Pagpangalagad ngadto Niadtong Mga Nabilanggo

Ni Marissa Widdison

Mga Magasin sa Simbahan

Ang bili sa kalag sa tawo dili mokunhod tungod sa krimen.

Karon mismo, kapin sa 10 ka milyon ka tawo ang gitanggong sa mga bilanggoan o mga prisohan sa tibuok kalibutan.¹ Si Jesukristo, kinsa nahigugma sa matag tawo ug nakasabut sa tanang kalisdanan, naghangyo kanato sa pagpangalagad sa tanang anak sa Langitnong Amahan—lakip niadtong mga nabilanggo. “Dayon motubag sa mga matarung kaniya, nag-ingon, Ginoo, kanus-a ba kami makakita kanimo … sa bilanggoan, ug miabut nganha kanimo?

“Ug kanila motubag ang Hari nga magaingon, Sa pagkatinuod, magaingon ako kaninyo, nga maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:37–40).

Unsaon nato sa paghimo sa unsay gisugo sa Manluluwas ug luwas nga mangalagad ngadto niadtong mga nabilanggo? Kini nga artikulo mohatag og sukaranang mga baruganan isip usa ka punto sa pagsugod. Mainampuong maghisgot uban sa mga lider sa Simbahan kon unsa ang tukma ug paagi nga maayo alang sa inyong dapit.

Isig ka Anak sa Dios

Samtang ang sistema sa kaangayan managlahi, ang hagit sa pagkabilanggo gipaambit sa mga kanasuran ug mga kultura. Si Doug Richens nagdumala og outreach [tabang] sa binilanggo nga mga miyembro sa Simbahan. Makigsabut usab siya sa ubang tinuohan ug sa mga pundok sa komunidad sa pagtabang niadtong naapektuhan sa pagkabilanggo, dili igsapayan sa ilang kaagi o relihiyuso nga mga panglantaw.

“Usa ka komon nga tatak niadtong kinsa nabilanggo mao nga tanan sila dili kasaligan, bayolente, ug peligro,” miingon si Brother Richens. “Bisan pa, akong nasayran nga ang kadaghanan dili ingon niana. Daghan ang mibati og kasubo sa ilang mga binuhatan. Naningkamot sila sa pagbuntog sa dili maayong mga pagpili sa nangagi ug magpuyo og maayong kinabuhi.”

Sa ubang mga nasud, mga katunga sa gidaghanon sa tanang lungsuranon adunay sakop sa pamilya nga nabilanggo.² Kining nabilanggo nga mga igsoon, mga ginikanan, ug mga anak—agi og dugang sa gihulagway sa bisan unsang yutan-ong relasyon—mga isig kaanak sa Dios.

Mortal ug Mahangturong Paghukom

Bisan tuod ang kinabuhi nagkinahanglan kanato sa paghimo og mga paghukom, ang Langitnong Amahan ug si Jesukristo mao lang ang bugtong makahukom sa tawo sa hingpit nga paagi basi sa ilang sitwasyon, mga buhat, ug mga tinguha (tan-awa sa 1 Samuel 16:7). Kana nga hingpit nga paghukom siguradong mohatag og konsiderasyon sa mga kahimtang sa mga tawo nga natawo diin ang pagkabilanggo may dakong kalagmitan, sama sa truma sa pamilya, kaliwatan nga kawad-on usa ka kultura nga pagkagumon sa paggamit og druga, ug uban pa. Daghan pang mga butang nga makaimpluwensya sa abilidad sa usa ka tawo sa paghimo og maayong mga pagpili, lakip sa ilang panglawas ug maayong kahimtang.³ Samtang importante sa katilingban ang pagpatuman sa mga balaod nga mapabiling luwas ang komunidad, makahimo kita niini uban sa kalooy ug sa mahangturong panglantaw, nga masayud nga daghan ang wala nato masabti.

“Hunahunaa kon unsa kahay inyong bation kon kamo gihukman alang sa tibuok ninyong kinabuhi base sa labing ngil-ad nga inyong nabuhat,” miingon si Tanja Schaffer, usa ka miyembro sa Simbahan kinsa nagtrabaho sa legal nga buhatan sa wala pa magtukod og usa ka pundok nga adbokasiya alang sa binilanggo. “Anaa ra sa Dios ang pagpasaylo niadtong Iyang pasayloon, apan Siya nagsugo kanato nga mopasaylo sa tanan” (tan-awa sa Mateo 18:21–22).

