Sau, Mulimuli Mai ia te A’u
Ositaulaga, o se Fua o le Amiotonu
Saunia e Elder Adeyinka A. Ojediran
O Le Fitugafulu
O le faataitaiga a Aperaamo ua aoao ai i tatou e faapea a tatou faamuamua le Alii, e mulimuli mai faamanuiaga.
Aperaamo ma Isaako, saunia e Harold Copping, Look and Learn/ Bridgeman Images; gold boarder from Getty
A o avea au ma se peresitene o le paranesi i Nigeria, sa faaalia e se tuafafine talavou o se tagata liliu mai lona manao e auauna atu i se misiona. O lona tama, e le o se tagata o Le Ekalesia a Iesu Keriso o le Au Paia o Aso e Gata Ai, sa matuai le ioeina lava lana fuafuaga. Sa talanoaina e le matou aufono a le paranesi lea tulaga. Sa tonu ia i matou o le a talafeagai mo le au peresitene o le paranesi ona asiasi atu i lona tama.
Sa lei manuia muamua le asiasiga seia oo ina musuia au e faasoa atu i lona tama le tala i le naunau o Aperaamo e ositaulaga lona atalii o Isaako, e pei ona faamatalaina i le Kenese mataupu e 22. O Aperaamo o se faataitaiga o le talitonu ma le faatuatua i le Atua. E ui lava o Isaako o le atalii e toatasi o Aperaamo ma Sara, na fanau ina ua matutua uma i laua, ina ua talosagaina e le Alii se osigataulaga sa usitaia ma le loto i ai e Aperaamo.
A o sauni Aperaamo e osi le taulaga i lona atalii, sa faauilavea se agelu. “Soia le oo lou lima i le tama,” na ia fai atu ai, “aua foi e te fai se mea e tasi ia te ia: aua ua ou iloa nei ua e mata‘u i le Atua, ina ua e le taofia lou atalii, o lou atalii e toatasi, a ua e tuu mai ia te au” (Kenese 22:12). O le upu mata‘u i lena fuaiupu o lona uiga “ia lagona le migao ma le maofa mo [le Atua] ma ia usitai i Ana poloaiga.”1
O se Loto ua Faamaluluina
Sa ootia le tamā i lenei faamanatu o le usiusitai o Aperaamo. Sa ia fai mai na te lei mafaufauina lava e mafai ona talosagaina o ia e faia se mea talitutusa, e ui e le tutusa le taua. Sa ia taliaina e auauna atu lona afafine ma lagolagoina o ia i mea tautupe mo le 18 masina.
Sa auauna le tuafafine ma le mamalu. Ina ua foi mai o ia, sa faaipoipo o ia i se alii i le paranesi lava lea e tasi. O loo laua auauna atu pea ma le faamaoni i le Ekalesia ma maua se fanau e toatolu. O ona tei uma ua avea ma tagata o le Ekalesia. Sa auauna atu foi lona tuagane i se misiona. Ma o lona uso laitiiti ua faaipoipo i lo‘u uso laitiiti.
Pe a ou toe mafaufau i le faaiuga a lenei tamā, e faagaeetia lava au. Sa ia tuu atu i lana tama muamua, o se tagata liliu mai i se faatuatuaga e ese mai ia te ia, e auauna atu i se misiona. Ua faamanatu mai foi ia te au faamanuiaga na maua e lona aiga a o avea le toatele o lana fanau ma tagata o le Ekalesia. O le taimi nei ua latou faaipoipo ma le fiafia i taitoalua agavaa, ma ola faamaoni i le talalelei a Iesu Keriso. E lei auai lava le tamā i le Ekalesia, ae e mautinoa lava o lana osigataulaga, e pei o le faatuatua o Aperaamo i le Atua, ia “tauamiotonuina mai ai lea ia te ia” (Kenese 15:6).
