Mai, pe’e mai
Fa’aoroma’i i te pāto’ira’a
Te Parau Ha’api’ira’a ʼe te mau Parau Fafau 71–75
28 nō Tiunu–4 nō Tiurai
Faʼahōho’araʼa nā Dan Burr
Tē parau nei te heheura’a i roto i Te Parau Ha’api’ira’a ’e te mau Parau Fafau 71 ia Iosepha Semita ’e ia Sidney Rigdon ’ia haere ’e ’ia poro nā roto te hō’ē tauto’ora’a nō te tāmarū i te mau mana’o au ’ore tei tupu i ni’a i te ’Ēkālesia, nā roto i te mau fa’a’inora’a a te mau melo ’o tei mo’e tō rātou fa’aro’o. Hau atu i te 100 matahiti i muri mai, ’ua fāri’i ’o Elder Spencer W. Kimball nō te pupu nō te Tino ’Ahuru ma Piti ’āpōsetolo i te hō’ē ’ohipa i tupu i te porora’a nō te pāruru i te ’Ēkālesia.
Te tere o Elder Kimball i te fenua Ētuatōria
I roto i te hō’ē tere i Otavalo, i te fenua Ētuatōria, i te matahiti 1965, ’ua parau Elder Kimball i te mau misiōnare ’ia fa’a’ite i te Buka a Moromona i te feiā nō Otavalo. Teie nei rā, ’ua fārerei te mau misiōnare i te pāto’ira’a ’a ha’amata ai te mau ta’ata nō Otavalo i te ha’aparare i te mau ha’avare nō ni’a ia rātou i roto i te mau ’oire tāpiri mai, ’e e mea fifi nō te mau misiōnare ’ia fa’aoroma’i i te mau parau ha’avare.
E piti matahiti i muri mai, ’ua ’āmui atu ’o Elder Kimball i te tahi mau melo ’e te mau misiōnare i roto i te hō’ē rurura’a piri mai i te hō’ē vāhi tāpe’ara’a pere’o’o uta ta’ata. ’A pou mai ai te feiā nō reira nā ni’a mai i te mau pere’o’o uta ta’ata, e tītau manihini te mau misiōnare ia rātou ’ia fa’aro’o i te hō’ē ’āpōsetolo ora a Iesu Mesia. ’Aita i maoro roa, ’ua putuputu mai e 20 ta’ata. ’A ha’amata ai te mau misiōnare i tā rātou rurura’a, ’ua hau atu i te 100 ta’ata.
I muri iho, ’ua paraparau mai ’o Elder Kimball. ’Ua fa’ati’a ’oia nō te haerera’a mai Iesu Mesia i te fenua Amerika. ’Ua fa’atoro ’oia i te ra’i ’e ’ua parau nō te reo iti ha’iha’i nō te ra’i mai i te fa’aarara’a mai i te fāra’a o te Tamaiti a te Atua, mai tei ’itehia i roto i te Buka a Moromona. ’Ua ha’amana’o Elder Kimball ē, « ’ua pe’e te mau mata ato’a i tō’u fa’atorora’a i ni’a i te ra’i mai tē huru ra ē, tei reira iho ā te Fa’aora, nā roto mai i te mau ata rairai ».1
I muri mai i te reira, ’ua tāmau noa te mau misiōnare i te tāmata i te ha’api’i i te mau ta’ata nō Otavalo. ’Ua ha’api’i te mau tuahine misiōnare i te hō’ē ta’ata o Rafael Tabango tōna i’oa, tei bāpetizohia i te 14 nō Tiurai 1968—’o te ta’ata mo’a mātāmua nō te mau mahana hope’a nei nō Otavalo. ’Ua tomo ato’a mai tāna vahine fa’aipoipo, ’o Teresa i roto i te ’Ēkālesia. I raro mai e 15 matahiti i muri iho, ’ua fa’ati’ahia te hō’ē titi i Otavalo, ’e ’ua pi’ihia te taea’e Tabango ’ei pātereareha mātāmua.