E Na‘o le Tusiga Faatekinolosi: Atatosi o le Faatuatua
Na Toe Aumaia Au e le Auaunaga
O le toe foi mai i le lotu na ou maua ai le filemu ma faaali mai ia te a’u le mea moni e taua i le olaga.
Ata na pueina e Leslie Nilsson
O lo‘u faiaoga o aiga o Val Riggs sa avea ma o matou epikopo ma mulimuli ane o le matou peresitene o le siteki. Sa ia taitaia le inisitituti o mataupu faalelotu i le lotoifale. Sa sauni o ia e litaea ma toe foi atu i lona aiga i Iuta, ISA, ae sa ia fai mai ia te a’u o le a le alu o ia seia uma ona ou faaipoipo i le malumalu.
“Ia, o le a e i ai iinei e faavavau,” sa ou fai atu ai ia te ia. “Ou te le iloa pe o le a tupu lena mea.”
“Oi, ioe, o le a tupu,” o lana tali lea.
Sa faatuatua o ia ia te a‘u ma sa le fiu lava ia te a’u. Na te valaau mai foi ia te a’u a o o’u faigaluega. Ou te faapea atu, “Peresitene, o loo o’u i luga o le ea!” Ma na te faapea mai, “O loo faia e lo‘u toalua ni kuki. Ma te o atu nanei!”
Sa nofo o ia i Baton Rouge i lo‘u toe foi atu i le lotu ma vaaia lo’u tuputupu a’e faaleagaga. Ina ua pa’ū le tamaoaiga i le 2008, o ia le tagata muamua na ou valaau i ai.
“Peresitene Riggs,” sa ou fai atu ai, “Ua leai sa’u galuega i le ofisa o le leitio!”
“Lelei tele,” o lana tali lea.
“Lelei tele?” Sa ou tali atu.
“O le a lelei mea uma mo oe,” na ia fai mai ai ia te a’u.
Ina ua ou valaau atu i lo‘u faiaoga asiasi, sa ia fai mai foi, “Lelei tele!”
Aisea na latou fiafia ai ona ua leai sa‘u galuega? Aua soo se taimi lava latou te talanoa mai ai ia te a’u, na latou lagonaina a‘u tauiviga. Sa tasi lo’u vae na tu i totonu o le Ekalesia ma le tasi i le lalolagi. O le leai o la‘u galuega na avea o se faamanuiaga sili. Sa fesoasoani ia te a’u e tutū uma ai vae i le Ekalesia.
Sa ou le toaga. Sa ou i ai i se mafutaga sauaina. Sa matuai faigata lava ia te a’u o se tagata talavou. Sa ou tatalo mo lo‘u olaga ma taumafai e pipiimau pea.
E fai mai tagata, “Oi, e te feiloai i tagata lauiloa, e te faimalaga solo, e te faia lenei mea, e te faia lena mea.” Ae sa le o le filemu lena. Sa le o le manuia lena mea.
O le filemu o le Faaola e le pei o se isi lava. O le toe foi mai i le lotu o le mea lea na aumaia ia te a’u le filemu. O le faaipoipo i le malumalu o le manuia lea. O le i ai o se aiga e faavavau o le ola lea.
O Le Fuafuaga a le Alii
A i ai se fuafuaga a le Alii, e i ai Sana fuafuaga, e ui atonu e le o lau fuafuaga lea. Ina ua leai sa‘u galuega, sa amata ona pupula o’u mata ma na suia mea uma mo a‘u. Sa nofo pea Peresitene Riggs, ma sa ia vaaia lo‘u tuputupu a’e. E matuai malosi lava la‘u molimau i le auaunaga. E taua le le fiu i se tasi. O le auaunaga o le mea lea na toe aumaia ai a’u.
Sa ou feiloai i lo‘u toalua, o Dustin, i se konaseti a Gladys Knight ina ua sau o ia i lalo ma lana aufaipese. O ia ma ona matua o ni faataitaiga sili ia mo a’u. Sa latou fesoasoani ia te a‘u ia maua se molimau sili atu, ma sa fesoasoani lo’u tina faaletulafono e suia a‘u i le tagata ua ou i ai nei. O ia ma lo‘u tina o lo’u malosiaga. Na sa‘o lava Peresitene Riggs: sa taunuu la’u faaipoipoga i le malumalu—i le 2009 i le Malumalu o Baton Rouge Louisiana.
O le taimi nei, ua ou faatautaia ai la‘u lava faalapotopotoga e le maua ni polofiti mo teineiti laiti. Sa avea a’u ma peresitene o Tamaitai Talavou, ma sa ou aumaia meafaigaluega ma le faatulagaga ma mea uma matou te aoaoina i le lotu i la‘u faalapotopotoga. Ou te tuu atu i le Alii e taitai ma taiala.
O teineiti i la‘u faalapotopotoga e faamanatu mai ia te a’u ia a’u lava ia o se tagata talavou—tau lava o le taumafai e saili lo latou ala i le olaga. E atamamai, talenia, ma o loo taumafai pea e tuputupu a’e. E mafai ona ou fesootai atoatoa ia i latou. Ou te malamalama i mea latou te fai mai ai. Atonu o le mafuaaga lena sa ou galue ai i le pisinisi siva osooso.
O tausaga uma e faia ai se tasi o konafesi aupito tele a le autalavou i la matou eria mo teine. Matou te aumaia failauga, ma ou te faaaogaina a’u sootaga e aumai ai tagata lauiloa. E silia ma le 800 teineiti e auai. E faia a matou lesona musuia, ma e matou te tuuina atu i teineiti le alofa ma le taitaiga i le faia o filifiliga faatuatuaina.
Ou te taumafai e taiala nei tamaitai talavou i le alofa faaKeriso. Ou te iloa o latou luitau. Matou te talie faatasi, matou te fetagisi faatasi, ma matou auauna faatasi i le alalafaga. Ou te faasoa atu tala e uiga i lo‘u olaga.
“Aua nei faia mea sese sa ou faia,” ou te fai atu ai ia i latou. “Ou te iloa le mea o loo feagai ma oe, ae faatasi ai ma le faatuatua, tatalo, alofa, ma le taitaiga faaleagaga, e mafai ai ona e manumalo i le lalolagi.”