Mga Young Adult
Pagpadayon sa Unahan uban sa Paglaum atol sa Wala Damha nga mga Panahon
Kon kita mobati og kahadlok ug kawalay kasiguroan mahitungod sa pagpadayon sa kinabuhi, ang atong paglaum ug hugot nga pagtuo diha kang Kristo makabanwag sa dalan.
Walay usa nato ang nagdahum sa tibuok kalibutan nga epekto sa COVID-19 nga pandemya.
Daw ang tanang butang sa kalibutan gipahunong, ug tanan sulod sa walay kasiguroang kinutuban nga panahon, maoy hinungdan nga ang kawalay kasiguroan mipangitngit sa atong mga hunahuna mahitungod sa umaabut.
Miuli ko gikan sa akong misyon sa Arizona, USA, sa pagsugod pa lang gyud sa pandemya nga mikatap sa tibuok kalibutan. Atol sa katapusang mga semana sa akong misyon, ako adunay namugna nga panglantaw kon unsa akong ganahan sa akong kinabuhi sa higayon nga makabalik na ko sa panimalay. Mihimo ko og mga plano ug mga tumong ug nangandam na sa pagsugod! Nagplano ko nga moeskwela og nursing, magsugod og bag-ong kalingawan ug magkaplag og bag-ong mga higala, ug moangkon og daghan kaayong mga oportunidad nga moabut atol sa akong pagka-young adult. Mibati ko og kalinaw ug kasiguroan nga ang Dios naggiya kanako ug adunay dagkong mga butang nga giandam alang kanako human sa akong misyon.
Kana nausab sa wala madugay human ko miabut sa panimalay.
Sa tagsa-tagsa, ang akong mga plano nakanselar tungod sa COVID-19. Nagsugod ko sa pagpangutana ug pagduha-duha sa mga desisyon ug mga tumong nga akong gihimo. Mipili ko nga magsugod sa pagpangita og trabaho samtang naghulat sa online nga mga klase nga magsugod imbis mobalhin sa laing estado aron makasugod og eskwela sama sa una nakong giplano. Pagkataud-taud, mibati ko nga nawad-an ko sa akong katuyoan ug nag-usik og daghan kaayong panahon. Naanad ko nga kanunayng puno ang iskedyul isip usa ka misyonaryo, ug sa kalit lang mibati ko og kamingaw, kalaay, ug kawalay pulos.
Wala na ko maglantaw sa umaabut. Dili ko gusto nga moatubang niini nga matang sa pagkausab [transition] sa kinabuhi. Gusto kong mobalik sa panahon, nga mobalik sa karaan nga mga higala ug mga dapit nga nakapalipay kanako. Ang anaa kanako nga panglantaw ug mga plano alang sa akong kinabuhi nahanaw, ug mibati ko nga nainutil gumikan sa kangitngit, kahadlok, ug pagkawalay kadasig. Ako wala na mismo mobati sa akong kaugalingon. Bag-ohay lang nakong nahuman ang pinakanindot nga kasinatian sa pagserbisyo sa Ginoo sulod sa 18 ka bulan, apan karon mibati ko nga mas ubos pa sukad sa akong kinabuhi.
Naglibug ko kon nganong ang tanang butang natumpawak sa sayop ug asa naman ang gisaad nga panalangin sa Ginoo. Ang mga pasalig nga akong nabati sa katapusang mga semana sa akong misyon ingon og nahanaw na.
Dayon miabut ang kinatibuk-ang komperensya, ug ako nakaamgo nga ako nagkulang kaayo sa usa ka piho nga dapit sa akong kinabuhi—ang paglaum.
