Mai, pe’e mai
Te fa’aro’ora’a i nā tuha’a hanahana e toru nō te taime mātāmua
Te Parau Ha’api’ira’a ’e te mau Parau Fafau 76
5–11 nō Tiurai
Fa’ahōho’ara’a nā Annie Henrie Nader
Tē ha’amāramarama nei te tuha’a 76 o Te Parau Ha’api’ira’a ’e te mau Parau Fafau i te mau tuha’a faufa’a rahi o te fa’anahora’a nō te fa’aorara’a tei mo’e mai ni’a atu i te fenua nā roto i te tāivara’a rahi. Nō te mau ta’ata e rave rahi, tē ha’api’ira’a mai i teie mau parau mau tei fa’aho’i-fa’ahou-hia mai nō te taime mātāmua, ’ua riro te reira ’ei ’ohipa fa’ahiahia roa. E ’ohipa teie i tupu nō Connie, e ta’ata fa’afāriuhia nō Richmond, Virginia, fenua Mārite.
Tē ha’amana’o ra ’oia ē : « ’Ua ’ite tāmau noa vau i te here o te Atua i te tai’ora’a i te Bibilia, ’aita rā vau i ’ite i te hō’ē ’Ēkālesia tei ha’api’i i te huru o tō’u ’itera’a i te reira. I te taime ’a fāri’i ai au i te ha’api’ira’a misiōnare nō ni’a i te fa’anahora’a nō te fa’aorara’a, ’ua ’ite au i te hō’ē ha’apāpūra’a ’e te hō’ē hau ’aita vau i ’ite a’e nei. ’Ua feruri au i roto iā’u iho, ’terā te Metua i te ao ra tā’u i ’ite’. ’Ua ’īriti rahi te ha’api’ira’a mai i te mau tuha’a o te hanahana i tō’u ferurira’a e ’aita e nehenehe iā’u ’ia tāpe’a i tō’u ’ana’anatae ’ia ’ite rahi atu ā ».
E ’utuāfare huru fifi tō Delphine, te hō’ē ta’ata fa’afāriuhia nō Paris, Farāni, nō reira te ha’api’ira’a te mau misiōnare iāna ē, e nehenehe te mau ’utuāfare e ora ’āmui i roto i te bāsileia tēretiēra, ’aita ’oia i pāpū e hina’aro ānei ’oia i te reira. ’A tāmau noa ai te mau misiōnare i te ha’api’i iāna nō ni’a i nā tuha’a e toru o te hanahana, ’ua tāmāhanahanahia ’oia. ’Ua ha’api’i mai ’oia ē e ti’a mai ’oia i pīha’i iho i te feiā tāna i here ’o tei mā’iti ’ia pe’e i te ’evanelia. Ma te māramarama maita’i a’e nō ni’a i te fa’anahora’a nō te fa’aorara’a, ’ua parau ’oia, « ’ua ’ite au e mea tano a’e te reira, ’e ’ua tāmarū te reira iā’u ».