Mo Matua

Aoao Atu e uiga i Folafolaga a le Atua

Matua Pelē,

E mafai e i tatou taitoatasi ona faalatalata atili atu i le Atua a o tatou osifeagaiga ma Ia. O le lomiga o lenei masina e mafai ona fesoasoani ia te oe e aoao ai lau fanau e uiga i feagaiga na osia e le Atua ma Lona nuu i aso anamua faapea foi ma feagaiga tatou te osia ma Ia i aso nei. O manatu o loo i lalo e mafai ona fesoasoani ia te oe e faia ai ni talanoaga ma lau fanau e uiga i feagaiga ma le tumau malolosi i taimi faigata.

Talanoaga o le Talalelei

Avea ma se Nuu o le Feagaiga

Ina ia aoao atu manatu o loo i le “Gospel Basics” i le itulau e 10, e mafai ona e tusia se ala e tau atu i le lagi. Tuu ni maka i luga o le ala e faatusa i sauniga taua, e pei o le papatisoga, ma feagaiga e o faatasi ai tatou te osia. O le a se mea e mafai e lau fanau ona fai e saunia ai mo le isi a latou sauniga? E faapefea e le tausia o feagaiga ua uma ona tatou osia, ona saunia ai i tatou e osia ni feagaiga faaopoopo? E faapefea e a tatou folafolaga ma le Atua ona fesoasoani ia i tatou e latalata atu ai ia te Ia?

E mafai foi ona e faasoa atu ni mataupu faavae mai le tusiga a Elder Neil L. Andersen i le itulau e 6. O a faamanuiaga ma tiutetauave e oo mai i le avea ai ma se vaega o le nuu o le feagaiga a le Atua?

Fetaiai ma Luitau ma le Faatuatua

Faitau nisi o upusii mai le tusiga i le atiina ae o le maufetuunai (itulau 16). Valaaulia tagata o le aiga e faasoa mai se taimi na faamanuiaina ai i latou mo le tumau ai i se mea faigata. Ona talanoaina lea o fesili nei: Na faapefea ona fesoasoani le Atua ia te oe i lena taimi faigata? O le a se mea ua tatou aoao mai lenei tusiga e mafai ona fesoasoani ia i tatou e agai ai i luma pe a tatou tauivi, faia ni mea sese, pe toilalo? O le a se isi mea e mafai ona tatou faia e saunia ai o se aiga mo luitau e ono oo mai?

E mafai foi ona e faitau i le tusiga a Elder Ojediran o loo i le itulau e 42 e aoao ai e uiga i le i ai o “se loto momomo” (3 Nifae 9:20). E faapefea ona fesoasoani le lotomaualalo ia i tatou e faatoilalo ai o tatou luitau?

Lagolago mo le Sau, Mulimuli Mai ia te A’u

Tagai i itulau 46–48 e aoao atili ai e uiga i le vaa o Noa ma isi anomea e lagolago ai suesuega faalevaiaso o le Sau, Mulimuli Mai ia te A‘u a lou aiga.

Sau, Mulimuli Mai ia te A’u Mea Faafiafia a le Aiga

E Aumai e le Sefuluai le Lotofaafetai

I le Kenese 14:20, tatou te faitau ai na totogi e Aperaamo sefuluai. Na aoao mai Elder David A. Bednar e faapea o faamanuiaga faaleagaga “e sasaa mai e ala i pupuni o le lagi ma i o tatou olaga pe a tatou faamamaluina le tulafono o le sefuluai” (“O Pupuni o le Lagi,” Liahona, Nov. 2013, 18).

1. Ia talanoaina faatasi o se aiga ia faamanuiaga ua e vaaia mai le usitaia o le tulafono o le sefuluai.

2. Tuu atu i se tagata e toatasi e tusi i lalo ia faamanuiaga.

3. Ia toe tagai faatasi i le lisi ma talanoaina nisi o auala e mafai ai e nei faamanuiaga ona faaleleia atili lou olaga.

Na aoao mai foi Elder Bednar e faapea “o se faamanuiaga maaleale ae taua tatou te maua [a o tatou faamamaluina le tulafono o le sefuluai] o le meaalofa faaleagaga o le lotofaafetai lea e mafai ai ona tatou talisapaia mea ua tatou maua. … O se tagata lotofaafetai e mauoa i le lotomalie” (“O Pupuni o le Lagi,” 18). Na faapefea ona vaaia e lou aiga le lotofaafetai o se faamanuiaga o le totogiina o le sefuluai?

