E Na’o le Tusiga Faatekinolosi

O Le A Le Uiga o le Avea ma Tagata o le Feagaiga?

Saunia e Chakell Wardleigh Herbert

Mekasini a le Ekalesia

O le malamalama i o tatou faamanuiaga ma tiutetauave o ni tagata o le feagaiga o le Ekalesia e mafai ona fesoasoani tatou te maua ai se faamoemoega sili atu i le olaga.

o se alii o loo papatisoina i se vaituloto

Tatou talia ia: e tiga folafolaga lē taunuu. O le toatele o i tatou ua oo i le lototiga lea e afua mai se tulaga faapena. Ae o le mea e faafetai ai, e tusa lava pe le faataunuuina folafolaga i le lalolagi, e mafai ona tatou manatua o folafolaga e faavavau o le a le mafai lava ona le taunuu.

A tatou osifeagaiga ma le Tama Faalelagi ma Iesu Keriso, e mafai ona tatou iloa ma le mautinoa a‘ia’i o le a La tausia pea a La‘ua folafolaga pe a tatou usiusitai (tagai Mataupu Faavae ma Feagaiga 82:10). Ioe, e faitalia i tatou ma o tatou loto naunautai i le tausia o na feagaiga o le a aumaia ai le faataunuuga o a La faamanuiaga folafolaina.

Ae o a faamanuiaga e oo mai i le osia ma le tausia o feagaiga? Ma o a ni o tatou tiutetauave o ni tagata o le feagaiga o le Ekalesia? Sei o tatou iloiloina nisi o mataupu faavae.

Faamanuiaga o le Avea ma Tagata Tausi Feagaiga

I le avea ai ma tagata O Le Ekalesia a Iesu Keriso o le Au Paia o Aso e Gata Ai, ua lauiloa i tatou o tagata o le feagaiga a le Tama Faalelagi (tagai 1 Nifae 14:14).

A o tatou osia ma tausia feagaiga paia ma Ia i le papatisoga ma i le malumalu, ua folafola mai ia i tatou faamanuiaga e o faatasi ma le feagaiga na osia anamua e Ieova ma Aperaamo (tagai Kenese 17:4–8; Aperaamo 2:10–11; Bible Dictionary, “Aperaamo, feagaiga o le”). O le lua o nei faamanuiaga e aofia ai le perisitua ma le faateleina e faavavau. I le avea ai ma tagata o le feagaiga o le Ekalesia, e mafai foi ona tatou maua

le Agaga Paia e avea ma a tatou soa tumau,
le avanoa e toe nonofo faatasi ai ma le Tama Faalelagi,
le faamanuiaga o le faamauina i o tatou aiga mo le faavavau,
le faaeaga e ala i le Faaola ma Lana Togiola, ma
“o mea uma ua i ai i lo’u Tama” (Mataupu Faavae ma Feagaiga 84:38; tagai foi fuaiupu 33–34).

Na taua e Elder D. Todd Christofferson o le Korama a Aposetolo e Toasefululua se folafolaga mamana patino e uiga i feagaiga: “O feagaiga ua ofo mai e le Atua i Ana fanau e tele atu mea e faia ai nai lo le na ona taiala ai o i tatou. E noatia ai i tatou ia te Ia, ma, o le notia ia te Ia, e mafai ai ona tatou manumalo i mea uma.”¹

E mafai ai ona tatou manumalo i mea uma e ala i le tausia o feagaiga.

O se upumoni mamana!

O La Tatou Tiutetauave o ni Tausi Feagaiga

Ae o le avea ma tagata tausi feagaiga e le na o le mauaina o faamanuiaga mo i tatou lava. E o mai faatasi foi ma se tiutetauave e fesoasoani i isi ia maua na faamanuiaga. Ua tuuina mai e le Tama Faalelagi ia i tatou le tiutetauave, mana, ma le pule e faia ai le galuega o loo ia te Ia mo i tatou—ia aumaia Ana fanau uma i le upumoni o le talalelei a Iesu Keriso. I le avea ai ma tagata o le feagaiga, ua tofu maua e i tatou taitoatasi le avanoa ma le mana e faalautele ai le galuega ma le mamalu o le Tama Faalelagi e ala i le auai i le galuega o le faaolataga ma le faaeaga e ala i mea nei:

