Avea ma se Tagata o le Feagaiga i se Nuu o le Feagaiga
Saunia e Elder Neil L. Andersen
O Le Korama a Aposetolo e Toasefululua
E suia i tatou pe a tatou taliaina ma tausia feagaiga ua ofoina mai e le Atua i Ana fanau taitoatasi.
Ina ua faalogo i le talalelei toefuataiina, na mulimuli ai ma le loto i ai Salote ma Morgan (itulau faafeagai) i le Faaola; totonu o le ata: O Salote i lona papatisoga. Lalo: O Salote ma Laurent a’o tafafao faamasani (totonu o le ata) ma i le la faamauga i le Malumalu o Bern Suitiselani i le 1995.
Pito i tua o le tusiata ma pito ma tulimanu o ata o Ata a le Getty.
Sa ou feiloai ia Regis Carlus mo le taimi muamua i le 1995 i Farani. E le auai o ia i le Ekalesia. O lona afafine, o Salote, sa faamauina ile Malumalu o Bern Suitiselani i le aso na sosoo ai, ma sa ia tusia, ma fesili mai pe mafai ona ia afea lo‘u ofisa e feiloai ia te a’u. Sa ia faalogo e masani ona ou fesili e uiga ia te ia, ma sa le mautonu o ia pe aisea.
Sa ou iloaina ma faamemelo i lana fanau talavou matutua e toalua, o Salote ma Morgan, o e na papatisoina i ni nai tausaga na muamua atu i le 1991 a o avea au ma peresitene o le Misiona a Farani Bordeaux. Ina ua uma ona matou feiloai ma Salote ma Morgan, sa ma maofa ma lo‘u toalua, o Kathy i lo la lelei.
Sa tusi mai Morgan ia te au talu ai nei e uiga i lona papatisoga ma le osia o feagaiga, ma fai mai: “Ae [ou te lei mauaina le talalelei], o au o se tagata e 18 tausaga le matua e le talitonu i se Atua, sa naunau mo le fiafia moni ae sa ou le iloa po o fea e maua ai. Sa matua pai mai le Agaga Paia i lo‘u loto ma ou te lei manao e faaita lo’u Tama Faalelagi ma Lona Alo, o Iesu Keriso. O le mafuaaga lena na ou tausia ai lou papatisoga ma feagaiga o le malumalu ma galue ai e avea ma se tasi e faamamaluina na feagaiga.”1
Mo Salote, o lana filifiliga e ola i se olaga e ogatusa ma le tulafono a le Atua na amataina a o lei auai i le Ekalesia. I le tele o tausaga mulimuli ane, na tau mai ai e lana tama teine o Amélie ia te au a o talavou Salote, “sa ese ona lagona mai ana uo. O ana uo sa inu ava malosi, ulaula, ma sa lei tausia le tulafono o le legavia, ae sa lei lagona e Salote le manao e faia soo se mea o nei mea.”
Po o a lava o la tulaga, ina ua oo mai le avanoa, sa filifili Morgan ma Salote e osia feagaiga ma le Alii ma ua suia ona o lena mea.
Ina ua maea o laua papatisoga, sa alu Salote i le Iunaite Setete mo se faailoga o le matuaofaiva i le gagana ma tusi faitau ma sa maua faaeega paia i le malumalu. Sa auauna Morgan i se misiona i Egelani.
Sa ou maofa i le naunau o nei tamaiti aoga e toalua i le kolisi e mulimuli i le Faaola. Ma sa ou faamoemoe e faalogo o le a mulimuli o laua matua i a laua faataitaiga.
Ina ua uma ona valaauina o se Pulega Aoao ma tofia e auauna atu i le Au Peresitene o le Eria a Europa/Metiteriane, sa ou mauaina le talosaga a le Susuga a Carlus e feiloai ma faamoemoe o le a ia mulimuli i lana fanau i le talalelei toefuataiina.
O Le Folafolaga a le Alii e Faapotopoto Lona Nuu
A o ou faatalitali e feiloai ma Mr. Carlus, sa ou mafaufau i le folafolaga a le Alii e “faapotopoto lea o [Isaraelu] mai itu e fa o le lalolagi” (3 Nifae 16:5) i aso e gata ai. O le a Ia faatuina se nuu o le feagaiga o e o le a “o mai i le malamalama o le atoatoaga o la‘u talalelei” (3 Nifae 16:12). I lo tatou tisipenisione, na Ia fetalai ai, “O le a tupu olaola Siona, … ma o le a avea o ia o se tagavai i le nuu, ma o le a o mai i fafo ia te ia tagata mai atunuu uma o i lalo o le lagi” (Mataupu Faavae ma Feagaiga 64:41–42).
