Unsa Kaha Kon Wala Ko Moadto?
Ang kasinatian mipatik gayud diha sa akong hunahuna ug kalag sa rason nganong kinahanglan ko nga anaa niadtong gabhiona.
Hapit nako makombinser ang akong kaugalingon nga dili moadto niadtong gabhiona. Nasayud ko nga ang usa ka gabii sa paghinumdom makatabang nako nga makasugakod sa pagkawala sa akong inahan, apan nasayud usab ako nga kana nga gabii magdala og mga luha samtang nagpadayon ko nga nagsubo ug nagbangutan sa iyang pagkamatay.
Sa dihang nagkaduol ang oras alang sa gabii sa paghinumdom, nakaplagan nako ang akong kaugalingon nga nangandam sa pag-adto bisan pa sa bag-o pa lang nakong mga pagduhaduha. Nakahukom ko nga ang pagkaanaa didto maayo alang kanako.
Ang gabii sa paghinumdom, nga mipasidungog og pipila ka tawo kinsa bag-ohay lang namatay, gipahigayon sa nagdumala nga punerarya sa lubong sa akong inahan. Gawas sa direktor sa punerarya ug sa iyang pamilya, wala koy nailhan nga mga tawo didto sa lawak. Sa pagkagabii, gibasa ang matag ngalan sa tawo nga namatay, ug usa ka representante sa pamilya midagkot og gamayng kandila agi og paghinumdum niana nga tawo.
Human sa tulumanon, mibarug ko aron moadto sa mga matimo-timo. Kadtong mga naglingkod luyo kanako mibiya na tanan gawas sa usa ka masakiton nga babaye nga nakakonektar ngadto sa usa ka aparato sa pagginhawa nga naglingkod tupad sa iyang himan para sa paglakaw [walker]. Gibati nako ang iyang kasubo ug kasakit. Gibati usab nako nga kinahanglan nako siyang gakson.
Wala ko masayud kon unsay bation niya bahin sa usa ka estranghero nga moggakos kaniya, apan gisunod nako kining yano nga pag-aghat. Miduol ko kaniya uban sa akong mga bukton nga gituyhad. Mituyhad siya sa iyang mga bukton ngari kanako ug mibira kanako ngadto kaniya. Gihagkan niya ang akong mga aping ug miingon, “Salamat sa pagkahibalo nga nagkinahanglan ko og paggakus. Usa ikaw ka anghel.” Nag-istorya dayon kami sulod sa pipila ka gutlo.
Kini nga kasinatian mipatik gayud diha sa akong hunahuna ug kalag sa rason nganong kinahanglan ko nga anaa niadtong gabhiona. Duna ba kahay laing tawo nga mogakus niini nga babaye niadtong gabhiona kon wala pa ko miadto? Dili gayud ko makahibalo, apan nasayud ko nga giaghat ako sa paggakos kaniya, ug tungod kay kini akong gibuhat, kami parehong napanalanginan kaayo.