Ang Gasa sa Kapasayloan
Ni Elder Neil L. Andersen
Sa Korum sa Napulog Duha ka mga Apostoles
Ang Manluluwas nagbarug uban sa bukas nga mga bukton sa pagpasaylo sa tanan kinsa tinud-anay nga maghinulsol sa ilang mga sala ug moduol ngadto Kaniya.
Come Unto Me [Duol Ngari Kanako], ni Eva Koleva Timothy
Ang malungtarong kalipay ug hingpit nga kamaya moabut pinaagi sa hugot nga pagtuo diha sa atong Langitnong Amahan ug sa Iyang Anak, si Jesukristo. Ang tanan nga maayo ug matahum, ang tanan nga balaan ug sagrado, naggikan Kanila. Naglakip kana sa kapasayloan, nga mopalagsik sa atong kalag ug mokumpirmar sa atong kahimtang uban Kanila.
Sa atong kalibutan sa wala pa dinhi sa yuta, kita nalipay sa oportunidad nga moanhi sa yuta, makadawat og mortal nga lawas, ug mas mahisama sa atong Langitnong Amahan (tan-awa sa Job 38:4–7). Hinoon, nasayud kita, nga makasinati kita og kasagmuyo, sakit, kasakit, walay kaangayan, tintasyon, ug sala.
Kini nga mga hagit gilauman nga moabut sa plano sa katubsanan sa Amahan, ug Siya mitawag sa Iyang Bugtong Anak nga mahimong atong Manunubos ug Manluluwas. Si Jesukristo moanhi sa yuta nga walay makatupong, ug pinaagi sa Iyang pagkamatarung, Siya mobugto sa mga higot sa kamatayon. Samtang kita mopili sa pagsunod Kaniya ug maghinulsol sa atong mga sala, Siya mowagtang, pinaagi sa Iyang walay kinutuban nga Pag-ula, sa atong mga kasaypanan ug mga sala nga makita diha sa basahon sa kinabuhi.
Pag-ampo ug Hugot nga Pagtuo
Ang atong paghinulsol, sundan pinaagi sa pagpasaylo gikan sa Manluluwas sa kalibutan, mao ang pundasyon sa atong mga pag-ampo ug mga paningkamot aron makabalik ngadto sa atong langitnong panimalay. Alang sa matag usa kanato kinsa adunay hugot nga pagtuo diha ni Jesukristo, ang atong inadlaw nga mga pag-ampo, ang atong mga paningkamot sa pagsunod sa Manluluwas, ang atong kanunay nga pag-ambit sa sakramento samtang andam kita sa pagdala sa Iyang ngalan ngari kanato mohiusa sa atong tinguha sa pagsalikway sa mga pagbitad sa kalibutanong mga impuwensya ug sa hinay-hinay mas maduol ngadto sa atong Manluluwas.
Sama sa gipasabut ni Elder Neal A. Maxwell (1926–2004) sa Korum sa Napulog Duha ka mga Apostoles: “Kon mopili kita … sa dalan sa pagkadisipulo, kita … mobalhin gikan sa unsay tingali sinugdanan sa pag-ila lamang ni Jesus ngadto sa pagdayeg ni Jesus, dayon ngadto sa pagsimba ni Jesus, ug sa katapusan sa pagsunod ni Jesus. Niana nga proseso sa pagpaningkamot nga mahimong mas sama Kaniya … , kita kinahanglan nga anaa sa proseso sa paghinulsol.”1
Ang paghinulsol mahimong usa ka nagpadayong hunahuna, usa ka walay hunong nga paningkamot. Si Presidente Russell M. Nelson miingon:
“Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag-adlaw nga paghatag og gibug-aton sa paghinulsol. …
“… Sinatia ang makapalig-on nga gahum sa matag-adlaw nga paghinulsol––sa pagbuhat ug mahimong mas maayo matag adlaw.”2
Diha sa pag-ampo kita mosusi sa mga panghitabo sa adlaw, nga mangutana, “Diin nako nakita ang kamot sa Ginoo sa akong kinabuhi? Sa unsang paagi ang akong mga binuhatan nagpakita og pagkamatinuoron ug kawalay hinakog? Unsa pa unta ang akong nahimo? Unsa nga mga hunahuna ug mga emosyon ang gikinahanglan nakong kontrolahon? Sa unsang paagi kaha unta nga mas nasunod nako ang ehemplo sa Manluluwas? Sa unsang paagi kaha unta nga nahimo akong mas mabination, mas mahigugmaon, mas mapasayloon, ug mas maloloy-on ngadto sa uban? Sa unsang mga paagi nga ako nagkulang kay sa unsay gusto sa Langitnong Amahan nga akong maabut?”
Dayon mohunong ug maminaw kita. Ang atong personal nga mga pag-ampo mag-abli sa bintana sa personal nga pagpadayag gikan sa atong Langitnong Amahan.
Uban sa hugot nga pagtuo diha ni Jesukristo, bukas kitang moangkon ngadto sa atong Langitnong Amahan sa atong mga sayop, mga sipyat, ug sa dili mahunahunaong mga buhat ngadto sa uban. Mapainubsanon kitang mangayo og kapasayloan, maminaw sa hilom nga mga impresyon sa Espiritu, ug mosaad sa atong Langitnong Amahan nga mas maminaw kita sa mga butang nga atong mapalambo. Mokumpisal kita sa atong mga sala ug kita mobiya niini (tan-awa sa Doktrina ug mga Pakigsaad 58:43). Ipahiuli nato kana nga atong mapahiuli ngadto sa atong mga napasakitan o nasilo. Posible nga usa kini ka pagpangayo og pasaylo sa kapikas o anak, usa ka mensahe ngadto sa usa ka higala o kauban sa trabaho, o usa ka determinasyon sa pagsunod sa usa ka nataligam-an nga espirituhanong impresyon.
