Sa Ou Taumafai Pea
O se tasi sa ou uunaia ma faamalosiauina lenei ua uunaia ma faamalosia au.
Ata na saunia e le tusitala; o ata o āū mai le Getty Images
I le 1972, sa ou i ai i le tolauapiga e toleni ai le Neivi a le IS i San Diego, Kalefonia, ISA. Sa “faafoi i tua,” au o lona uiga ua le manuia lau aoaoga faamasani—faaletagata lava ia ma faalauaitele. O le mea moni, sa faalua ona faafoi i tua a‘u. O lea la ua tatau ona ou toe amata i se kamupani fou.
Sa ou pagatia i le le gauai lelei/o le feminoiai i taimi uma [attention deficit/hyperactivity disorder] (ADHD) ma le maualuga o le tulaga i le tautala ma le ola tutoatasi [high-functioning autism]. Sa faigata le faitautusi mo a‘u, lea na leaga ai o’u togi. Ma na atili ona faigata, ona na maliu lo’u tama a o ou i ai i le tolauapiga.
Na pau lava le mea na ou maua ai se lagona lelei o le auai i le lotu. I se tasi Aso Sa, i le ogatotonu o le tuuina atu o la‘u molimau, sa ou lagonaina le uunaiga a le Agaga Paia. O upu na ou tautala atu ai i lena taimi sa le o ni a’u upu. Sa oo mai ia te a‘u le leo filemu ma le itiiti i se musumusu, ma taitaiina a’u i le mea ou te fai atu ai.
“O loo outou vaai mai i se fitafita tau’amata na faalua ona faafoi i tua,” sa ou fai atu ai. “E leai se tasi e manao e toilalo, ma e leai se tasi e manao e sosoo ona toilalo faalua. Ae o le faafoi i tua e le leaga tele. E le o taumafai le neivi e aoai pe faasalaina i tatou. O le faafoi i tua e fesoasoani lea i se fitafita tauamata e aoaoina mea na te lei aoaoina pe atonu foi ua galo. E le mafai ona i ai se faauuga e aunoa ma le suia po o le faaleleia. Ou te tuuina atu la‘u molimau e tatau ona faafoi i tua tatou uma a o lei mafai ona tatou faaauau atu i o tatou ausiaga silisili ma manuia i le olaga.”
Ou te lei mafaufau tele e uiga i le mea na ou fai atu ai seia oo i se masina mulimuli ane. I le taimi o le isi a matou sauniga anapogi ma molimau, sa oo mai ai i le pulelaa se fitafita tauamata lauulu enaena.
“O le masina ua te‘a sa ou le ausiaina o’u togi. Sa ou toilalo,” o lana tala lea. “Sa fai mai le taitai o la‘u vaega’au o le a sili mo a’u pe afai e faafoi au i tua. I la‘u vaega’au fou, sa ou mafaufau ai ia te a’u lava ia o se toilalo. Sa ou sauni e togi le solo. Ona ou manatuaina lea o le alii sa faalua ona faafoi i tua ma le mea na ia fai mai ai. O lea sa ou taumafai ai pea.”
Ona toe ta‘u mai lea e le fitafita tauamata ia upu lava e tasi na tuu mai e le Agaga Paia i lo’u mafaufau. O se tasi sa ou uunaia ma faamalosiauina lenei ua uunaia ma faamalosia au.
Ia Oketopa 1972, sa ou olioli ai ina ua ou faauu mai le Aoga a le Neivi a IS, faafetai mo le faagaeetiaina ma le faamalosiauga mai le Agaga Paia ma mai se uso a fitafita tauamata pei o au.
Ou te faafetai mo musumusuga a le Agaga a o ou tauivi i totonu o le tolauapiga a le Neivi.
Ata na saunia e le tusitala; o ata o āū mai le Getty Images