata n rietaatan ao te mwaaka ni kororaoin, n ana ukeuke, te aine ae e entaute irouia Aika Itiaki ni Boong aika Kaitira, e na bon kamiimii bwa e namakinna ae e na teirake ngkana e rin neiene inanon te ruu?
Mai imoan te tai, a kaman kakabwaiaaki aine ma te aro ni kairi ae e onoti ni momoaomata—te konabwai ni ataa kaokoron te eti man te bure. Te bwai n tangira aei e kabatiaaki irouia te koraki ake a karaoi ao ni kawakin aia berita. Ao e kauarerekeaki irouia te koraki ake a tangiria ni katinanikua ana tua te Atua.
I waekoa n reitia bwa I aki kamanoia mwaane man te kairua n arona nako man Ana kaetieti te Atua ibukiia n atakin te kaokoro imarenan te eti ao te kairua. Maneu aika kam tangiraki, konabwaimi n ataa te koaua man te kairua, n riki bwa taan kawakina te maiu ni itiaki ibuakoia aomata, e bon rangi ni kakawaki ni boong aikai. Ao ti katan iaomi bwa kam na reireiniia tabeman bwa ana karaoia naba. Kariaia bwa N a kamataata raoi aio: ngkana te aonaaba aio e a kabuaa te annua ae e kaotaki man aia momoaomata aine, te aonaaba e na bon aki konaa n rikirake.
Ngaira Aika Itiaki ni Boong aika Kaitira bon tiaki ana bwai te aba ngaira; bon ngaira kain Iteraera n te berita. Ti weteaki bwa ti na katauraoa te aonaaba ibukin Kauaokin te Tia Kamaiu.
I kona ni kamataata ngkai, reita ni iango tabeua ni irekereke nakoia aine ao te nakoanibonga. Ngkana ko kamatoaaki bwa ko na beku n taian wewete iaan ana tararua temanna are e iai irouna kingin te nakoanibonga—n aron am bitiobi ke titeiki beretitenti—ko a anganaki te kariaiakaki n te nakoanibonga ni mwakuri inanon te wewete anne.
Ai arona naba, n tembora aika tabu, ko kariaiakaki ni karaoi ao ni kaira waakin te otenanti n te nakoanibonga ni katoa tai ngkana ko roko. Am entaumente n te tembora e katauraoiko ni karaoan aio.
Ngkana ko a tia n entaute ma ko tuai ni mareaki ma te mwaane are iai irouna te nakoanibonga ao tabeman a taku nakoim, “I nanokawaki ngkai akea te nakoanibonga ni mweengam,” taiaoka ataia bwa te rongorongo anne e kairua. Tao a na akea ae iai irouna te nakoanibonga ni mweengam, ma ko a tia ni karaoa te berita ae tabu ma te Atua n Ana tembora. Man berita akanne a roko kakabwaiaakim man mwaakan Ana nakoanibonga iaom. Ao uringa, ngkana tao e a mate kainabam, ko riai n tararua ni mweengam.
Ngkai te aine iroua Aika Itiaki ni Boong aika Kaitira, ae e kororaoi, ko taetae ao n reirei ma te mwaaka ao te kariaiakaki mai iroun te Atua. Tao man am kaunganano ke marooro, ti kainanoa bwanaam n reirei ana reirei Kristo. Ti kainanoa am iango inanon te utu, uoote, ao ni kauntiran te titeiki. Arom ni ira te waaki e kakaawaki ao tiaki ibukin te katamaroa!
Maneu aika aika kam tangiraki, e na rikirake korakorami ngkai kam buokiia tabeman. Ami tataro, aki mamatam, ami tai ni warekan koroboki aika tabu, ao ami beku n te tembora, ao ami mwakuri n rongorongon te utu e na kauka karawa nakoimi.
Au kaoriori nakoimi bwa kam na kamatebwaia ma tataromwaka ni kabane koaua ake ko kona ni kunei iaon mwaakan te nakoanibonga. Ko kona ni moanna man Reirei ao Berita mwakoro 84 ao 107. Mwakoro akanne a na kairiko nakon mwakoro ake tabeua. Koroboki aika tabu ao reirei mai irouia burabeti, taan mamata, ao taan karekei kaotioti ni boong aikai a kaonaki ni koaua aikai. Ngkai e a rikirake am ataatai ao ngkai ko kamwakura am onimaki iroun te Uea ao ni mwaakan Ana nakoanibonga, am konabwai ni karekei kakabwaia n te tamnei are e a tia ni katauraoia te Uea ibukim e na rikirake. Ngkai ko karaoia, ko na kunea bwa ko a kona riki ni buoka katean te utu ae akea tokina are a na bootaki, kabaeaki n ana tembora te Uea ao n onrake n tangiran Tamara are i Karawa ao Iesu Kristo.
Ara kekeiaki ni buokiira ibon imarenara, n tataekina te euangkerio, ni kakoraoia aika Itiaki, ao ni kamaiuia maate a bane n riki n te tembora. Iai ngkai 166 tembora ni kabutaa te aonaaba, ao iai riki aika iaoni kawaia.
N aron ae ko ataia te Salt Lake Tembora, Tembora Tikuea, ao tabo n nakonako ake i rarikin Aobitin te Aro a na kabouaki n te mwakuri are e na moanaki ni banen te ririki aio. Te tembora ae tabuaio e na kawakinaki ao ni katauraoaki bwa e na anai nanoia te roro ae e na roko, n aron are e anai nanora inanon te roro aio.
Ngkai e a rikirake te Ekaretia, a mwaiti riki tembora aika a na kateaki bwa aonga utu aika mwaiti ni kona ni karokoaki nakon ni kabane kakabwaia aika a korakora, ake ibukin te maiu ae akea tokina.5 Ti taraa te tembora bwa te kabanea n tabu ni kateitei n te Ekaretia. N te tai are ti katanoatai babaire ibukin katean te tembora ae boou, e riki bwa mwakoron ara rongorongo ae tabu. N aron are ti maroroakina n te tairiki aei, ngkami aine kam kakawaki nakon te mwakuri n te tembora, ao te tembora bon te tabo are ko na karekea te kakabwaia n te tamnei ae rietaata.
Taiaoka kakauongo raoi ma te nano ni karinerine ngkai N a taekin babaire ibukin katean waniua tembora aika boou. Ngkana I katanoata teuana n te tabo are e onoti nakoim, N na bubuti bwa kona kabaraaka atum ma te tataro ae rau ni kakaitau inanom. Ti kukurei ni katanoatai babaire ibukin katean tembora n taabo aikai: Freetown, Sierra Leone; Orem, Utah; Port Moresby, Papua New Guinea; Bentonville, Arkansas; Bacolod, Philippines; McAllen, Texas; Cobán, Guatemala; and Taylorsville, Utah. Kam rabwa, mwaneu aika kam tangiraki. Ti kakaitau mai i nanora n ami butimwaai nakon babaire aikai ao ami kaeka ae tabu.
Ngkai, ni kainana, I tangiria ni katuka au kakabwaia iaomi, bwa kam na kona ni mataata ni mwaakan te nakoanibonga are kam a kaman anganaki ao are kam na kona ni kakorakora te mwaaka anne man kamwakuran ami onimaki iroun te Uea ao Ni mwaakana.
Mwaneu aika kam tangiraki, ma au karinerine ae e nano ao ni kakaitau, I kaota au tangira nakoimi. Ma te nanorinano I kaotia bwa E maiu te Atua! Iesu bon te Kristo. Aio Ana Ekaretia. I kakoaua n aran Iesu Kristo ae tabu, amen.