Sa Digital Lamang: Mga Young Adult
Pagpahiayon sa Kausaban human sa Akong Misyon
Ang kinabuhi tingali dili hingpit human sa usa ka misyon, apan makakaplag gihapon kita og kalipay ug katuyoan samtang magpadayon kita sa pagkahimong mga disipulo ni Jesukristo.
Ganahan ko sa akong misyon sa Colombia. Mao kadto ang pinakanindot nga bahin sa akong kinabuhi sukad. Ganahan ako sa mga tawo nga akong nahimamat ug niadtong akong natudloan. Ganahan usab ako sa akong mga kompanyon, ug nakakat-on ako og daghan gikan kanila! Maghunahuna ako bahin sa akong misyon matag adlaw.
Human makatapos sa akong pagbansay sulod sa missionary training center, nagtuo ko nga ako andam na sa akong misyon, apan may daghan pa diay ko nga angayang makat-unan sa natad sa misyon. Ug ang susamang butang nahitabo human nga ako nakatapos sa akong misyon—nagtuo ko nga nakat-unan na nako ang tanan nga akong gikinahanglang mahibaloan mahitungod sa kinabuhi. Nagtuo ko nga andam na ako alang sa tanang butang nga akong masinati sa kinabuhi human sa misyon. Nagtuo ko nga hingpit ra ang dagan sa tanang mga butang.
Apan, sama sa inyong gituhoan, dili diay.
Samtang didto ko sa akong misyon, ang akong iyaan nga si Cecilia miagi og operasyon, nasakit, ug namatay. Human sa pag-ampo mahitungod niini, ang akong mga ginikanan mihukom nga hulaton na lang ang pagsulti kanako mahitungod sa iyang kamatayon human ako mauli gikan sa misyon. Ang pagkahibalo sa iyang pagpanaw sakit kaayo kanako. Siya kanunay sukad kaniadto ang akong paborito nga iyaan, ug nasakitan kaayo ang akong kasingkasing nga wala ako sa balay aron makapanamilit.
Apan dili lang kana ang butang nga nausab samtang wala ako. Naglaum ako nga ang akong manghud nga lalaki moserbisyo og misyon samtang nagserbisyo ako sa akoa, apan nag-usab ang iyang hunahuna. Lisud kadto alang sa akong mga ginikanan, ug lisud usab kini ngari kanako.
Ug ang mga butang bahin sa akong mga higala dili na parehas kaniadto sa wala pa ko magmisyon. Kanunay nakong madapit ang akong mga higala nga dili miyembro sa pagsimba, apan sa dihang nauli na ko ug misugod na usab sa pagdapit kanila, lahi na kaayo ang ilang pagsanong. Dili sila gusto og bisan unsa bahin sa Simbahan. Wala ako kasiguro kon unsay nausab, apan padayon gihapon ko sa pag-ampo alang kanila ug mipaambit og espiritwal nga mga mensahe ngadto kanila. Apan sa tinuod akong gibati ang pag-inusara ug sama og wala na akoy mga higala.
Daghan pa kaayong mga butang ang nausab samtang wala ako, ug lisud ang pagpahiayon niadto nga mga kausaban human sa akong pag-uli.
Ang Kaimportante sa Pagserbisyo
Atol sa akong misyon, sa matag higayon nga ako mawad-an og kadasig o naghunahuna nga ako dili makapadayon, mag-ampo ko alang sa tabang. Mao nga nasayud ako nga ako makasalig na usab sa Langitnong Amahan sa pagtabang kanako nga makapahiayon niining bag-o nga kausaban sa kinabuhi.
Nakadawat ako og inspirasyon nga ako nagkinahanglang moserbisyo. Ang pagserbisyo kanunayng nakatabang kanako nga ako mobati nga ako adunay katuyoan. Miadto ko sa akong bishop ug misulti kaniya mahitungod sa akong tinguha nga moserbisyo. Iya akong gitawag nga mahimong sekretarya sa Young Women.
Pipila ka bulan ang milabay, gisultihan nako ang Langitnong Amahan nga gusto kong molambo ug makakat-on pa og dugang sa akong kinabuhi, ug mihangyo ako sa Iyang tabang. Sa pagkasunod gayud nga adlaw, gitawag ako isip ikaduhang magtatambag sa kapangulohan sa Primary sa stake.
Ang pagserbisyo kauban sa mga batan-ong babaye ug sa mga bata sa Primary nakatabang kaayo kanako nga ako makapahiayon sa akong kinabuhi human sa akong misyon. Akong nahimo ang pagtutok sa pagtabang kanila nga modangop sa Manluluwas imbis magtutok sa akong mga hagit. Paglabay sa panahon, ang pagpahiayon mas nagkasayon samtang naningkamot ako sa pagserbisyo.
Unsay akong Gituohan
Lain pang butang nga nakatabang kanako nga makapahiayon sa kinabuhi human sa misyon mao ang pagpaambit sa akong pagpamatuod sa matag higayon nga aduna akoy higayon. Usahay gani may oportunidad ako nga makapaambit sa akong mga gituohan atol sa mga presentasyon sa akong mga klase sa unibersidad.
Human nga ang akong propesor sa philosophy misangon kanako sa paghimo og presentasyon bahin sa hustisya ug kagawasan, gipasalida nako ang video nga gitawag og “Be Still, My Soul.” Ang video mahitungod sa usa ka babaye nga gidakop tungod sa abuso sa druga. Samtang didto siya sa bilanggoan, gimingaw siya sa iyang mga anak. Human siya moagi og rehabilitasyon, nauli siya sa balay nga usa ka bag-ong tawo.
Gitapos nako ang akong presentasyon pinaagi sa akong pagpamatuod. Miingon ko nga kitang tanan adunay hinatag sa Dios nga kabubut-on, apan Siya mihatag kanato og mga sugo aron matabangan kita sa pagsabut unsaon nga dili nato mapasakitan ang atong kaugalingon o ang uban. Mipamatuod usab ako nga Siya buhi.
Ang akong propesor wala mosupak sa tanan nga akong gisulti. Ug ang akong pagpamatuod nagbilin diha kanila og makapahunahuna nga pagbati. Akong nakat-unan nga wala kamo masayud nga dunay tawo nga tingali nagkinahanglan sa inyong panglantaw aron motuo nga ang Dios ug si Jesukristo anaa gayud.
Sa kinatibuk-an, ang padayon nga pagpaduol ngadto kang Jesukristo ug pagtabang sa uban nga moduol ngadto Kaniya nakatabang kanako nga mapahiuyon ngadto sa kinabuhi human sa akong misyon. Dili na ako usa ka full-time nga misyonaryo, apan makahimo gihapon ako sa pag-ampo, pagserbisyo, ug pagpamatuod sa katinuod sa ebanghelyo ni Jesukristo. Makatabang gihapon ako sa uban ug makahimo sa unsay akong gihimo sa akong misyon—lamang sa lahi nga paagi.
Ang pagpahiayon sa kinabuhi human sa usa ka misyon posibling lisud, apan sa gihapon makakaplag kita og kalipay ug katuyoan samtang kita mohinumdom unsay atong nakat-unan isip mga misyonaryo ug samtang magpadayon kita sa pagkahimong mga disipulo ni Jesukristo. Ang Langitnong Amahan motabang kanato nga molampus samtang maningkamot kita sa pagsunod Kaniya.