O Se Faatusa
Aua le Faia Lo’u Loto, a o Lou Finagalo, saunia Harry Anderson, courtesy of Pacific Press Publishing Association, Inc, atone e le mafai ona kopiina
O le lotomalie o Aperaamo e ositaulaga lona atalii o le, ioe “o se faatusa o le Atua ma lona Alo e Toatasi na Fanaua” (Iakopo 4:5). O lenei siata o loo faamamafa mai ai nisi o mea e tutusa ai:
|
Iesu Keriso, Alo o le Atua |
Isaako, Atalii o Aperaamo |
|
Ua faamatala e le Atua ia Iesu Keriso o Lona Alo Pele (tagai Mataio 3:17; Talafaasolopito—Iosefa Samita 1:17). |
Ua faamatala e le Atua ia Isaako o le atalii e alofa i ai Aperaamo (tagai Kenese 22:2). |
|
O le Faaola o le Tamai Mamoe a le Atua e aveesea agasala a le lalolagi (tagai Ioane 1:29; 1 Nifae 11:21, 33; Mosaea 14:7; Alema 7:14). |
O Isaako o se tamai mamoe e ositaulagaina e Aperaamo (tagai Kenese 22:7–8). |
|
Na tuuina mai e le Atua Lona Alo ona o Lona alofa mo i tatou (tagai Ioane 3:16). |
Ua naunau Aperaamo e avatu lona atalii ona o lona alofa mo le Atua (tagai Kenese 22:12). |
|
O le Faaola o le suli i le nofoalii o le Tama (tagai Roma 8:17; Eperu 1:2). |
O Isaako o le suli o Aperaamo (tagai Kenese 15:4). |
|
E ala ia Keriso, o i tatou o suli i le malo (tagai Roma 8:17; Kalatia 3:29). |
E ala ia Isaako (pe ala i feagaiga), ua faitauina ai i tatou o fanau a Aperaamo (tagai Kenese 21:12–13). |
|
O le taulaga a le Alii e taua mo le togiolaina. E ala i le faamaoni, sauniga, ma feagaiga, e mafai ai ona avea i tatou e faapei o Ia. |
Ona o folafolaga na faia ia Aperaamo ma Isaako, ua mafai ai ona avea i tatou ma fanau o le feagaiga, le au filifilia a le Atua. |
A tatou usiusitai ma le lotonaunau i poloaiga a le Alii, ua tatou ositaulaga mo Ia. A o tatou faia, tatou te lagona atili Lona mana gafatia, lea e mafai ai ona tatou maua le ola e faavavau pe a uma ona tatou faia a tatou lava taumafaiga silisili (tagai i le 2 Nifae 25:23; Moronae 7:25). Pe a tatou taliaina le Togiola a le Faaola, e faateleina lo tatou alolofa mo Ia. Tatou te lagonaina se agaga malamalama sili atu ia te Ia. O lenei mea ua mafai ai e i tatou ona faia mea uma Na te manaomia mai ia i tatou.
O se Osigataulaga Lotomalie
Ua tuuina mai e tusitusiga paia le tele o faataitaiga o i latou o e sa naunau e ositaulaga ma sa faamamanaina e le Atua.
O le Tama o Liae, mo se faataitaiga, na tuua mea uma ae o atu i le nuu o le folafolaga. Ona fesoasoani lea o le Atua i atalii o Liae ia maua mai papatusi apamemea mai ia Lapana, saunia le Liahona e taiala ai i latou i le vao, faaali atu ia Nifae le auala e fau ai se vaa, ma puipuia tagata o lona aiga a o latou sopoia le vasa. (Tagai i le 1 Nifae 2–18.)
Na ositaulaga e Alema le Itiiti lona nofoa o se faamasino sili e tuuto atu o ia lava i le valaauga paia atu o le faitaulaga sili (tagai Alema 4:11–20). Ona ia faatuina lea “o le faatulagaga o le ekalesia” (Alema 6:4), galulue faatasi ma Amoleka e aoao agaga e toatele, ma sosola mai le falepuipui e ala i le mana o le Alii (tagai Alema 8–16).
O le ositaulaga a Alema o se tasi o tulaga e taulai atu ai i se isi e faamanatu mai ai ia te au lo’u lava aafiaga ina ua valaauina au o se Fitugafulu Eria. E lei leva ona valaauina au, ae mananao le kamupani sa ou faigaluega ai ou te taliaina se tofiga e fa tausaga i Europa. O lona uiga ona o le tofiga, o le a toe siitia atu ai i se isi nofoaga, o lea sa ou teenaina ai. Ia i latou o e na faateia i la‘u faaiuga, sa ou faamalamalama atu i ai, e lei valaauina a’u e le Alii e auauna atu i le Eria o Aferika i Sisifo ia Aperila ae toe faamavae atu ma alu i Europa ia Me. Sa ou manatuaina le tala o le Feagaiga Tuai ia Iona (tagai Iona 1–3). Sa ou iloa na valaauina au e le Alii, ma o le a ou le lafoaia lo‘u valaauga.
