Mānava ia ’oe i roto i teie ve’a

E nehenehe tātou e ti’aturi i te feiā mo’a i tahito ra

’Ei pāpa’i ’ā’amu nō te ’ōpuara’a pu’e parau a Iosepha Semita, e mea au roa nā’u ’ia hōro’a i te mau a’ora’a i te mau purera’a ’e ’ia paraparau i te mau melo o te ’Ēkālesia nō ni’a i te ’ā’amu o te ’Ēkālesia. ’A rave ai au i te reira, ’ua ’ite a’era vau ē, e mea fifi roa nō te tahi mau ta’ata ’ia ti’aturi i te feiā mo’a i tahito ra. E mea pinepine te mau vauvaura’a parau a teie mau ta’ata i te fa’atumu i ni’a i tō rātou huru itoito, mai te huru ē, ’aita roa atu rātou i fa’aruru i te fē’a’a, te ma’i ’aore rā, te hepohepo.

Terā rā, te mau melo o te ’Ēkālesia tei ora i roto i te mau matahiti 1800, ’aita rātou i iti atu ia tātou i teie mahana, i roto i te huru o te ta’ata. ’Ua fāri’i rātou i te ’oa’oa ’e te poupou, te ’oto ’e te māuiui—’e te mau mahana mātarohia, ma te fifi ’ore. ’Ua ha’api’i rahi mai au mai roto mai i tō rātou mau ’itera’a nō ni’a i te huru nō te rāterera’a i roto i te orara’a o te ta’ata nei.

Tē ti’aturi nei au ē, tā ’outou tuatāpapara’a i Te Parau Ha’api’ira’a ’e te mau Parau Fafau i teie matahiti, e tauturu te reira ia ’outou ’ia ’ite i te huru o tō te feiā mo’a i tahito ra āraira’a i te mau tāmatara’a o te orara’a. Maita’i ato’a ē, te parau pāpa’i nō ni’a i te huru o tō te hoa fa’aipoipo o Brigham Young, ’o Mary Ann, rāterera’a nā roto i te mau tāmatara’a, e patu te reira i tō ’outou fa’aro’o, ’e e tauturu ia ’outou ’ia ’ite ē, e nehenehe tātou e ti’aturi i te mau tāmatara’a tāna ’e tā vetahi ’ē i fa’aruru (hi’o ’api 32). Noa atu te mau ’arora’a ’e te mau ’oto, maoti te fa’aro’o ’o Mary Ann, ’ua ti’a iāna, mai tāna i pāpa’i atu i tāna tāne, ’ia vai « hau noa i roto i te roara’a o te vero ».

E rave rahi tā tātou e nehenehe e ’apo mai nā roto mai i te feiā tei reva nā mua atu—’eiaha nā roto noa i tō rātou mau ’itera’a temeio, nā roto ato’a mai rā i tō rātou itoito hau.

Matthew C. Godfrey

Tuha’a fa’atere nō te ’ā’amu ’o te ’Ēkālesia