Mau parau fafau a te mau peropheta

Nā Elder Daniel G Hamilton

Hitu Ahuru Area

Mai te ’āmuira’a rahi fa’ahiahia nō ’Ēperēra 2020 ra, ’ua feruri au e aha tei parauhia Te mau parau fafau a te mau peropheta.

’Ua fa’aro’o ānei ’outou i te reira ? Tē tītau ra ānei ’outou i te reira ?

Nā roto e piti ’īrava i roto i Te Parau Ha’api’ira’a ’e te mau Parau Fafau, e noa’a ia tātou te tahi hi’ora’a nō te mau parau fafau a te mau peropheta.

Te tuha’a 1:38 nā mua e ha’api’i nei ē, ’ia parau ana’e te tāvini a te Fatu, tōna mau peropheta, mai te huru ē tē paraparau ra te Fatu iho ; « … Nā roto i tō’u iho reo ’e ’aore rā, nā roto i te reo o ta’u mau tāvini, hō’ē ā ïa. »

Te piti, ’o te tuha’a 82:10 ïa e tu’u mai i te fafaura’a te ra’i iāna iho : « ’Ua ru’uru’uhia vau, ’o te Fatu, ’ia rave ’outou i te mea tā’u i parau ra ; ’ia ’ore rā ’outou ’ia rave i tā’u i parau ra, e ’ore ïa tā ’outou e fafaura’a i reira. »

Noa atu ā ’ua fāri’ihia ’e ’ua pāpa’ihia teie nau ’īrava ’ei piti heheura’a ta’a ’ē, mai te mea e tai’o-’āmui-hia rāua, e tae mai te māramaramara’a ’āpī, te aura’a ’e te mana.

’Ia tāpirihia te mau parau tumu i roto i teie nā ’īrava e piti, e pāpū ia tātou ē, ’ia parau ana’e te mau peropheta ora, te mau hi’o ’e te mau heheu parau ē « tē parau fafau nei au » ’ua ru’uru’uhia te Fatu i terā parau fafau, mai te mea e ora tātou mai te au i te mau tītaura’a tei ni’a iho te mau ha’amaita’ira’a i parauhia.¹

E toru ta’ahira’a nō te tītau i te mau parau fafau a te mau peropheta.

Hi’o ta’a ’ē i te reira.
Pāpa’i i te mea e tītauhia nō te fāri’i i te reira.
Ora nō te tītau i te reira.

E iva parau fafau a te mau peropheta i tu’uhia mai i roto i te ’āmuira’a rahi nō ’Ēperēra 2020.

Te peresideni Russel M. Nelson : « ’Ua parau fafau a’enei au ē, mai te mea ē, e rave tātou mai te maita’i roa nō te fa’aho’i i te i’oa ti’a o te ’Ēkālesia a te Fatu, e nīni’i mai ’oia i tōna mana ’e te mau ha’amaita’ira’a i ni’a i te upo’o o te Feiā mo’a i te mau mahana hope’a nei, i te fāito ’aore ā tātou i ’ite a’enei. Tē parau fa’ahou nei au i terā parau fafau i teie mahana. »²

« Tē fafau atu nei au ia ’outou ē, mai te mea e rave itoito ’outou i te ’ohipa o te hiero ’e te ’ā’amu ’utuāfare, e rahi atu ’e e maita’i atu tō ’outou ’aravihi ’ia fa’aro’o iāna. »³

I roto i taua a’ora’a ra, ’ua parau te peropheta a te Fatu : « E aha tē tupu, mai te mea ē, e fa’aro’o mau tātou, ’e e ha’apa’o i tā te Fa’aora i parau ’e tāna e parau nei i teienei nā roto i tōna mau peropheta ? Tē fafau atu nei au ē e ha’amaita’ihia ’outou i te mana hau atu nō te ārai i te fa’ahemara’a, te mau ’arora’a, ’e te mau paruparu. Tē fafau atu nei au e tupu te temeio i roto i tō ’outou fa’aipoipora’a, te mau autā’atira’a ’’utuāfare, ’e te ’ohipa i te mau mahana ato’a. ’E tē fa’afu atu nei au ē, tē rahi noa atu ra te ’ārepurepu i roto i tō ’outou orara’a. »⁴