Ang baruganan kabahin sa hingpit nga paghukom sa Dios mahimo usab nga usa ka tinubdan sa kahupayan alang sa mga biktima sa krimen. Usahay ang mga tawo nga nagpasakit sa uban dili gayud mapahamtangan og silot dinhi sa yuta. Ang mga biktima mahimong mag-antus og dugay human ang termino sa pagkabilanggo sa nakasala natapos na. Daghang mga tawo nga naapektohan sa pagkabilanggo nahimong usa ka biktima ug usa ka suspek sa sala sa managlahing panahon, nagpahinumdom kanato nga ang kinabuhi usa ka komplikadong nagkanit nga mga relasyon ug mga desisyon nga makaapekto sa uban. Kita makakaplag og kahupayan sa pagsalig nga ang Langitnong Amahan ug si Jesukristo makasabut niining tanan. Ang Ilang paghukom hingpit. Ang pag-ayo nga Ilang gitanyag—alang sa inosente—ug mahinulsulon—hingpit (tan-awa sa Pinadayag 21:4).

Ang Mahigugmaong Ehemplo sa mga Lider

Si Elder Gerrit W. Gong sa Korum sa Napulog Duha ka mga Apostoles mihulagway sa usa ka miting diin ang tanan nga naglibut kaniya nagsinina og puti. Adunay pagpanganta ug pag-ampo, ug ang gugma sa Dios buhong.⁴ Sukwahi sa unsay lagmit naa sa atong hunahuna, kini dili usa ka miting sa templo. Kini usa ka pagbisita alang sa pagpangalagad sa usa ka bilanggoan diin puti nga mga jumpsuit ang sumbanan nga uniporme.

“Ang mga lider sa Simbahan naghunahuna sa tanan kinsa naapektuhan sa krimen ug pagkabilanggo,” mipamatuod si Brother Richens, nga naghulagway kon sa unsang paagi ang usa ka lider mihatag sa iyang kaugalingong kopya sa magasin sa Simbahan ngadto sa usa ka tawo nga iyang giduaw sa bilanggoan matag bulan. “Sila kanunayng miduaw sa binilanggo, misuporta sa ilang mga pamilya, ug malumong miamuma sa mga biktima.”

Ang mga pagpangalagad ngadto sa Correctional mga responsibilidad sa presidente sa stake, nga nakigtambayayong sa mga lider sa ward aron sa pagtubag sa mga panginahanglan niadtong anaa sa ilang dapit. Unsa ang gihimo sa inyong mga lider sa stake aron mapangalagaran ug mapaambit ang makapadasig nga mga mensahe sa nabilanggo nga mga miyembro? Sa ubang mga dapit, ang mga miyembro sa Simbahan mahimong tawagon aron moduaw ug magtudlo sa binilanggo nga mga tawo. Si Brother Richens miingon nga sa kasagaran kadtong mga miyembro nga gitawag sa paghatag og suporta mahadlok sa sinugdanan, apan dayon ilang masuta ang calling nga makahuluganon kaayo nga dili na sila gustong ma-release.

“[Kini] relihiyon nga putli,” siya miingon (tan-awa sa Santiago 1:27).

Samtang dili kita angay nga mobati nga napugos sa pagbisita sa mga tawo nga binilanggo nga dili nato kaila, adunay laing mga paagi nga kita luwas nga makapangalagad. Ania ang pipila:

Iapil ang mga tawo nga binilanggo diha sa inyong mga pag-ampo ilabi na si bisan kinsa nga inyong nailhan nga ngalan. Ang pag-ampo gamhanan!
Susiha sa lokal nga bilanggoan o mga prisohan kon nagkinahanglan ba sila og dinonar nga mga butang. Ang pagbasa, ang mga ginama sa kamot sama sa paggansilyo, mga proyekto sa art, ug pagsiksik sa family history gitugot diha sa daghang mga pasilidad.
Kon kamo nakaila og usa ka tawo nga nabilanggo, ikonsiderar ang pagsulat kanila og makapadasig nga mga sulat. Paghimo og luwas, maalamon nga mga pagpili samtang nakigsulti. Sunda ang Espiritu ug imentinar ang tukmang mga kinutuban.
Tagda ang mga sakop sa pamilya niadtong mga nabilanggo—ilabi na ang mga bata—uban sa gugma, pagtahud, ug pagkahilakip. Hinumdumi nga ang mga sakop sa pamilya sa kinatibuk-an mga inosenting biktima usab. Ang Espiritu Santo makatabang kanato nga masayud kon unsaon sa pagpangalagad sa labing maayo nga paagi ngadto sa tanang sakop sa pamilya.

Ang Espiritu Santo Dili Limitado

Ang pagkabilanggo mahimong usa ka kinalisuran nga panahon sa kinabuhi sa usa ka tawo. Apan ang Espiritu Santo dili limitado kutob sa paril, sa rehas, o sa mga kadena. Ang pag-ampo, pagtuon sa kasulatan, ug pagkamapainubsanon makadapit sa Iyang makapahupay nga presensya ingon ka dali sulod sa prisohan ingon man diha sa gawas. Tungod niini, ang prisohan mahimong usa ka dapit sa mga milagro.