Si Elder Jeffrey R. Holland sa Korum sa Napulog Duha ka mga Apostoles mihatag og pakigpulong nga giulohan og “Usa Ka Hingpit nga Kahayag sa Paglaum” (Abril 2020 kinatibuk-ang komperensya), ug kini nahimong importante kaayo kanako. Nakaamgo ko nga tungod sa akong hugot nga pagtuo diha kang Kristo, ako makahimo ug kinahanglan molaum alang sa mas maayong mga butang nga moabut. Tungod kay si Kristo buhi ug sa kanunay nakigtambayayong sa akong kinabuhi, akong naamguhan nga ang akong umaabut mahimong sama ra ka puno og milagro ug buhong sa panalangin sama sa kagahapon.
Tungod kay ang Manluluwas mibati ug mibuntog sa tanang butang nga akong giatubang sukad, ako mahimong motuo, bisan pa man sa tanang rason sa dili pagtuo, nga ang mga butang moarang-arang—bisan kon ang akong mga plano usahay kalit lang nga mausab.
Nakaamgo ko nga kon gusto ko nga makaangkon og kalipay, kalampusan, ug katumanan sa kinabuhi, kinahanglan ko nga manggunit ug mopadayon sa unahan uban sa paglaum, bisan kon nag-atubang og kawalay kasiguroan. Sayon ra ang paghunong ug mahimong uyamot. Lisud pas-anon ang atong mga kasakit uban sa pailub ug sa pagsalig, sa dili matarug nga kasiguroan nga ang Dios ang nagdumala ug ang mga butang mas moarang-arang ra. Apan sama sa gitambag ni Presidente Thomas S. Monson (1927-2018) kanato, “Hinaut nga pilion nato ang mas lisud nga sakto, kay sa mas sayon nga sayop.”1
Salig nga ang Dios nagpalig-on kaninyo bisan kon kamo mobati nga nagkahagsa. Salig nga sa katapusan, ang tanan mamaayo ra tungod kay ang “tanan nga mga butang nagabuhat og maayo uban kanila nga nahigugma sa Dios” (Mga Taga-Roma 8:28).
Kon ang kangitngit nagpalibut kanato ug kita mobati og kahadlok ug kawalay kasiguroan mahitungod sa pagpadayon sa unahan niining mga dalan sa kinabuhi nga nag-angkon kanato, ang atong paglaum ug hugot nga pagtuo kang Kristo mobanwag sa dalan ug makapahimo kanato sa paghimo og bisan usa lang ka gamayng pagtikang sa pagpadayon sa unahan. Tungod Kaniya, posible nga kita makabaton og kalipay karon bisan kon ang atong mga kahimtang dili maoy atong gilauman.
Kon kamo makamatngon nga nahimutang taliwala sa mga pagkausab [transition] sa kinabuhi o sa mga butang nga ingon og dili mao sa unsay inyong gusto niini, hinumdumi nga ang Langitnong Amahan adunay plano alang kaninyo nga lagmit dili gani ninyo mahunahuna. Bisan og Siya daw hilum sa mga panahon usahay, Siya aktibo nga nakigtambayayong sa inyong kinabuhi. Nakita Niya ang katapusan gikan sa sinugdanan. Kon kamo mosalig Kaniya ug magpadayon sa unahan, nga nagbuhat sa inyong labing maayo sa inyong kasamtangang mga kahimtang, ang inyong kinabuhi mas moarang-arang nga walay kinutuban kay sa inyong mahunahuna.
Ayaw paghunong. Padayon sa pagpaningkamot bisan kon dili ninyo makita ang resulta sa inyong mga paningkamot ug ingon og walay pag-uswag nga nahitabo. Padayon bisan kon ang mga butang wala matuman sumala sa plano. Pangitaa ang mga impluwensya sa Ginoo diha sa inyong kinabuhi ug ilha ang Iyang kamaayo. Tinguhaa ang giya sa Espiritu uban sa katuyoan sa pagbuhat sa Iyang mga pulong. Buhata ang inyong labing maayo, bisan unsa pay kahimtang karon. Magpadayon sa paggunit. Padayon sa unahan. Ug padayon sa paglaum niana, uban sa Iyang giya, ang mga butang mamaayo ra.