Mimitong ao te Baire ni Kakukurei
Te kukurei ae korakora riki e roko man korakoran mimitongin te aomata.
Tariu ao mwaneu, I a tia n tataro ibukin te mwaaka ni buoki ngkami n oin ami kakae iroumi ibukin te kukurei. Tabeman a tia n namakina te kukurei ae tau, ao I koaua bwa akea ae e a tia n totokoa te anga ao riki te kukurei. Ni kabane a na ingainga ni butimwaea te anga ae te kukurei ae akea tokina.
Anne are Tamara are i Karawa, Natina ae Tangiria, Iesu Kristo; ao te Tamnei are Raoiroi a tia n anganiia ataei ni kabane aika tamnei aika natin Tamara are i Karawa ake a maiu ngkai, ao aika a na roko, ao ake a tia ni maiu inanon te aonnaba aio. Te anga anne e aranaki n tabetai bwa te babaire ni kakukurei. E aranaki iroun te burabeti ae arana Aramwa ngke e reireina natina te mwaane are e reke inanon kangangan te bure. Aramwa e ataia bwa te aro ae a buakaka e bon aki kona ni karekea te kakukurei.ibukin natina te mwaane—ke ibukiia nako Natin Tamara are i Karawa.1
E reireina natina te mwaane te rikirake inanon te mimitong bon te kawai nakon te kukurei. E taekinna ni kabebetea bwa korakoran te mimitong e kona n reke rinanon Ana Mwakuri ni Kamaiu Iesu Kristo are kaitiakira ni kakororaoira.2 Tii man te onimaki iroun Iesu Kristo, te teimatoa n rairinano, ao kawakinan berita are ti na kona n tangira te kukurei ae akea tokina are ti kainnanoia ao ni kawakinna.
Au tataro ibukimi n te bong aei bwa I kona ni buoki ngkami n oota bwa te kukurei ae korakora e roko man korakoran mimitongin te aomata bwa ko na mwakuri iaon te koaua anne. N na tibwa ngkanne te bwai ae I ataia i bon irou n aron te bwai ae ti konani karaoia bwa ti na tau ibukin te bwaintangira n riki ni mimitong.
E reireiniira booki aika tabu bwa mai buakon bwaai tabeua, ti kona ni kaitiakaki ke n riki ni moa ni mimitong ngkana ti kamwakura te onimaki inanon Kristo,3 ni kaota ara ongeaba,4 rairannano,5 n angakareaIbukina,6 ni karekei otenanti aika tabu, ao ni kawakin ara berita ma Ngaia.7 Katauakira ibukin te bwai n tangira ni mimitong e tangira te nanorinano,8 te nimamanei9 ao te taotaonaki n nano.10
Teuana te tataneiai n tangirakin riki nimimitong e roko nakoiu n te Salt Lake Tembora. I rin n te tembora n te moan tai ma e karako tuangakiu n te bwai ae N na kantaningaia. I a tia n noora te taeka n te kateitei, “E tabu ba ana b’ai Iehova” ao “Uman te Uea.” I namakina bwa e kakorakoraaki au kakantaninga. Imwaina I iangoia bwa I a tauraoi n rin.
Tinau ma tamau a rimoau n nakonako ngke ti rin n te tembora. Ti tuangaki ara beebwa ni kariaiakaki, ni kakoaua bwa tia a tau.
Au karo a ataa te aomata are n te tabo are e butimwaai beebwa ni kariaia. Ngkanne a baenikai tabeua te tai n taetae ma tearei. I bon waerake n tii ngai nakon te tabo ae mwaawa ike bwaai a mainaina man takiakia. I taraa te tiiring ae rietata i e tau taraana kanga karawa ae uki. N te tai anne, e roko irou te iango ae itiaki bwa I a tia n roko ikekei mai mwaina.
Ma ngkanne, I ongo te bwanaa ae moan te amarau—tiaki bwanaau. Taeka ake a amarau bon aikai: “Ko tuai n roko ikai mai mwaina. Ko tabe ni uringa te tai imwain bungiakim. Ko mena n te tabo ae tabu n aekan aio. Ko namakina te Tia Kamaiu bwa E na roko n te tabo are ko tei iai. Ao ko namakina te kukurei bukina bwa ko ingainga ni kan Noria.”