Na tuuina mai e Brenda Slade

O Manu a Noa—20 Fesili

Kenese 6–11; Mose 8

Na tuuina atu e le Alii ia Noa ni faatonuga patino e saunia ai o ia ma lona aiga mo le lolo o le a oo mai. “Na faia foi e Noa e tusa ma mea uma na poloai atu ai Ieova ia te ia” (Kenese 7:5). E ui ina sa leai se faamaoniga o timuga, ae sa faalogo Noa ma faapotopoto mai manu i totonu o le vaa.

1. Faamatala faapuupuu le tala ia Noa ma le vaa (tagai Kenese 6-8). Talanoaina pe na faapefea ona poloaiina Noa e fesoasoani i manu e ulu atu i le vaa (tagai Kenese 6:20; 7:14).

2. Ta‘u mai ituaiga o manu eseese atonu na aumaia e Noa i le vaa.

3. Ona fai lea o se taaloga o fesili e 20 ma lou aiga. Tuu atu i se tagata e mafaufau i se manu sa i luga o le vaa. E feauauai isi tagata uma e fai atu ni fesili ioe po o le leai e taumafai ai e mate ai le manu.

4. Faaauau pea ona fai atu fesili seia mate sa‘o e se tasi le manu pe seia oo ina fesiligia fesili e 20.

5. Toe fai le taaloga seia oo ina maua e tagata uma se avanoa e mafaufau ai i se manu.

Talanoaga: O a nisi o auala na faatino ai e Noa le faatuatua? O a nisi o mea ua finagalo le Alii tatou te faia? O le a faapefea ona faamanuiaina i tatou o ni aiga e ala i le mulimuli i aoaoga a Iesu Keriso?

Na tuuina mai e Lisa Thomas

Mai le Mekasini Mo Le Malosi o le Autalavou

“Ae a La’u Misiona?”

Ina ua ma’i Amoako, sa ia manatu o le a le mafai ona ia auauna atu i se misiona. Faitau e uiga i le vavega na ia oo i ai ina ua ma‘i tigaina sa le mafai ai ona savali o ia.

E le Afaina le Le Atoatoa!

O le a e le manuia i taimi uma i le olaga, ma e le afaina lea! Aoao e uiga i le eseesega i le va o le toilalo ma le avea ma [tagata] toilalo i le tusiga o le masina lenei Fesoasoani o le Olaga.

O Ai ia Peteriaka?

Na e iloa o le feagaiga na osia e le Atua ma peteriaka anamua o loo faatatau pea ia te oe i aso nei? Ia iloa po o ai peteriaka o le Feagaiga Tuai sa i ai i lenei tusiga.

Mai le Mekasini O Le Uo

E Mafai Ona Tatou Faia Mea Faigata!

Ua iloa e Tim e ui lava ina lelava o ia, ae e mafai ona ia faia ni mea faigata pe afai e taumafai pea o ia. Faitau le tala lenei e aoao ai lau tama e uiga i le maufetuuna‘i.

Sailiga o Oa o le Talafaasolopito o Aiga

Fesoasoani i lau tama e faamaea le lui o talafaasolopito o aiga i lenei masina.

Salamo ma Ki o le Lifi

I le Uo i le Uo o lenei masina, faitau se tala e uiga ia Elder Benjamin M. Z. Tai o le Fitugafulu ma le auala na ia aoao ai e uiga i le salamo a o tuputupu ae i Hong Kong o se tamaiitiiti .

Fesoasoani i le Sau, Mulimuli Mai Ia Te A’u

Faitau le tala ia Aperaamo ma Sara e aoao ai lau tama e uiga i folafolaga a le Atua. Ia saili foi se gaoioiga faaleaiga e mafai ona e faia mo vaiaso taitasi o le Sau, Mulimuli Mai ia te A‘u.

Auala Tatou te O Ai i le Lotu

Aoao pe faapefea e Tamaiti o le Peraimeri i le lalolagi atoa ona o i le lotu.