Unsa ang atong mahimo aron makasunod sa propeta?

Doktrina ug mga Pakigsaad 12–13 Joseph Smith—Kasaysayan 1:66–75

Pebrero 8–14

Si Joseph ug Polly Knight mituo sa propetikanhong tawag ni Joseph Smith gikan sa sinugdanan. Misuporta sila ni Joseph samtang naghubad siya sa bulawang mga palid, ug kauban sila sa unang mga nabunyagan.

Ang ilang mga kabtangan sa kasagaran gipangdaut, ug sila nawad-an og daghan nga mga higala, apan ang mga Knight mituo sa ebanghelyo ug mipahinungod sa ilang kinabuhi sa pagsunod sa propeta ug sa pagtukod sa Simbahan.

Usa ka Pagpadayag alang ni Joseph Knight

Niadtong 1829, si Joseph Smith nakadawat og pagpadayag mahitungod kon sa unsang paagi si Joseph Knight makatabang sa buhat sa Dios. Si Joseph Knight gisugo nga “maningkamot sa pagdala ug pagtukod sa kahimoan sa Zion” uban sa pagpaubos, gugma, hugot nga pagtuo, ug pagpugong sa kaugalingon (tan-awa sa Doktrina ug mga Pakigsaad 12:6–8). Sa unsang paagi nga kining mga kalidad makatabang kanato sa pagsunod sa propeta ug pagtabang sa buhat sa Dios?

Tibuok Kinabuhi nga Debosyon

Ang mga Knight wala gayud mawad-i sa ilang hugot nga pagtuo sa ebanghelyo ug makanunayon nga miunong ni Joseph Smith. Ang ilang kinabuhi usa ka pagpamatuod sa unsay ilang nahibaloan nga tinuod. Bahin ni Joseph Knight, si Propeta Joseph Smith miingon: “Siya nagmatinud-anon ug nagmatinuoron, ug gani makiangayon ug sulundon, ug mahiyason ug maloloy-on, wala gayud motipas ngadto sa tuo o sa wala. Tan-awa usa siya ka matarung nga tawo” (History of the Church, 5:124).

Paghulagway ni Dan Burr; litrato sa luna sa umahan sa pamilya nga Knight ni Kenneth Mays