TE MAU ’API NŌ PĀTIFITA
Te pe’era’a i te arata’ira’a a tō’u metua
E peu ’ārearea roa tā tō’u fēti’i. Nō te mau taime fa’afa’aeara’a ha’api’ira’a, te mau rurura’a, ’aore rā te mau taime ta’a ’ē, e mea au roa nā mātou ’ia rave i te poti o tō’u tonton nō te tere mai Tongatapu, te motu rahi nō Tonga, tae atu i te hō’ē motu nehenehe i rāpae tei parauhia ’o Pangaimotu. I reira, i te mahana tā’āto’a, e ha’uti mātou i te ha’uti pā’ira’a pōpō, te pātia poro, te kayak, e tāma’a ’e e hopu i te miti iho ā ïa.
’Ia tae mātou i Pangaimotu, e tūtau tō mātou poti i rāpae i te roto, ’e nā te hō’ē poti na’ina’i e tietie i te ta’ata pa’ari i te pae tahatai. Te mau tamari’i—tō’u mau vaitaea’e ’e te mau taea’e ’e te mau tuahine—’aita e tīa’ira’a i te poti tietie. E mea au a’e nā rātou e ’au mai te poti tae atu i te pae tahatai, ’e ’ia fa’aoti mātou i te ahiahi e ’au fa’ahou e tae atu i te poti.
I tō’u ’āpīra’a, ’ua hina’aro vau e haere nā muri ia rātou, terā rā, e mea fifi ri’i nō’u ’ia ’au nō te mea, e mea hōhonu te miti i pīha’i iho i tō mātou poti. E mea ri’ari’a nō’u ’ia ’ore tō’u ’āvae e ta’ahi i raro i te one—E mana’o roa vau ē, e haru te hō’ē mea i tō’u ’āvae nō te huti i raro. Ta’a ’ē atu i te reira, e mea huru ātea roa te pae tahatai i te poti ’ia hi’ohia. Nāhea pa’i mai te mea ē, e rohirohi au nā mua a’e ’a tae atu ai i reira ?
’Ua ’ite tō’u pāpā ē, e hina’aro rahi tō’u e ’au.
’A ha’amata ai te mahana i te topa i ni’a ia Pangaimotu, ’ua tuō mai ra ’oia iā’u. E tauturu ’oia iā’u nō te haere mai te pae tahatai haere i ni’a i te poti.
’Ua haere mai ’o pāpā nā muri iho iā’u nā te vāhi pāpa’u ē tae roa atu i te vāhi hōhonu. I te taime iho ā ’a ’ore ai au e ta’ahi fa’ahou i ni’a i te one, ’ua ri’ari’a vau ’e ’ua tāmata vau i te haru iāna, ’aita rā ’oia i fa’ati’a. Nō tō’u ’ino’ino, ’ua ta’i au, terā rā ’ua vai noa tō’u pāpā i pīha’i iho iā’u ’e ’ua fa’aitoito iā’u ’ia ’au noa.
I te hō’ē taime, noa atu tā’u fa’aha’utira’a i tō’u nā rima ’e te tā’iri’irira’a i te ’āvae, mai te huru ra ē, ’aita vau e tere ra. ’Ua rohirohi roa vau ! ’Ua parau marū noa mai tō’u pāpā e taui i tā’u huru ’au.
Nō tō’u ha’apa’o māite i tōna reo, i tō’u hutira’a aho ’e i tā’u ’au, ’aita vau i ha’apa’o noa a’e ē, ’ua tae māua i te poti—’oi’oi atu i tā’u i mana’o.
’Ua tupu i roto iā’u te ’oa’oa nō te ’ohipa i fa’aotihia i te ta’umara’a vau i ni’a i te poti, ’e i te ’itera’a vau ē, i roto i teie tere, ’a rōtahi noa ai au i ni’a i tā’u ’au ’e i ni’a i tō’u pāpā—’ua ’ore tō’u mata’u i te moana.
I te roara’a o te mau matahiti, ’ua ’au vau e rave rahi taime, haere ’e ho’i mai, ma te ri’ari’a ’ore. Te ’ohipa fifi roa i mūta’a ra, ’ua riro mai ïa i teienei ’ei ’ohipa ’ōhie roa.
Tē feruri nei au i te huru tā tō’u pāpā arata’ira’a iā’u i roto i tā’u ’aura’a manuia mātāmua i ni’a i te poti. E mea marū ’oia, e mea fati ’ore rā. ’Ua vaiiho ’oia iā’u ’ia tāmata iho i te fifi, ’ua fa’aea rā ’oia i pīha’i iho iā’u i te roara’a o te tere. I te tahi taime ’ua ri’ari’a vau ’e ’ua ta’i, terā rā ’ua tāmau noa ’oia i te fa’aitoito iā’u ma te fa’a’oroma’i ’e te here.
Mai taua taime ra, ’ua ha’api’i mai au ē, mai terā ri’i ato’a te ravera’a a te Metua i te ao ra. ’Ua ’ite ’oia ē, tei ni’a tātou i te fenua nei nō te ha’api’i, ’e, pinepine te reira i te tītau ia tātou ’ia haere mai i rāpae i tō tātou tūrotora’a. ’Ua ’ite ’oia ē, e rave rahi tō tātou mau tāmatara’a e riro ’ei mea fifi ’e te māuiui, ’e e tītauhia ia tātou iho ’ia rave i te reira nō te haere i mua, terā rā tei pīha’i iho noa ’oia ia tātou i te mau taime ato’a, nō te arata’i ’e nō te fa’aitoito ia tātou, ’e nō te tauturu ’ia huri i tō tātou paruparu ’ei pūai.
’Ia fa’a’oroma’i ana’e tātou i tō tātou mau tāmatara’a ma te ha’eha’a ’e te fa’aro’o, e nehenehe te reira e ha’afātata ia tātou i tō tātou Metua i te ao ra. E nehenehe te reira e ha’api’i ia tātou ’ia ti’aturi i tōna here hanahana ia tātou ’e i tōna hina’aro ’ia manuia tātou. Mai tā tō’u pāpā i rave i ni’a iā’u e rave rahi matahiti i ma’iri i Pangaimotu, e nehenehe te Metua i te ao ra e fa’ahōho’a ia tātou i tō tātou hōho’a maita’i a’e, ’e e tauturu ia tātou ’ia hau atu tā tātou e fa’atupu i tei noa’a ia tātou ana’e.