Ang atong pag-ambit sa sakramento ug ang atong kanunay nga pagtambong sa templo, kon mahimo, magpalambo ug maglig-on sa atong pagtuo diha ni Jesukristo ug sa atong tinguha sa pagsunod Kaniya.
Consider the Lilies [Palandonga ang mga Lirio], ni Eva Koleva Timothy
“Duol ngari Kanako”
Sa 3 Nephi, makahingangha ang kanunay nga pagsumpay sa nabanhaw nga Manluluwas nga si Jesukristo sa pulong nga “maghinulsol” ngadto sa mga pulong nga “moduol ngari kanako.”
“Maghinulsol sa inyong mga sala, ug moduol ngari kanako uban sa masulub-on nga kasingkasing ug mahinulsulon nga espiritu” (3 Nephi 12:19).
“Maghinulsol sa inyong mga sala, ug makabig. …
“… Kon kamo moduol ngari kanako kamo makaangkon og kinabuhi nga dayon. Tan-awa, ang akong bukton sa kalooy gitunol nganha kaninyo, ug kinsa kadto nga moduol Ako modawat kaniya; ug bulahan kadto kinsa moduol ngari kanako” (3 Nephi 9:13-14).
“Kinsa kadto nga maghinulsol ug moduol ngari kanako ingon sa usa ka gamay nga bata, kaniya Ako modawat. … Busa paghinulsol, ug duol ngari kanako kamo nga mga lumulupyo sa yuta, ug maluwas” (3 Nephi 9:22).
Si Jesus namulong usab niadtong kinsa, pinaagi sa pagpili o sa sirkumstansya, wala na nagtambong sa mga dapit nga kasimbahan. Siya miingon, “Ngadto kanila kamo magpadayon sa pag-alagad; kay kamo wala masayud apan kanus-a sila mobalik ug mohinulsol, ug moduol ngari kanako uban sa hingpit nga katuyoan sa kasingkasing, ug Ako moayo kanila” (3 Nephi 18:32).
Si Presidente Nelson mipahayag, “[Si] Jesukristo … nagbarug nga andam mogakus, malaumon ug andam nga moalim, mopasaylo, mohugas, mopalig-on, molimpyo, ug mobalaan kanato.”3
Kita, siyempre, gusto nga mobuhat sa tanan kutob sa atong mahimo. Ang atong pagbasol, ang atong determinasyon nga mag-usab, ug ang atong masulub-on nga kasingkasing, mahinulsulon nga espiritu, ug diosnon nga kasubo importante tanan. Kita magtinguha sa pag-usab sa atong kinaiya ug maghimo og pagbayad ngadto niadtong atong napasakitan.
For the Love of One [Alang sa Gugma sa Usa], ni Eva Koleva Timothy
Ang Kapasayloan Usa ka Gasa
Kinahanglan natong hinumduman, hinoon, nga ang balaanong gasa sa pagpasaylo dili gayud maangkon; kini madawat lamang. Oo, ang mga sugo kinahanglan nga sundon ug ang mga ordinansa buhaton aron makadawat og kapasayloan, apan ang personal nga paningkamot, bisan unsa ka dako, gamay ra kaayo kon itandi sa kantidad sa katubsanan. Sa pagkatinuod, walay ikakumpara.
Ang kapasayloan usa ka gasa, ug ang bugtong Tawo kinsa makahatag sa gasa mao ang Manunubos ug Manluluwas sa kalibutan, si Jesukristo (tan-awa sa Mga Taga-Roma 5:1–12 ug ilabi na sa 15–18; tan-awa usab sa Mga Taga-Roma 6:23; 2 Mga Taga-Corinto 9:15; Mga Taga-Efeso 2:8). Siya andam nga motanyag sa Iyang bililhong gasa ngadto sa tanan nga moduol ngadto Kaniya aron sa pagdawat niini (tan-awa sa Doktrina ug mga Pakigsaad 88:33).
Sama sa giingon ni Presidente Nelson, “Ang Pag-ula [sa Manluluwas] [makahimo] sa pagtubos sa matag kalag gikan sa mga silot sa personal nga kalapasan, sumala sa mga kondisyon nga Iyang [gi]takda.”4
Magmaya kita diha sa panaw! Ang atong Langitnong Amahan mihatag kanato niini nga mga pulong sa kamatuoran: “Kon kamo maghinulsol, ug dili magpatig-a sa inyong mga kasingkasing, busa Ako malooy diha kaninyo, pinaagi sa akong Bugtong Anak; … [ug kamo] makaangkon sa kalooy pinaagi sa akong Bugtong Anak, ngadto sa kapasayloan sa [inyong] mga sala; ug [kamo] makasulod ngadto sa akong kapahulayan” (Alma 12:33–34).
Isip usa sa mga Apostoles sa Ginoo, ako mosaad kaninyo nga kini nga mga pulong sa atong Amahan mga tinuod. Samtang kamo mohangop niini sa inyong kinabuhi, ang Manluluwas sa kahangturan mohulma sa balaan nga kapalaran nga naghulat kaninyo.