A o i ai le siufofoga o le Alii i tagata uma (tagai Mataupu Faavae ma Feagaiga 1:4), na fetalai mai le Alii e faapea i aso e gata ai o le a “toaitiiti” Lona nuu o le feagaiga e faatatau i le faitau aofai atoa o le lalolagi ae “o le ekalesia a le Tamai Mamoe, o i latou ia o le au paia a le Atua, [o le a] i ai foi i latou i luga o le lalolagi atoa” (1 Nifae 14:12). O nei Au Paia, ua fusia i feagaiga i le Atua (tagai Mataupu Faavae ma Feagaiga 82:11), o le a tutu i nofoaga paia ma e le masii ese (tagai Mataupu Faavae ma Feagaiga 45:32) a o latou saunia mo le Afio Mai Faalua o le Faaola (tagai Mataupu Faavae ma Feagaiga 45:43–44).
Sa faamatala e Nifae tagata o le feagaiga o aso amulī: “Ma sa oo ina a’u vaai a‘u o Nifae, i le mana o le Tamai Mamoe a le Atua, ua alu ifo i luga o le au paia o le ekalesia a le Tamai Mamoe, ma luga o tagata o le feagaiga a le Alii, o e sa faataapeapeina i luga o le lalolagi atoa; ma sa faaauupegaina i latou i le amiotonu ma le mana o le Atua i le mamalu tele” (1 Nifae 14:14).
Ae paga lea, o le a i ai foi i latou “o e e le fia faalogo i le siufofoga o le Alii, po o le leo o ana auauna” (Mataupu Faavae ma Feagaiga 1:14).
Ua Teena se Valaaulia
A o avea le tama o Salote ma se tagata aoga i le iunivesite i le vaitau o le 1960, sa aoaoina o ia e faifeautalai i le talalelei. Sa tosina atu o ia i le Ekalesia toefuataiina ma lagonaina le mana o le Tusi a Mamona. Peitai, sa tonu ia te ia, o le auai i se lotu laitiiti, e faavae i Amerika o le a le fesoasoani i lana matata faalegaluega.
O lenei, a o ou faafeiloaia Mr. Carlus ma faafesuiai faafeiloaiga fiafia i lena aso i le 1995, sa ia fesili mai pe aisea na ou faaalia ai se fiafia ia te ia.
Ina ua uma ona ma tatalo faatasi ma ia, sa ou tau atu ia te ia o nai minute faatasi ma ia atonu ua na o le pau lea o le taimi i lenei olaga o le a ou vaai ai ia te ia. Sa ou faamalo atu ia te ia i lona afafine ma lona atalii ofoofogia ma fai atu ia te ia, sa ou faaaloalo tele ia te ia mo le tausia o se fanau amiotonu e toalua.
Ona ou talanoa atu lea ia te ia e uiga i faamoemoega o le Faaola i le toefuataiina mai o Lana talalelei i luga o le fogaeleele, o le matafaioi o le perisitua, o le taua o le aiga ma le mana o faamauga, ma le faapotopotoina o se nuu o le feagaiga i le lalolagi atoa.
Sa ou fai atu ia te ia, sa ou lagonaina ina ua aoaoina o ia e faifeautalai ao avea o se tagata aoga i le iunivesite, o lona faasinomaga amiotonu o le auai lea i tagata o le feagaiga o le Ekalesia. Sa ou fai atu ia e aua ne‘i tiga o ia a o ma faitauina ni fuaiupu se lua sa ou lagona e faatatau ia te ia.
Sa ma faitau faatasi i le Alema e uiga ia i latou “na valaauina ma saunia mai le faavaega o le lalolagi … ona o lo latou faatuatua tele ma galuega lelei; o le mea muamua i le tuuina atu o i latou e filifili i le lelei po o le leaga; o lea ina ua latou filifilia le lelei, ma faaaoga le faatuatua tele naua, ua valaaulia i latou i se valaauga paia … a‘o isi sa latou teena le Agaga o le Atua ona o le maaa o o latou loto ma le tauaso latou mafaufau, ae, a na leai lenei mea [ona sa latou i ai i le tulaga e tasi] po ua mafai foi ona latou maua se avanoa tele faapea e pei o o latou uso” (Alema 13:3–4).
Sa ou faasoa atu ma le faaaloalo ia Mr. Carlus ou te talitonu sa saunia o ia e faatasi ma i tatou, ma ina ua musu o ia ona o faatosinaga a le lalolagi, sa faaauau pea ona faamanuia o ia e le Alii i ni agaga filifilia se lua e avea ma ana fanau. Sa laua taliaina le ala o feagaiga sa faamoemoe mo lona aiga. Ona ou valaaulia lea o ia e talia le valaaulia na tuuina atu ia te ia i le 30 tausaga ua mavae.
