TE MAU ’API NŌ PĀTIFITA
’Ua hāmani te mau melo o te ’Ēkālesia e 1 200 tāpo’i vaha nō te tauturu i te pārurura’a i te huira’atira’a i te COVID-19, i Pōrīnetia farāni
’Ua putuputu a’enei te mau vahine nō te Sōtaiete Tauturu nō te pāroita nō Avera, te pāroita nō Te ’Ēkālesia a Iesu Mesia i te Feiā Mo’a i te mau Mahana Hope’a nei, nō te nira e 1 200 tāpo’i vaha nō te pāruru i te mau tamari’i ’e te mau matahiapo nō te ’oire nō Taputapuātea, i ni’a i te motu nō Raiata, i Pōrīnetia farāni.
’Ua hōro’ahia te mau tāpo’i vaha i te Monirē 22 nō Tiunu, ia Tāvana Jeannette Taea ra, te mono tānava mātāmua, ’o tei fāri’i i te reira nō te mau matahiapo ’e nā fare ha’api’ira’a tuatahi e maha o te ’oire, nō Avera, Fa’aroa, ’Ōpoa ’e Puohine.
’Ua ha’amāuruuru te tāvana Taea i teie pupu ’e i te ’Ēkālesia i teie mau parau :
« E mea fa’ahiahia roa teie ’ēkālesia nō te mea e ’āmui pinepine mai rātou i roto i te mau ’ohipa tāvinira’a i roto i te ’oire, e piti ’aore rā e toru taime i te matahiti. Nō te fa’anehenehe ānei i te ’oire, nō te tāmā i te mau marū ro’i o te fare ha’api’ira’a tamahou, nō te ’ohi ’e nō te fa’ata’a i te pehu, e ’ēkālesia tei hina’aro mau e hōro’a i te mau mea ato’a ma te ’ā’au ato’a. »
’Ua ravehia teie ’ohipa i raro a’e i te arata’ira’a a te titi nō Raromata’i, tē peresidenihia nei e Boyer Teheiura. ’Ua ’āpe’e ’o Rose Noelle Ebb, te upo’o fa’atere ’ohipa tūreiara’a, i teie pupu, ma te fa’aha’amana’o ē e tuha’a teie ’ōpuara’a nō te peu tāvinira’a ’e te mau ’ōpuara’a rima tauturu a Te ’Ēkālesia a Iesu Mesia i te Feiā Mo’a i te mau Mahana Hope’a nei.
« E hi’ora’a rahi teie nō te fa’anahora’a totauturu a te ’Ēkālesia ’o tē hōro’a nei i te tauturu rū i te mau ’utuāfare i roto i te ’ati. Iā’u nei, e ’ōpuara’a nehenehe mau teie e tāmāhanahana i te ’ā’au o te ta’ata tāta’itahi i ’āmui mai, tei pāpū roa ē ‘’a tāvini ai ’outou i te ta’ata nei, tē tāvini ra ïa ’outou i tō ’outou Atua ra. » (Mosia 2:17, Te Buka a Moromona : Te tahi fa’ahou ’ite nō Iesu Mesia).