Te namakin anne inanon te Salt Lake Tembora e toki ti tabeua te tai. Imwaina ibukina e bon uota te rau, kukurei, ao te kakatonga ae rau.
I reiakin reirei aika a mwaiti n te bong anne. Teuana Te Tamnei are Raoiroi e taetae n te rau, te bwanaa ae uarereke. I kona n ongo ngkana iai te rau n tamnei inanou. E uota namakinan te kukurei ao te karaunano are I a riki ni mimitonga. Ao anne are aki toki ni uota te kukurei ae I namakinna ni moan taai akanne inanon Ana tembora te Atua.
Kam a tia ni kamataua inanon maiumi ao ni maiuia tabeman kamimin te kukurei ae roko man rikiraken te mimitong, ao riki n aekan te Tia Kamaiu. Ni wiiki aika a nako, I a tia ni mena irarikin aia kainiwene aomata ake a kaitara te mate ma te onimaki ae kororaoi inanon te Tia Kamaiu ao taraakin moaia ae kukurei.
Temanna te mwaane ae katobibiaki iroun ana utu. Teuanne ma kaain abana a maroro ni karaurau ngke I rin ma natiu te mwaane. I a tia n ataia inanon ririki aika mwaiti. I a tia n noora aron Ana Kamaiu Iesu Kristo ni mwakuri inanon maiuia.
A tia ni uaia n rinea ae a katoka te mwakuri ni kuakua bwa e aonga n abwabwaki maiuna. Iai te namakin ae rau ngke e taetae nakoira. E moangare ngke e taekina ana kakaitau ibukin te euangkerio ao ana mwakuri ni kaitiaki iaona ao ana utu aika aetangiriia. E taekin ana ririki aika a kakukurei ni mwakuri inanon te tembora. N ana bubuti te mwaane aio, natiu te mwaane e kabira atuna n te bwaa ae katabuaki. I karaoa te kabiribi. Ngke I karaoia, Iai au namakin bwa N na tuanga bwa e na waekoa n noora ana Tia Kamaiu, ni itaramata.
I berita nakoina bwa e na namakina te kukurei, te tangira, ao Ana kariaia te Tia Kamaiu. E matangare ma te rau ngke ti nako. Kabanean ana taeka nakoiu aikai “Tuanga Kathy bwa I tangiria.” Kainnabau, ae Katheleen, inanon ririki aika mwaiti e a tia ni kaungaiia rooro ma aia utu ni kaeka ana kakao te Tia Kamaiu n nakomai Nakoina, ni karaoa ao ni kawakin berita aika tabu, ao n tau ibukin te kukurei are e roko bwa bukin te mimitong ae korakora.
E mate tabeua te aoa imwiina. Inanon wiikin matena, neiere buuna e uota ana bwaintangira nakon kainnabau ao ngai. E moangare ngke ti maroro. E taku ma te kukurei, “I kantaningaia bwa N na namakina te nanokawaki ao te maroaa. I a rangi ni kukurei. N am iango e raoiroi anne?”
N ataakina bwa e mwaiti tangiran kainnabana ao a kanga ngaia ni kauoman n ataia, te tangira, ao te beku ibukin te Uea, I tuangnga bwa a na namakin ibukin te kukurei bon te bwaintangira ae reke irouna, man ana mwakuri ni kakaonimaki, are e a tia ni kamimitongaki riki iai. Mimitongina e a tia ni kataua neiei ibukin te kukurei anne.
Tabeman aika ongora n te bong aei a na mimi: Bukintera I aki namakina te rau ao te kukurei ae beritanaki nakoia ake a tia ni kakaonimaki? I a tia ni kakaonimaki rinanon te kaangaanga ae kakamaaku, ao I aki namakina te kukurei,”
E bon tia naba te burabeti are Iotebwa Timiti ni kaitara te kataaki aio. E tataro ibukin te rau ngke e kamatawarikakin te karabuuti i Liberty, Missouri. E a tia ni kakaonimaki nakon te Uea. E a tia n rikirake n te mimitong. Irarikina e a tia n namakinna bwa e aki anganaki te kukurei.