Sa lei auai Regis Carlus i le Ekalesia i lenei olaga, ae sa filifilia e lana fanau le ala o feagaiga, ma sa laua tumau ai pea i luga o le ala.
O Se Molimau Malosi, o se Faatuatua Malosi
Luga i lalo: O Laurent ma Salote ma le la fanau muamua e toalua, o Amelie ma Valetine; i se savaliga sopi i Iuta; ma le la aiga i Rexburg, Idaho, ia Tesema 2008. Itulau faafeagai: O le aiga o Passe faatasi ai ma le tama o Salote o, Regis Carlus.
O le isi taimi na ma vaai ai ma lo‘u toalua ia Salote ma lona toalua, o Laurent, o le faaiuga o le 1998 i le Aai o Sate Leki, Iuta, lea na toe foi mai ai Salote i le Iunivesite o Iuta mo se PhD i tusitusiga faatusatusa.
Sa i ai Salote ma Laurent i luga o le ala o feagaiga, ae sa ma iloa ai sa utiuti a la tupe. Sa pupuni e Salote ma Laurent ni va i lo la fale mautotogi e taofi ai i fafo le ea malulu. Sa la faaofuina le la fanau e toatolu i ni ofu mafanafana ona sa laua le gafatia ona faamafanafana lo latou fale mautotogi. O le la tama teine o Valentine na fanau i le fale ona sa le mafai ona la gafatia se inisiua po o le falemai.
Sa faaauau pea luitau tautupe ina ua latou toe foi atu i Farani. Sa faigata [na maua] ni galuega lelei mo Salote ma Laurent. I se tasi taimi, sa fesili atu ai Salote i se uo po o le a le mea e tatau ona latou faia pe a leai ni a latou tupe e fafaga ai tamaiti ma totogi le sefuluai. Sa fautua mai lana uo, “Totogi muamua lau sefuluai, ma afai e te manaomia se meaai, alu e vaai le epikopo.”
Sa latou feagai foi ma isi luitau. Sa tetee le tina o Salote i lona papatisoga, lana faaipoipoga, ma ana filifiliga faaleagaga ina ua ia auai i le Ekalesia. Sa faaauau pea lenei tetee, ae sa faatuatuaina e Salote le Alii, faafaileleina lana molimau, ma tausia ana feagaiga.
I le 2008, sa valaaulia ai Salote e faatalanoa mo se tofiga i le Iunivesite a Polika Iaga i Idaho. I le Malumalu o Rexburg Idaho, sa ia lagonaina ai le uunaiga a le Alii e aumai lona aiga i le Iunaite Setete.
O le faaiuga e tuua Farani sa matuai faigata lava. O le oo mai i se aganuu fou i Rexburg sa luitauina foi. E ui o le toatele o tagata na talileleia ma fesoasoani i le aiga o Passe, e i ai taimi sa lagona ai e Salote e lei malamalama nisi pe aisea na ia faigaluega ai i le iunivesite ae le nofo i le fale ma lana fanau.
Ina ua faatuai le la tama teine o Amélie e auai i le Ekalesia, sa tau atu e Salote ia te ia: “Amélie, ou te alu i le lotu e tagofia le faamanatuga ma manatua a‘u feagaiga. O i latou [e le malamalama i o tatou tulaga] e le aafia ai la‘u molimau.”
Sa aoaoina e Salote lana fanau i le eseesega taua i le va o le Ekalesia (ma se E lapo’a) ma le ekalesia (ma se elaitiiti). Sa ia fai mai, “O le Ekalesia o le faatulagaga lea a le Alii faatasi ma Ana perofeta ma aposetolo. O le a le toilalo lava ia i tatou. O le ekalesia o tagata o le ekalesia, ma e leai se tasi o i tatou e atoatoa.”
Semanu e mafai e lona aiga ona filifili e le toe auai ona o nei luitau, ae sa iloa e Salote o le avea ma se vaega o se nuu o le feagaiga o lona uiga o le avea ma se tagata o le feagaiga—o se tasi e faamaoni i feagaiga na ia osia ma le Alii.
Agai Atu i Luma i le Ala o Feagaiga
A o ia faia le mea sili na te mafaia e avea ai ma se tina faasoloatoa, sa fesoasoani Salote i meaaoga ma le aoga i le fale a o siisii i luga le malamalama o Laurent i le faaPeretania. I se tasi o tusiga i le api talaaga, sa ia tusia ai, “Ua tele naua galuega, ma o le taumafai e tausia lo‘u fale ma lo’u aiga i le taimi lava e tasi ua avea ai o se avega tele.”