“Ola i le talalelei a Iesu Keriso.
Tausia o i latou e le tagolima.
Valaaulia tagata uma ia talia le talalelei.
Tuufaatasia o aiga mo le faavavau.”²

I le avea ai ma tagata o le feagaiga a le Atua, ua faamanuiaina i tatou i faamanuiaga e le gata. Ia tatou faia la tatou vaega o le faasoa atu o na faamanuiaga ia i latou e lei iloaina lava le upumoni. Ina ia iloa po o le a le mea e mafai ona faia e le osia ma le tausia o feagaiga paia ma lo tatou Tama Faalelagi ma Iesu Keriso mo o tatou olaga e matuai olioli moni lava.

O mea nei o loo ta‘u mai e le Au Paia i le lalolagi atoa e uiga i le avea ma se vaega o tagata o le feagaiga ia i latou.

Olioli, Filemu, ma se Lagona o le Taua o le Tagata Lava Ia

O le osia ma le tausia o a‘u feagaiga ua fesoasoani ou te malamalama ai i lo’u taua moni o se atalii/afafine o le Atua. Ou te iloa soo se taimi lava ou te faamaoni ai i a‘u feagaiga, e faamanuiaina tele a’u e le Alii. Ua sili atu lo‘u lagonaina o le alofa o le Tama Faalelagi nai lo se isi lava taimi e ala i le osia o feagaiga i le malumalu. Ma e ui lava i le gaogaosa o loo siomia ai a’u i le lalolagi, e mafai lava ona ou lagonaina i taimi uma Lona faatasi mai. Ou te iloa e mafai ona ou faalagolago i le Tama Faalelagi e lagolagoina Ana folafolaga. O le avea ai ma se vaega o tagata o le feagaiga e fesoasoani ou te iloa ai e ui lava i faigata ma luitau ou te oo i ai i le olaga nei, e mafai lava ona ou lagonaina le olioli ma le filemu i lo‘u ala e toe foi atu ai ia te Ia.

Shalini Chand, Naitasiri, Fiti

O Se Faailoaga o le Faamaoni

Mo au, o le avea ma se vaega o tagata o le feagaiga o lona uiga o le i ai o le malamalama e le mafai e le lalolagi ona tuuina mai ia te au. E ala mai i lenei malamalama mai le Tama Faalelagi, e mafai ai ona ou faaleleia lo‘u olaga ia avea e faapei o Ia ma ola i se olaga fiafia ma faatotonugalemu-i-le-talalelei. O le osia ma le tausia o feagaiga ma le Atua e mafai ai ona ou faaali atu ia te Ia lo‘u faamaoni, faatuatua, ma le faalagolago ia te Ia; e ala i lena mea, ou te maua ai faamanuiaga ua folafola mai e le Atua ia te a‘u.

O le tausia o a‘u feagaiga ma le mulimuli i poloaiga o le talalelei e aafia ai lo’u olaga i se auala lelei. E oo lava i taimi faigata, o le faamaoni i a’u feagaiga e fesoasoani ou te iloa ai e mafai ona ou iloa le aao o le Atua i lo‘u olaga, o le a Ia tali mai i au tatalo, ma maua ma iloa faamanuiaga ua Ia tuuina mai ia te a‘u.

Salvo Patamia, Lombardy, Italia

Tofo i Le Atoatoaga o le Talalelei

E silafia e le Tama Faalelagi tatou te le atoatoa. Ae po o fea lava o tatou i ai i la tatou malaga o ni soo o Iesu Keriso, a o tatou taumafai e osi ma tausia feagaiga paia, e mafai ona tatou lagonaina le atoatoaga o le talalelei a Iesu Keriso ma le olioli ma faamanuiaga e le mafaamatalaina ua folafola mai ia i tatou, e pei lava o le Au Paia faamaoni o i luga.

E pei ona valaaulia ma folafola mai e Russell M. Nelson ia i tatou: “Tumau i ala o feagaiga. O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea.”³