Si Portia Louder, usa ka miyembro sa simbahan kinsa misulat og mga blog post samtang nabilanggo, mihulagway niini isip usa ka malisud nga panaw sa hugot nga pagtuo ug sa pagdiskobre sa kaugalingon. “Miagi ko og pipila ka mga grabe nga panlimbasug sa kinabuhi, apan makabatyag ako sa akong kaugalingon nga naayo pinaagi sa gugma nga dili mahulagway,” misulat siya gikan sa prisohan. “Bisan unsa pa nga hagit ang imong giatubang karon, bisan asa ka man sa imong kaugalingon nga panaw, palihug ayaw og hunong!”

Si Garff Cannon, kinsa miserbisyo isip presidente sa branch sa usa ka bilanggoan, mihulagway kon sa unsang paagi ang Espiritu miaghat kaniya sa pagpamulong sa mabinationg paagi ngadto sa usa ka tig-a og kasingkasing nga tawong binilanggo kinsa nakasinati og lisud nga kinabuhi. “Ang bag-o lang nimong gisulti ngari nako mao ang pinaka-mabination nga mga pulong nga gisulti ngari nako sa akong kinabuhi,” miingon kini nga tawo. “Wala ko nakahinumdom sukad nga nasultihan uban sa kamabination og pagkamaamumahon. Salamat.” Gitapos nila ang ilang pagduaw pinaagi sa pag-ampo nga pinakaunang nadungog niining tawhana sulod sa mga katuigan.

“Oo, ang Espiritu Santo anaa gayud sa mga pasilidad sa correctional,” mipamatuod si Brother Cannon. “Ang mga anak sa Dios tua didto, ug Siya gusto nga sila mahibalik.”

Ang Dios mihimo og gamhanang mga saad sa tanan kinsa mopili sa pagsunod Kaniya, bisan didto man nato unang nakat-unan ang mahitungod Kaniya sa Sunday School o sa prisohan. Sama sa giingon sa Ezequiel 36:26 , “Hatagan ko kamog bag-ong kasingkasing ug bag-ong espiritu.”

Ang Pagsulod og Balik sa Katilingban Mao ang Kinalisuran nga Hagit

Ang bili sa kalag sa usa ka tawo dili mokunhod tungod sa krimen (tan-awa sa Doktrina ug mga Pakigsaad 18:10). Kon ang usa ka tawo magtinguha nga mag-usab alang sa mas maayo, ato ba silang tugutan aron molambo ug mapasaylo?

“Ang grasya ug kamanggiloy-on sa Dios hilabihan ka dako,” miingon si Brother Richens. “Usahay ang binilanggo nga mga indibidwal mobati nga dugay nang napasaylo sa Ginoo sa wala pa sila mapasaylo sa gobyerno, katilingban, o gani sa pipila ka mga miyembro sa Simbahan.”

Lisud ang pagbalik sa katilingban human sa pagkabilanggo. Kadtong kinsa nabilanggo sa kasagaran maglisud sa pagpangita og trabaho o kapuy-an. Makatabang kita nila sa pagpangita og seguridad sa maanindot nga mga dapit ug makapadayon og himsog nga mga kalingawan. Tingali ang labing importanting butang nga atong mahimo mao ang pagkahimong positibo, makapalig-on nga higala. Sa dihang si Joseph Smith namulong mahitungod sa pagreporma sa prisohan dihang milansad sa pagka-presidente sa Estados Unidos, siya mitudlo nga “ang makaluyang paningkamot ug ang pagpalayo sa tawo dili gayud makahimo og dakong reporma sa mga tawong lagmit makahimo og dautan isip rason ug sa pagpakighigala.”⁵

Ang Kamanggiloy-on Makahimo og Kalainan

Si Judas miawhag sa mga Santos nga “tabangi kadtong nagaduhaduha” (Judas 1:22). Ang iyang mga pulong misubli sa pangamuyo sa Manluluwas sa paghinumdom niadtong mga anaa sa bilanggoan. Unsaon nato sa pagsanong niining mga imbitasyon? Paningkamotan nato ang pag-amuma niadtong kinsa nakasinati og pagkabilanggo—ug ang ilang mga pamilya—uban sa kaayo sa Dios. Ang atong kamanggiloy-on makahimo og kalainan.

Litrato sa mga rehas ni Peggy Marie Flores; litrato sa magtiayon naglakaw ni Nancy Ann Kirkpatrick; ubang mga litrato gikan sa Getty Images

Litrato sa hilo ni Auralie Jones