Ae sa ia agai i luma, ma tusia na ta‘u atu e le Agaga ia te ia i ana tatalo: “E tatau ona faaauau pea ona e galue. O le a le taofia i le taimi lava lena. Ia faaaoga lelei le tupe maua lelei e te maua e saunia ai oe lava ma lou aiga … mo le mea o le a oo mai.”
I le 2016, na iloa ai e Salote ua maua o ia i le kanesa o le susu. Faatasi ai ma togafitiga, na le toe i ai lona kanesa ae na toe foi mai i le 2019. Sa faaauau pea ona ia auauna atu ma faamalosia isi seia oo ina maliu o ia ia Aperila 2021, i le 50 o ona tausaga.
Na auai Salote i tagata o le feagaiga i le 20 o ona tausaga i Montpellier, Farani. Ma e ui o le a vave ona ia faapea mai na mamao lava o ia mai le atoatoa, ae sa ia faatauaina ana feagaiga ma tumau ai i luga o le ala o feagaiga mo le 30 tausaga na totoe o lona olaga.
I le taimi o lona tauiviga ma le kanesa, sa tusia ai e Salote i lana api talaaga: “Ou te matua faafetai lava, faafetai mo le Agaga Paia ma le tomai … e maua ai faaaliga faaletagata lava ia. Ou te le iloa le mea o le a ou faia i lo‘u olaga e aunoa ma lena mea. O le a ou leiloa.”
Ina ua ou faitau i ana upu, sa ou mafaufau i le fautuaga a Peresitene Russell M. Nelson ia i tatou uma lava i luga o le ala o feagaiga: “I aso a sau, o le a le mafai ona ola ai faaleagaga e aunoa ma le taiala, taitaiga, faamafanafanaga, ma le faatosinaga faifai pea a le Agaga Paia.”2
O Connie Ruesch Cosman sa avea ma se tamaitai faifeautalai i Farani a o ulufale atu Salote i le ala o feagaiga. Sa tumau pea le la faigauo, ma sa sau Connie mai Arisona e fesoasoani e tausi Salote i le lua vaiaso mulimuli o lona olaga faaletino. Na tusia e Sister Cosman: “Sa lei masalosalo lava Salote ma faia soo se mea e poloaiina ai o ia e le Alii. Sa ia saili mo ana lava tali ma mauaina. E faaauau pea ona avea o ia ma se faataitaiga maoae mo au ma isi.”
O le aso na sosoo ma le maliu o Salote, sa tusi mai ai lona tuagane, o Morgan, ia te au, “Ua matuai ou misia lava o ia; sa ma vavalalata lava.” Ona ia saunoa lea e uiga i se aafiaga faaleagaga na oo mai ia te ia i le po muamua ina ua maliu o ia.
“[Ou te iloa] ua sili atu lona fiafia nai lo se isi lava taimi,” na ia saunoa ai, ma faaopoopo mai o lona aafiaga faaleagaga “na faamautuina malosi ai mea ua uma ona ou iloa, ma sa faamaloloina ai lo‘u loto nutimomoia.”
Fanau o le Feagaiga
A tatou filifili e talia atoatoa feagaiga ua ofoina mai e le Atua i luga o le ala o feagaiga, e suia o tatou olaga. Na faatatau Alema i lo tatou “fanauina … faaleagaga i la le Atua”(Alema 5:14). Na ta‘ua e le Faaola lenei suiga o le “toe fanau” (Ioane 3:3). Ma sa Ia fetalai mai ua avea i tatou ma “fanau o le feagaiga” (3 Nifae 20:26). O le feagaiga lava lea e tasi na Ia osia ma Tama Aperaamo: “Ou te faatumauina foi la ta feagaiga ma oe, ma lau fanau, i a latou tupulaga, pe a mavae atu oe, e fai ma feagaiga e faavavau; ia fai a’u ma Atua ia te oe, ma au fanau pe a mavae atu oe” (Kenese 17:7).
I le avea ai ma fanau o le feagaiga, tatou te vaai ai i o tatou olaga e ala i le vaaiga o le fuafuaga a lo tatou Tama Faalelagi. Tatou te galulue ina ia usiusitai ma faateleina lo tatou faatuatua ia Iesu Keriso. Tatou te tatalo e le aunoa. Ua tatou iloa o tatou vaivaiga, ae ua ia i tatou le faamoemoe. Tatou te saili e faamuamua le Atua pe a tatou feagai ma o tatou luitau, ma e faaauau pea ona tatou salamo ma aua nei fiu ia tatou taumafaiga ia avea atili e faapei o le Faaola.
I le avea ai ma auauna a le Alii, ou te folafola atu o Lona alofa tunoa ma le agalelei o le a togiolaina i tatou a o tatou tausia lo tatou faatuatua ia te Ia ma faia le mea sili tatou te mafaia e tausia ai a tatou feagaiga ma Ia.