E reireinna te Uea bwa e na taotana nanona are ti na bane ni kainnanoia n taai tabetai, ao tao ibukin naba te tai ae maan, ni katakira n te maiu ae mamate. Aio ana rongorongo te Uea nakon Ana burabeti ae kakaonimaki ao n rinanon te kaangaanga:
Bwa ngkana a karenakoko inanon te marua, ke n reke inanon baia taan tiritiri, ao ni motikaki taekam nakon te kamateaki; ke ngkana a karenakoko n te kinono, ke ngkana e kaitaraaki ma angibuakan te maiu aei; ke ngkana e riki te angbuaka bwa kaitaraam; ao ngkana e rootongtong karawa, ao ngkana bwaai ni kabane a tuuka te kawai; ao iaon bwaai nako, ngkana mataroan moone e katangainaaki imwaim, ko na riai n ataia natiu, bwa bwaai aikai anganiko bwa reireiam, ao n riki bwa kairam ae tamaroa.
“Natin te Aomata e a tia n rinanon bwaai akanne ni kabane. Ko kakannato riki nakoina?
“Mangaia are, taua kawaim, ao te nakoanibonga e na tiku iroum; bwa tiaia a tia ni baireaki, a aki kona n riaona. Am bong a ataaki, ao am ririki a na aki kauarerekeaki; mangaia are, tai maaka te bwai ae e na karaoia te aomata, bwa te Atua e na mena iroum n aki toki ao n aki tootoki.”11
Anne titebo ma te reirei ae e a tia te Uea n angan Iobi, are tia n namakinna n kariaia te Baire ni Kamaiu bwa e kamimitongaki iriki iai. Ti ataia bwa Iobi e mimitong, man te reirei are ti ataia ibukina “Temanna te aomata ngkoa n te aba are Uti, ae arana Iobi ao moan te raoiroi te aomata arei ao e mamaka te Atua, ao e ririba te buakaka.12
Ngkanne Iobi e kabua kaubwaina, ana utu, ao maiuna. Kam na uringa bwa Iobi e nanououa bwa mimitongina ae korakora, e reke man te kanganga ae korakora, e a tia ni karikia be na tau ibukina te kukurei ae korakora. E taraaki iroun Iobi bwa mimitongina e karokoa te kanganga.
Ma te Uea e angan Iobi te reirei ni kaeti are angan Iotebwa Timiti. E kamatata Iobi norakin uruakin nanona ni matana n tamnei. E taku:
“Ko na kabaea nukam ngkai n aiaron te mwaane bwa N na titirakiniko ao ko na tuangai.
“Ko mena ia ngke I moan kawene aan aonnaba? tuangai ngkana tao ko ataibwai.
“Ai antai ae motika bukin baireana, ngkana tao ko ataia? ao antai ae bairea te kora iaona?
“A kainakoaki bouanaa iaon teraa? ao ai antai ae kawenea atibuni maninganingana;
“Ngke a bootaki n anene ni kimareirei taian itoi ni ngaina ao a bane Natin te Atua n takaakaa ni kakatonga?”13
Ngkanne, ngke raira nanona Iobi man araakin te Atua bwa e aki riai, Iobi e kariaiakaki bwa e na noori kataakina n aaro aika ririeta ao ni mimitong. E a tia n raira nanona.
Ngkanne Iobi e kaeka te Uea, ao e taku,
“I ataiko bwa ko kona bwaai ni kabane ni karaoi. Ao e aki konaki n tukaki nanom teuana.
“Ai antai teuae karaba te taetae ni kawanawanaa te aba, ao akea naba ana ataibwai? ma ngaia ae I atonga ae I babanga arona; aika bwaai aika bati ni kamimi irou aika I aki atai.
I butiko bwa ko na ongora irou, ao N na taetae: N na titirakiniko, ao ko na tuangai.
“I ongo taekam ngkoa n ongon te taninga; Ao ngkai, e noriko matau.
“Ma ngaia ae I ribaai, ao I raraoma i nanoni bubun te tano ma te mannang,“14
Imwiin ana raraoma Iobi ao e riki ni moa ni mimitong, E kakabwaia te Uea ni mwaiti riki nakon are kabuai ni kabane. Ma tao te kabanea ni korakora ni kakabwaia ibukin Iobi boni korakoraan mimitongina rinanon te kaangaanga ao te rairannano. E a tau ni karekea te kukurei ae korakora n te tai are maiu iai.
