Ministering Principles
Ministering to Those with Financial Challenges
How can we help when economic times are tough?
Paghulagway ni Allen Garns
Si Oh Jin Sook, usa ka sister sa Chum-dan Ward sa South Korea, nakasinati og malisud nga diborsyo human sa daghang katuigan sa kasakit. Sa tibuok panahon sa diborsyo, ang iyang tigpangalagad nga mga sister nagpabiling duol kaniya, nagtanyag sa ilang suporta. Ang presidente sa Relief Society ug ang bishop misugod sa pagtabang ni Sister Oh nga makapalambo og mga opsyon aron makabarug sa kinaugalingong paningkamot. Misugyot sila nga aron makaatiman siya sa iyang nag-una nga mga panginahanglan, sama sa pagkaon, mga sinina, kapuy-an, ug uban pa, tingali kinahanglan niya nga mobalhin sa mas gamay, mas barato nga balay.
Samtang nag-apil sa usa ka grupo sa pagbarug pinaagi sa kinaugalingong paningkamot [self-reliance group] sa pagsugod ug pagpalambo sa imong negosyo, si Sister Oh mikonsiderar sa paggamit sa iyang mga talento pinaagi sa pag-abli og usa ka beauty salon. Ang iyang mga lider ug tigpangalagad nga mga sister midasig ug misuporta kaniya samtang naningkamot siya sa pagsugod sa iyang salon.
Sa sinugdanan, ang mga kausaban daw bug-at gayud. Apan, si Sister Oh misalig sa Dios, naningkamot og maayo, ug sa katapusan miabli sa iyang kaugalingon nga salon gamit ang iyang gamay nga kwarta.
Sa sinugdanan, ang kinitaan dili igo aron isuporta sa iyang pamilya. Apan ang beauty salon mahinungdanon kaayo sa paghatag kaniya sa pagsalig ug kaisug nga masayud nga siya mahimong independente ug makabarug pinaagi sa kinaugalingong paningkamot.
Ang mga sister midala kaniya og mga pagkaon, mitawag kaniya aron mosulti og mga pulong sa kahupayan, ug nakigtambag kaniya sa iyang bag-ong negosyo, mahigugmaong nangalagad sa lain-laing mga pamaagi. Usa ka brother miimprinta ug miapud-apod og liboan ka mga pahibalo [fliers] aron mahibaloan ang iyang salon. Ang ubang mga miyembro sa ward mitabang sa iyang mga anak uban sa gugma, pakighigala, ug suporta.
Siya adunay dyutay nga kalibutanong mga kabtangan, apan siya mitaho nga kini nahimo nga labing malipayong panahon sa iyang kinabuhi. Ang tinubdan sa iyang kalipay mao ang iyang hugot nga pagtuo kang Jesukristo ug ang mga miyembro kinsa mipakita kaniya sa Kristohanong gugma. Bisan atol sa iyang mga pagsulay, gibati niya ang dakong gugma sa Ginoo alang kaniya pinaagi sa mga ehemplo ug pagpangalagad sa iyang ward nga pamilya [ward family].
Mga sugyot alang sa pagpangalagad ngadto niadtong kinsa adunay pinansyal nga mga hagit:
-
Magmahigugmaon ug dili mahusgahon. Magmanggihunahunaon sa mga pasidaan ni Hari Benjamin mahitungod sa paghusga sa mga tawo kinsa naglisud sa pinansyal (tan-awa sa Mosiah 4:17–19).
-
Ang Dios gusto nga mopanalangin kanato sa temporal ingon man usab sa espiritwal. Ang pagpakita og hugot nga pagtuo pinaagi sa pagbuhat sa mga butang sa Iyang paagi makausab sa atong kinabuhi ug niadtong naglibut kanato.
-
Sa inyong mga paningkamot sa pagpangalagad, pagmatngon sa dili pagbuhat alang kanila unsay ilang mahimo sa ilang kaugalingon o paghikaw sa mga oportunidad nga mahimong mas makabarug pinaagi sa kinaugalingong paningkamot.
-
Ang paghatag og kwarta dili ang tubag sa matag pinansyal nga problema. Kasagaran, ang gugma, o ubang mga buhat sa pagserbisyo mao ang mas makahuluganong mga solusyon. Sama pananglit, ang pagtanyag nga motabang og bantay sa mga bata o manglimpyo sa nataran makapadaginot sa mga galastuhan nga ibayad sa pag-atiman sa mga bata o pag-atiman sa nataran. Ang pagdapit kanila aron makigsalo og pagkaon makapadaginot sa mga galastuhan sa pagkaon. Agig dugang, ang personal nga pagpakigdait makatabang ug makaayo.
-
Sa inyong tinguha sa pagserbisyo, ikonsiderar ang inyong kaugalingong mga kahimtang sa panalapi. Ang Ginoo mopanalangin kanato sa atong pagsakripisyo aron makapanalangin sa uban, apan gitambagan kita nga dili mobuhat og labaw pa kay sa atong mahimo (tan-awa sa Mosiah 4:26–27). Ang pag-apil diha sa usa ka grupo sa Pagbarug Pinaagi sa Kinaugalingong Paningkamot aron mas makat-on mahitungod sa personal nga panalapi makapalambo sa inyong abilidad sa pagtabang sa uban.
-
Mahimong sensitibo, ug ayaw paglabang sa mga utlanan nga dili ninyo angay labangon pinaagi sa pagsulay sa pagpamugos sa inyong tabang sa uban, bisan unsa pa ka maayo ang intensyon. Tuguti sila nga moingon, “Dili, salamat,” kon mao kana ang ilang gibati nga labing maayo alang kanila.
-
Moserbisyo nga dili maglaum og pasalamat. Ang mga tawo dali ra kaayong mobati og pagkaubos ug kaulaw tungod sa pinansyal nga mga panglimbasug, diin mahimong lisud ang pagpahayag og pasalamat. Itanyag ang inyong gugma ug serbisyo nga walay pagpamugos. Usahay ang pagtabang nga dili magpaila mas mobayaw sa malumo nga mga pagbati sa uban.