Parau tumu nō te aupurura’a

Aupurura’a i te feiā tei roto i te mau tāmatara’a o te ea pae tino

E nehenehe tātou e riro ’ei rima nō te Fa’aora nō te tāmāhanahana ’e nō te tauturu.

E nehenehe te ma’i, te tōmea, te huma, ’aore rā, te matahiti e ha’afifi i te ti’ara’a o te hō’ē melo ’ia ha’amori ’aore rā, ’ia tāvini. Mai te mea e aroha te mau taea’e ’e te mau tuahine aupuru i teie mau hina’aro, e rave rahi rāve’a e vai ra nō te tauturu i te mau melo e mau tāmatara’a o te ea pae tino tō rātou nō te fāna’o maita’i a’e i te mau ha’amaita’ira’a o te ’evanelia.

I muri a’e i te ’itera’ahia ē, e māriri ’aita’ata tō te hō’ē metua vahine taure’are’a, ’ua tupu te mana’o vai ’ōtahi ’e te mata’u i roto iāna. Terā rā, ’a pārare ai te parau ’āpī nō tōna ma’i nā roto i tāna pāroita, ’aita i maoro ’ua hā’atihia ’oia i te here ’e te māna’ona’o o tōna mau hoa tuahine. I te ha’amatara’a o tōna mau rapa’āura’a fifi, ’ua fa’ahoro te mau tuahine iāna i tāna mau fārereira’a ’e ’ua pārahi i pīha’i iho iāna i te roara’a o te mau tuha’a rapa’āura’a. ’Ua pure rātou i pīha’i iho iāna, ’ua fa’aitoito iāna, ’ua āfa’i mai i te tahi mau mā’a tāna e nehenehe e ’amu, ’e ’ua hōpoi i te mau mā’a nā tōna ’utuāfare i terā ’e terā hepetoma. ’Ua hōro’a te tahi atu mau tuahine i tō rātou taime nō te tāmā i tōna fare, noa atu tā rātou mau ’ohipa. ’Ua ’ite te hō’ē tuahine ē, tē vai ra te tahi mau rapa’āura’a e ’ere i te mea ’ōhie ’ia ta’oto, nō reira, ’ua fa’anaho ’oia e haere i te maorora’a pō e fārerei iāna nō te māta’ita’i i te mau hōho’a teata. Maoti i te haerera’a i ni’a i te ro’i, ’ua ti’a i te metua vahine taure’are’a ’ia fāriu ’ē i te mau mata’u nō te tahi taime ’e ’ia ’ite mai i te mana fa’aora o te ’ata ’e te auhoara’a. Nā roto i teie mau aupurura’a, te mau ha’amaita’ira’a autahu’ara’a, ’e te mau ha’apaera’a mā’a a te pāroita, ’ua rātere ’oia nā roto i te hō’ē pu’e tau fifi roa, ’e ’ua tupu te mau tā’amura’a pa’ari o te here i rotopū i te mau ta’ata ato’a i roto i te reira ’ohipa.

E ’ere i te ’ohipa ’ōhie te aupurura’a i te mau taime ato’a i te feiā tei roto i te fifi nō te ea. E nehenehe rā tā tātou e pe’e i te hi’ora’a o te Fa’aora, nā roto i te torora’a i te rima i tō tātou mau taea’e ’e mau tuahine ma te here ’ia tupu ana’e mai te mau tāmatara’a i te pae nō te ’ē’a. E nehenehe tātou e riro ’ei mau rima nōna nō te tāmāhanahana ’e nō te tauturu i te feiā ’ati a’e ia tātou, tae noa atu i te feiā e’ita tō tātou mata tāhuti e ’ite ’ōhie noa i tō rātou mau fifi.

Mau mana’o e feruri

1. Fa’atura i tō rātou orara’a ’ōmo’e. E ha’amā te tahi mau ta’ata nō ni’a i te mau fifi i te pae nō te ea ’o tē ’ore ho’i e ha’afifi noa a’e ia ’outou. E ui tāmau noa e nehenehe ’ānei ’outou e fa’a’ite i tō rātou fifi ia vetahi ’ē hou ’outou ’a rave ai.