Te mimitong ae korakora e aki kona n roko tii ngkana ti bubuti ibukina. E na roko man karaoakin te bwai ae kainanoaki ibukin te Atua ni bitiira.
Beretitenti M.Nelson e a tia n anga are taraana irou te kabanea n tamaroa n reirei ni ira kawain te berita nakon te mimitong ae korakora. E anga te kairiiri ngkana e kainnanoaki:
Ataakin te mwaaka ni kakorakora te rairannano ni katoa bong—ni karaoa ae raoiroi riki ni katoa bong.
Ngkana ti rineia bwa tina rairi nanora, ti rineia bwa tina bitaki! Ti kariaia te Tia Kamaiu bwa e na bitiira nakon te kabanea n tamaroa. Ti rineia bwa tina rikirake n te maiu n tamnei ao ni karekea te kimwareirei—ni kimwareirei ibukin te kamaiuaki Irouna. Ngkana ti rineia bwa tina rairi nanora, ti rineia bwa tina riki n ai aron raoi riki Iesu Kristo!”
Beretitenti Nelson e reitinako n anganiira te kaunganano n ara mwakuri n riki ni mimitong: “E aki kantaninga te kororaoi te Uea mairoura n te tai aio. … Ma E kantaningaira bwa tina rikirake n tamaroa. Te rairanano bon te kawai nakon te kaitiakaki,”15
Beretitenti Dallin H.Oaks, n taetaena ni moan taai n te maungatabu, e buokai naba n noora itiakin arora n rikirakera ni mimitong ao arora ni kona n ataia bwa ti na riki ni mimitong. E taku ti na kanga ni karekea n tamneira? Ti na kanga n roota te karinan ni mimitong arei ike ti kona ni karekea ana iraorao ae reitinako te Tamnei are Raoiroi? Ti na kanga n roko n noora ao n iangoi bwaai n te aonnaba aei, ma taraan te maiu are aki toki?”16
Ana kaeka Beretitenti Oaks e moanaki ma te onimaki ae korakora inanon ana mwakuri Iesu Kristo are ara Tia Kamaiu ae tangiraki. Are kairira ni ukoukora te kabwarabure ni katoa bong ao ni Uringnga ni katoabong man kawakinan Ana tua. Bwa te onimaki ae korakora riki inanon Iesu Kristo e roko ngkana kam kanuai ngkami n Ana taeka Kristo ni katoa bong.
Te anene “More Holiness Give Me” e katautaua te kawai n tataro ibukin te buoka n riki ni mimitong. Te Tia Ototo e rangi ni wanawana ni katautaua bwa te mimitong ae ti kakaea bon te bwaintangira mairoun te Atua ae tangira, e karekeaki n taainako, imwiin are ti kona ni karaoia. Kam uringa te kabanea ni kibu:
Anganai riki te itiaki,
Te korakora riki are ti kona n tokanikai,
Te inaomata riki man mwiin bwain aonnaba,
Ma te kan nakon mweengara.
Ti na tau ibukin te abanuea,
I tangiria ni kamanenaki bwa N na mwakuri riki,
N na kakabwaiaki riki ao ni mimitong—
Moa riki n aekan te Tia Kamaiu.17
Baikara ara kaangaanga n aomata, bwa ti mena iaon kawain te berita n te mweenga, ara tataro a na kaekaaki ibukin te mimitong riki ae korakora. I ataia bwa ara bubuti a kariaiakaki, e na rikirake ara kukurei. E na roko ni karaurau, ma e na bon roko. Iai te karaunano mairoun Tamara are i Karawa ao Natina te Mwaane ae tangiraki, Iesu Kristo.
I kakoaua bwa Iotewa Timiti bon ana Burabeti te Atua, bwa Beretitenti Russell M. Nelson ara burabeti ae maiu n te bong aei. Te Atua ae Tamara e maiu ao e tangiriira. E tangirira bwa ti na okiri weengara Nakoina inanon ara utu. Ara Tia Kamaiu ae tangiraki e kaoira n Rimwiina n ara mwananga nako ikekei. A tia ni katauraoa te kawai. N aran Iesu Kristo ae tabu, amen.