Mga Sukaranan sa Ebanghelyo

Misulti ang Dios Kanato sa Pagpabunyag

Si Jesukristo mipakita og ehemplo sa pagpabunyag pinaagi sa usa ka tawo nga dunay awtoridad sa Dios.

Samtang kita walay daghang detalye mahitungod sa personal nga kinabuhi ni Jesukristo, kita nasayud nga Siya gibunyagan sa dihang nagpanuigon og mga 30 anyos (tan-awa sa Lucas 3:23). Ania ang pipila ka butang nga atong makat-unan mahitungod sa bunyag gikan sa Iyang ehemplo.

Alang sa Matag Tawo

Kon kita anaa na sa igong pangidaron ug kahingkod aron makahibalo sa kalainan tali sa husto ug sayop, ang Langitnong Amahan gusto nga kita mabunyagan (tan-awa sa Doktrina ug mga Pakigsaad 18:42). Si Jesus hingpit, apan Siya mipili gihapon sa pagpabunyag aron mosunod sa mga sugo sa Dios (tan-awa sa Mateo 3:13–17; 2 Nephi 31:7). Bisan kadtong namatay na makadawat sa bunyag. Gihalad nato kini ngadto kanila pinaagi sa pagpabunyag alang kanila diha sa mga templo. (Tan-awa sa Doktrina ug mga Pakigsaad 128:15–18.)

Gihimo pinaagi sa Awtoridad

Si Jesus wala magpabunyag ni bisan kinsa lang. Siya miadto gayud sa Iyang ig-agaw nga si Juan, kinsa adunay awtoridad sa pagkapari gikan sa Dios. Human namatay si Jesus ug ang iyang mga disipulo gipamatay, kana nga awtoridad sa pagkapari nawala gikan sa yuta. Dayon, niadtong 1829, si Juan Bautista mipakita kang Joseph Smith ug mihatag kaniya sa awtoridad sa pagbunyag sa ngalan sa Dios. Tungod niana nga pagpahiuli, kita adunay kahigayunan nga mabunyagan uban sa awtoridad karon.

Usa ka Pagsinaaray

Ang bunyag naglakip sa pagsinaaray, o pakigsaad tali kanato ug sa Dios. Kita mosaad:

1. Sa pagdala ngari sa atong kaugalingon sa ngalan ni Kristo.

2. Sa kanunay mohinumdom Kaniya.

3. Sa pagsunod sa Iyang mga sugo.

Agig balos, ang Dios nagsaad nga ang Iyang Espiritu kanunayng magauban kanato. Ang mga pulong sa mga pag-ampo sa sakramento nagpahinumdom kanato niining pakigsaad matag semana. (Tan-awa sa Doktrina ug mga Pakigsaad 20:77, 79.)

Ang Espiritu Santo Usa ka Importante nga Bahin sa Bunyag

Ang mga kasulatan nagsulti kanato nga human si Jesus gibunyagan, ang Espiritu Santo mipakita ingon sa usa ka salampati (tan-awa sa 2 Nephi 31:8). Karon, human ang usa ka tawo mabunyagan, sila kumpirmahan. Nagpasabut kini nga sila makadawat og usa ka espesyal nga panalangin diin sila gidapit sa pagdawat sa makalimpyo sa espiritu nga gasa sa Espiritu Santo (tan-awa sa 2 Nephi 31:17). Ang Espiritu Santo makapasidaan kanato kabahin sa kakuyaw, mohupay kanato, mogiya kanato sa paghimo og maayong mga desisyon, ug motabang kanato nga mobati sa gugma sa Dios (tan-awa sa Doktrina ug mga Pakigsaad 39: 6).

Kita Kanunayng Makahinulsol

Ang Dios nasayud nga makahimo kita og kasaypanan sa kada adlaw. Bisan pa sa atong pinakamaayong paningkamot, kita makasala ug mapakyas sa pagtuman sa mga butang nga atong gisaad sa bunyag. Busa naghatag Siya sa matag usa kanato og kahigayunan sa paghinulsol. (Tan-awa sa Doktrina ug mga Pakigsaad 18:13.) Sa matag adlaw mahimo natong buhaton ang atong labing maayo sa pagpangayo og pasaylo ug paghusto sa bisan unsa nga mga sayop. Mahimo kita nga mag-ampo ug mangayo og pasaylo sa Dios. Dayon, kon kita moambit sa sakramento uban sa mapainubsanon nga kasingkasing, makabaton kita sa Espiritu Santo diha kanato (tan-awa sa 3 Nephi 18:11).

Unsa ang Gisulti sa mga Kasulatan mahitungod sa Bunyag?

Ang mga ginikanan kinahanglan nga motabang sa ilang mga anak sa pagpangandam alang sa bunyag (tan-awa sa Doktrina ug mga Pakigsaad 68:25).

Kadtong mas bata pa kay sa otso anyos dili kinahanglan nga magpabunyag (tan-awa sa Moroni 8).

Sa dihang kita gibunyagan, misaad kita sa “pagbangutan uban niadto nga nagbangutan; … ug sa paghupay niadto nga nagkinahanglan sa kahupayan, ug mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9).

Mga Tabang alang sa mga Ginikanan

Kon kamo nagtabang sa usa ka bata nga mangandam sa pagpabunyag, tan-awa ang artikulo sa pahina 22.

Mga Pulong nga Hinumduman

Kami nanghinaut nga nalingaw kamo sa pagkat-on mahitungod sa bunyag. Ania ang laing mga pulong sa ebanghelyo gikan niini nga isyu:

Paghinulsol: Kon kita magpalayo sa sala ug mopili sa pagsunod hinoon sa Dios. (Tan-awa sa mga pahina 8, 10.)

Calling: Pinaagi sa inspirasyon, ang mga lider sa Simbahan mohangyo sa mga miyembro aron sa pagtabang sa usa ka nagpadayon nga buluhaton. (Tan-awa sa pahina 25.)

Tulo ka mga Saksi: Tulo ka mga tawo kinsa nakadungog sa tingog sa Dios ug nakakita sa bulawang mga palid nga gihubad ni Joseph Smith ngadto sa Basahon ni Mormon. (Tan-awa sa pahina 28.)

Diha Kaninyo nga Akong Kauban nga mga Sulugoon, ni Linda Curley Christensen