2. ’A fa’aitoito i te rapa’āura’a i fa’auehia. ’Eiaha e hōro’a i te mau rā’au ’aore rā, te mau ravera’a nō te ea ’aita i ha’apāpūhia ’aore rā, tei rāpae te reira i te rapa’aura’a i fa’auehia. ’A fa’a’ite i te mau mana’o ’e te mau ’itera’a mai te au i te fa’aurura’a, ’a fa’aitoito rā ia vetahi ’ē ’ia rave i tā rātou iho mau mā’imira’a ’e ’ia paraparau i te feiā ’aravihi nō te pae rapa’āura’a.

adult woman helps her mother put on clothing

3. ’A tāvini ia rātou ’e ’a pure nō rātou. ’Ia fārerei ana’e te ta’ata i te mau fifi i te pae nō te ea i te tahi taime, nō te tahi tau poto, ’aore rā, te mau fifi ’ite-ātea-hia mai te fānaura’a, ’aore rā, te tāpūra’a, nā tā ’outou ’ohipa tāvinira’a, te mau mā’a, te maita’i, ’e te mau pure, e fa’a’ite ē, tē māna’ona’o ra ’outou ia rātou. I roto i te hō’ē taime rū, e nehenehe tō ’outou hina’aro ’oi’oi ’ia tauturu e riro ’ei ’ohipa faufa’a rahi.

4. ’A tauturu ’ia fa’arava’i rātou ia rātou iho. I te taime iho ā rā e fa’aruru te ta’ata i te mau fifi teimaha ’aore rā, nō te hō’ē tau roa, i te pae nō te ea, e hina’aro rātou hau atu i tā ’outou tauturu ’aore rā, tāvinira’a, noa atu te fa’ahiahia o te reira mau tauturu tā ’outou. E hina’aro ato’a rātou i te tauturu nō te ha’api’i mai ’ia rave i te mau mea i muri nei nō rātou iho :

’A ’imi i tō rātou mau hina’aro. E aha tā rātou i ’ite nō ni’a i tō rātou huru ? E aha tō rātou mana’o nō ni’a i te reira ? E aha tō rātou mau ha’ape’ape’ara’a ’e te mau hina’aro nō te reira iho taime ’e nō a muri a’e ? ’A fa’aro’o ma te aroha ’e ma te ha’avā ’ore nō te tauturu ia rātou ’ia ’aro i te fifi mau ma te ti’a.
’A ha’amana’o i tō rātou mau pūai. ’A ani nō ni’a i te tahi atu mau huru ’ati tā rātou i fārerei a’e nei, ’e e aha tā rātou i ha’api’i mai i roto i te reira mau ’ohipa i tupu. ’A fa’a’ite i te mau huru maita’i, te mau mea faufa’a ’e te mau ’aravihi tā ’outou i ’ite i roto ia rātou. ’A ui e aha te mau maita’i e mea faufa’a a’e nō rātou ’ia ora i roto i teie tupura’a ’āpī. Nāhea e nehenehe ai ia rātou ’ia ora i te reira mau maita’i ?
’A hāmani i te hō’ē fa’anahora’a. E aha te mau fa’aotira’a e ti’a ’ia rave ’oi’oi, ’e e aha te tahi atu mau ha’amāramaramara’a tā rātou e hina’aro nō te rave i te reira mau fa’aotira’a ? E aha te tauturu ’aore rā, te mau rāve’a tauturu ’oi’oi tā rātou e hina’aro ra, ’e e aha tā rātou e hina’aro nō te tau roa ? E aha te mau fa’aotira’a tā rātou e ’ite nei ? E aha te mau maita’i ’e te mau ’ino o te tahi ’e te tahi ?
Fa’anaho i tā rātou pupu. ’O vai tē nehenehe e tauturu ? Nā te ’utuāfare iho te hōpoi’a mātāmua nō te tauturu, terā rā, te fēti’i, te mau hoa, te tahi atu mau melo o te pāroita, te feiā ’aravihi i te pae nō te ea, te mau rāve’a tauturu nā te huira’atira, ’outou ’e tō ’outou hoa, ’e te Vārua Maita’i, e nehenehe pauroa te reira e riro ’ei tuha’a nō tō rātou pupu. Mai te mea e nehenehe, ’e mai te au i tā rātou parau fa’ati’a, ’a fa’aō ato’a mai i te peresideni o te Sōtaiete Tauturu ’e te peresideni o te pupu peresibutero i roto i te ’ohipa tauturura’a ia rātou ’ia ’imi nāhea ’outou, te tahi atu mau melo, ’e te mau rāve’a tauturu a te ’Ēkālesia e nehenehe ai e tauturu mau.
Ani i te Vārua. ’A pure ’e o rātou ’e nō rātou, ma te ani i te Fatu ’ia ha’apāpū ’e ’ia arata’i i tā rātou mau fa’aotira’a ’e ’ia tauturu ia rātou ’ia ’ite i tōna here.