Nahaunang Kababayen-an sa Pagpahiuli
Si Eliza Namulong uban sa Katungod
Kita, sama ni Eliza R. Snow, makaatubang sa atong mga kahadlok ug makapamulong uban sa kaisug.
Paghulagway ni Toni Oka
Niadtong Abril 18, 1884, usa ka tigulang nga babaye nga ang panagway nagpakita og katuigan sa kalisud mibarug aron mamulong ngadto sa mga sister sa Relief Society sa Utah. Mao kadto ang Kinatibuk-ang Presidente sa Relief Society nga si Eliza R. Snow, ug ang usa ka pamantalaan nagreport nga, bisan og 80 anyos, siya “namulong uban sa dakong gahum ug tinguha, ug ang iyang tingog ingon og lig-on ug mipuno sa dako nga gambalay [building].”1
Sa dihang nabunyagan si Eliza, misaad siya sa Dios nga siya “kanunay modayeg sa Iyang ngalan diha sa kongregasyon sa mga santos.”2 Nagpabilin siyang matinud-anon niana nga saad, nga naghatag og sobra sa usa ka libo ka mga sermon sa iyang tibuok kinabuhi. Apan kadtong kinsa adunay pribilehiyo sa pagkadungog kaniya tingali masurprisa sa pagkahibalo nga ang pagpamulong sa publiko nakapabalaka kaayo kaniya. Gani samtang nagtudlo sa eskwelahan didto sa Nauvoo ug nagrekord sa mga gihisgutan sa miting sa Relief Society didto, nagpanuko siya sa pagsulti.
Usa ka pagdapit sa pag-atubang sa iyang mga kahadlok miabut niadtong 1868, dihang si Presidente Brigham Young mihangyo ni Eliza sa pagtabang nga maorganisar ang Relief Society sa tibuok Utah. “Gusto ko nga tudloan nimo ang mga sister,” miingon siya. Ang ideya makahadlok kaayo nga si Eliza mihulagway sa iyang kasingkasing nga mikalit og paspas ang pitik.3 Apan nakakaplag siya sa kaisug sa pagbuhat sa iyang labing maayo, ug sa kadugayan siya nakat-on nga ang pagdawat og mahagitong mga katungdanan mipuno kaniya og kalig-on lapas sa iyang kaugalingon.
Ngadto sa usa ka grupo, si Eliza mipasabut nga ang Presidente sa Simbahan mitawag kaniya sa pag-adto og misyon, ug mipamatuod siya nga pinakalabing sayon “ang pagbuhat dihadiha dayon sa unsay gipabuhat kanato.”4 Ngadto sa lain nga grupo, si Eliza mitug-an nga siya wala mobati nga sarang sa pagpamulong. “Apan uban sa inyong hugot nga pagtuo ug mga pag-ampo ug sa espiritu sa Ginoo, ako tingali makasulti og butang nga makahupay ug makapanalangin kaninyo.”5 Nakat-on siya pinaagi sa kasinatian sa pagtinguha sa Espiritu nga naghimo kaniyang makapamulong uban sa gahum.
Si Eliza miawhag sa mga babaye sa pagpangita sa kaisug nga mobarug ug mopaambit sa ilang mga pagpamatuod: “Pinaagi sa pagsulti sa inyong labing maayong mga hunahuna kini molambo ug molig-on.”6 Dili lang nga siya mismo sa iyang kaugalingon nakat-on sa pagpamamulong uban sa katungod, apan siya mitudlo sa uban sa pag-atubang sa ilang mga kahadlok ug sa pag-abli sa ilang mga ba-ba.