’Ei ’ōpanira’a i te ’āmuira’a, ’ua hōro’a mai te peresideni Nelson i teie parau fafau : « Tē pure nei mātou ’ia ha’amata fa’ahou mau ’outou i te fa’aro’o, i te ha’afatafata mai i te tari’a, ’e i te ha’apa’o i te mau parau a te Fa’aora. Tē fafau atu nei au ē, e topa te mata’u ’e e rahi te fa’aro’o. »⁵

Elder Neil L. Andersen : « Tē fafau atu nei au ia ’outou ē, mai te mea ē, e ’ite ’outou ma te hina’aro mau ’e e ha’apa’o māite ho’i i te mau ’ohipa faufa’a pae vārua i roto i tō ’outou orara’a, e rahi atu ā ’o tē tae mai ia ’outou ra.⁶

Nō ni’a i te Buka a Moromona ’ua parau Elder Ulisses Soares : « Tē fafau atu nei au ia ’outou ē, mai te mea, e tuatāpapa tāmau ’outou i tāna mau parau nā roto i te pure, e nehenehe ’outou e fāri’i i tōna mau ha’amaita’ira’a faufa’a i fafauhia i roto i tō ’outou orara’a. Tē ha’apāpū fa’ahou nei au i te fafaura’a e tāvevo nei i roto i tōna mau ’api : ’Oia ho’i, mai te mea ē, « e ui atu ’outou i te Atua, i te Metua mure ’ore ra, i te i’oa o Iesu Mesia ē, e ’ere ānei teie mau mea i te parau mau ; ’e ’ia ui atu ’outou ma te ’ā’au hina’aro mau, ma te mana’o pāpū, ’e ma te fa’aro’o i te Mesia », nāna ïa « e fa’a’ite mai i te parau mau ia ’outou, nā roto i te mana o te Vārua Maita’i ».⁷

Elder Ronald A Rasband : « Tē fafau atu nei au ē, mai te mea e pe’e ’outou i te a’ora’a fa’auruhia a tō tātou peropheta here, te peresideni Russell M. Nelson, tōna nā tauturu, te mau ’āpōsetolo, ’e te tahi atu mau feiā fa’atere o te ’Ēkālesia, ’e mai te mea ē, e ha’apa’o ’outou i te mau peropheta tahito tei tohu nō tō tātou nei ’anotau, e fa’a’īhia ’outou, i roto i te hōhonura’a o tō ’outou ’ā’au ’e te vārua, i te vārua ’e te ’ohipa o te fa’aho’ira’a mai. Tē fafau atu nei au ia ’outou ē, e ’ite ’outou i te rima o te Atua i roto i tō ’outou orara’a, e fa’aro’o ’outou i tāna mau muhumuhu, ’e e ’ite ’outou i tōna here ».⁸

Te fa’a’ite nei au i tō’u māuruuru rahi nō te arata’ira’a a te mau peropheta ora, te mau hi’o ’e te mau heheu parau. ’Auē te fa’ahiahia tē vai ra tā rātou arata’ira’a fa’auru ’e te hi’ora’a nō te pūpūra’a iāna iho i te Fatu Iesu Mesia.

Tē hōro’a nei au i tō’u ’itera’a ē tē fa’aro’o nei te Metua i te Ao ra ’e tē pāhono nei i tā tātou mau pure. ’Ia parau mai te mau peropheta, te mau hi’o ’e te mau heheu parau i te mau parau fafau ia tātou, e ha’apa’ohia te reira mau parau fafau mai te mea e ora tātou nō te tītau i te reira. Tē fa’a’ite fa’ahou nei au ē, ’o Iesu te Mesia, te aura’a ra, ’o ’oia te Mesia a te ’āti Iuda tei tīa’i-maoro-hia ’e te Fa’aora o te ao nei. Tē ora nei ’oia !