O se Vaega Taua o le Talalelei
O le ositaulaga o se fua o le amiotonu. E manaomia ai le faatoilaloina o le tagata natura a o tatou gauai atu i faatosinaga a le Agaga Paia (tagai Mosaea 3:19). I le avea ai ma tagata o le Ekalesia, o nisi nei o osigataulaga tatou te faia e le aunoa.
Tausia o le tulafono o le sefuluai. “Faauta, ua taʼua nei o le asō seia oo i le afio mai o le Atalii o le Tagata, ma e moni o se aso o le taulaga, ma o se aso mo le totogiina o le sefuluai e loʼu nuu” (Mataupu Faavae ma Feagaiga 64:23). Vaai faalemafaufau o loo fetalai atu le Alii ia te oe, “Ua ou iloa nei ua e migao i le Atua, talu ai e te lei taofia lau sefuluai.”
Faamamaluina o le Sapati. Tatou te ositaulagaina o tatou lava tuinanau ina ia avea le Sapati o se aso fiafia i le Alii, ma ua Ia folafola mai faamanuiaga silisili ia i latou o e faamamaluina le Sapati (tagai Isaia 58:13–14). “Ua ou iloa nei ua e migao i le Atua, aua ua outou faamamaluina le Sapati.”
Auaunaga faafaifeautalai. Pe mafai ea e le tupulaga faiae ona “tuua loa lea o laua upega” (Mataio 4:20), po o le a lava le mea e taofia ai i latou, ae mulimuli atu i le Alii e ala i le auauna atu i se misiona? “O lenei ua ou iloa ua e migao i le Atua, aua e te lei taofia oe lava mai le auauna atu i se misiona.”
Taliaina ma le faalauteleina ma le faamaoni o valaauga. Pe a tatou taliaina ma le lotonaunau ia valaauga e auauna atu i le Alii, tatou te sailia Lana taitaiga e faia mea uma tatou te mafaia. “O lenei ua ou iloa ua e migao i le Atua, aua ua e faia mea uma e manaomia ma sili atu.”
Auauna atu i isi. O le ositaulagaina o o tatou taimi ma punaoa i le auauna atu, asiasi, lagolagoina, ma le siitiaina o isi e avea ai i tatou ma soo moni o Keriso. O le faia o galuega o talafaasolopito o aiga ma le auauna atu i le malumalu e tuuina atu ai auaunaga ia i latou i le isi itu o le veli. “Ua ou iloa nei ua e migao i le Atua, aua ua e auauna atu i Ana fanau.”
O Se Faaaliaina o le Alofa
Sa saunoa Peresitene M. Russell Ballard, Sui Peresitene o le Korama a Aposetolo e Toasefululua e faapea: “O le ositaulaga o se faaaliga o le alofa mama. O le maualuga o lo tatou alolofa mo le Alii, mo le talalelei, ma mo o tatou uso a tagata e mafai ona fuaina i mea ua tatou naunau e ositaulagaina mo i latou.”2
A tatou le taofia se mea i le faataunuuina o poloaiga a le Alii, tatou te tuputupu ae ia avea atili e faapei o Ia, ma avea i tatou ma Isaraelu, e pei ona aoao mai ai Peresitene Russell M. Nelson. Na ia fesili mai: “Pe o e loto e faamuamua le Atua i lou olaga. … O e loto e faataga soo se mea o finagalo o Ia e te faia ia faamuamua i lo isi faamoemoega uma? O e loto e tofatumoanaina lou loto i Lona finagalo?”3
Pe a tatou faatagaina le Atua e faamuamua i o tatou olaga, tatou te vaaia la tatou taulaga ia te Ia o se talisapaia o Lona alofa. Tatou te vaaia le auauna atu i Lona malo o se avanoa, ae le o se avega. E faigofie lava le ositaulaga e ala i le faatuatua i le Alii a o tatou sapi i Lona alofa togiola.