E Na’o le Tusiga Faatekinolosi
Faamanuiaga Faapeteriaka—Malamalamaaga mai Perofeta ma Peteriaka
Aoao atili e uiga i faamoemoega ma folafolaga o faamanuiaga faapeteriaka.
Ata na pueina e Jeremy Hall
“Ou te manatua le taimi muamua na ou tuuina atu ai se faamanuiaga faapeteriaka,” o le tala lea a Vyacheslav A. Protopopov, o se peteriaka e nofo i Moscow, Rusia. “Ioe, sa ou mafaufau loloto, suesue, ma saunia faaleagaga. Sa ou popole, ae ina ua oo mai le taimi, sa faatumulia le potu i le Agaga ma aveeseina le fefe ma mea uma faalavefau. Na fesoasoani le Agaga ia te a’u ina ia lagonaina upu ia na oo mai i lo’u loto.”
E pei o Uso Protopopov, e tautino atu e peteriaka i le Ekalesia atoa le gafa ma tuuina atu faamanuiaga faapeteriaka e ala i le agaga o faaaliga. O nisi nei o aoaoga mai perofeta ma aposetolo, faatasi ai ma manatu mai peteriaka e toafa, e uiga i le mauaina ma le mulimuli i lenei punavai paia o le taitaiga faaleagaga.
Savali Patino mai le Tama Faalelagi
“I le salafa o le lalolagi, e saunia ai faaleagaga peteriaka faamamaluina e tuu atu ni faamanuiaga faapeteriaka,” na saunoa ai Elder Gerrit W. Gong o le Korama a Aposetolo e Toasefululua. “Pe a faaee atu e le peteriaka ona aao i luga o lou ao, na te lagonaina ma faaali atu le alofa o le Atua mo oe. Na te tautino atu lou tupuaga i le aiga o Isaraelu. Na te faailoa atu faamanuiaga mai le Alii.”1
Na faasoa mai e le Peteriaka o Clayne A. Steed o Alberta, Kanata: “Ua faafia ona faalotomaualaloina a‘u i le tulaga ese o faamanuiaga ua tuuina mai—o upu, fasifuaitau, ma fuaiupu. E ala i uunaiga a le Agaga Paia, e avea ai i latou ma uunaiga, manatu, ma upu e maua ai le leo e ala mai ia te a’u o se sooupu ina ia mafai ai e le Tama Faalelagi ona faamanuia Ana fanau. E mafai ona ou amata talisapaia le taua o mea ua tautalagia ona e le o sa‘u faamanuiaga—o le faamanuiaga a le Atua” i Ana fanau.
“E pei lava ona tele mea e ese ai i tatou i o tatou tagata taitoatasi ma o tatou aafiaga, e patino foi lo tatou faamanuiaga faapeteriaka,” na saunoa i ai Emile E. Bailly o Loiret, Farani. “E mafai e fanau taitasi a lo tatou Tama Faalelagi ona iloa, e ala i le mana o faaaliga, o lenei faamanuiaga e mai le Atua mo ia lava.”
“O lou faamanuiaga faapeteriaka e a oe lava ma ua na o oe,” na saunoa ai Thomas S. Monson (1927–2018). “Atonu e puupuu pe umi, faigofie pe loloto foi. E le o le umi po o le gagana e ala ai ona taua se faamanuiaga faapeteriaka. O le Agaga e faailoa mai ai le uiga moni.”2
O La Tatou Matafaioi i Faamanuiaga Folafolaina
Na faamanatu mai e Elder David A. Bednar o le Korama a Aposetolo e Toasefululua ia i tatou e faapea, “A le o se suli ia po o se tamafai,” o i tatou o “sulimoni o folafolaga na faia e le Atua ia Aperaamo. O i tatou o fanau a Aperaamo. O se tasi o mafuaaga tonu ua tatou maua ai se faamanuiaga faapeteriaka o le fesoasoani lea ia i tatou ina ia malamalama atoatoa ai po o ai i tatou i le avea ai ma fanau a Aperaamo ma ia iloa le tiutetauave ua i o tatou luga.”3 O o tatou faamanuiaga faapeteriaka e mafai ona fesoasoani ia i tatou e iloa ai le galuega ma faamanuiaga ua saunia e le Tama Faalelagi mo i tatou e ala i lo tatou amiotonu.
“O se faamanuiaga faapeteriaka e fesoasoani ia i tatou e tuputupu a’e ai i le faatuatua ma le molimau, faatoilalo ai tofotofoga, ma fiafia ai,” o le tala lea a Brother Protopopov. “A o tatou suesue i le faamanuiaga, e tele atu isi mea ua faaalia mai ia i tatou e ala i musumusuga, o lo tatou manao ia amiotonu, ma lo tatou taumafai e mulimuli i mataupu ma aoaoga a perofeta soifua. Afai tatou te suesue e le aunoa i o tatou faamanuiaga, o le a fesoasoani tatou te latalata atili atu ai ia Iesu Keriso ma vaai ma talisapaia le amiotonu i o tatou aafiaga faalelalolagi.”
“O le faitalia o se meaalofa paia,” o le tala lea a Brother Steed. “A o tatou faaaogaina ma le atamai lena meaalofa e ala i le faia o filifiliga amiotonu, o le mea lena e mafai ona avea pea lava pea ma se mea moni a o faamanuiaina i tatou taitoatasi e le Alii. E le faamalosia e le Alii faamanuiaga i luga o Ana fanau. E tatau ona tatou galulue i le amiotonu ma le usiusitai ina ia maua ai faamanuiaga folafolaina.”
E pei ona sa aoao mai Peresitene Russell M. Nelson, “O lou faamanuiaga faapeteriaka … o le a fesoasoani ia te oe e iloa ai lou gafatia i le lumanai. O le mea moni, e mafai ona e tuu atu le aia i le Alii mo le faataunuuina o na faamanuiaga e ala i lou faamaoni.”4
O Se Vaaiga e Faavavau
“Ou te moomoo maimau pe ana malamalama nisi tagata o lou faamanuiaga faapeteriaka e le mo na o le olaga nei ae mo le faavavau foi,” o le tala lea a Keith L. Stapleton o Georgia, ISA. “Ia manatua ua silafia i tatou e le Tama Faalelagi mai lava i le amataga. O i tatou o Ana fanau. Na te silafia mea uma e uiga ia i tatou mai lena taimi i lenei olaga i le lalolagi ma oo atu ai i le faavavau. O le mea lea, e mafai ona faatatau lo tatou faamanuiaga faapeteriaka i soo se vaega o lo tatou olaga.”
“O nisi taimi o le a popole ai se tasi ona e lei faataunuuina se folafolaga na faia i se faamanuiaga faapeteriaka,” na aoao mai ai Peresitene Boyd K. Packer (1924–2015), o le sa avea muamua ma Peresitene o le Korama a Aposetolo e Toasefululua. “Mo se faataitaiga, e mafai ona faailoa mai i se faamanuiaga e faapea o le a faaipoipo se tagata, ae le maua se soa. E le faapea o le uiga o lena mea o le a le faataunuuina lava le faamanuiaga. E lelei ona silafia e tutupu mea i le taimi a le Alii, ae le o taimi o tatou. O mea e faavavau lo latou natura e leai ni taimi faatapulaa. Mai le muai olaga e oo mai i lo tatou olaga nei e oo atu i veli o le oti, o lo tatou ola e faavavau.5
Sa faapena foi ona faasoa mai e Peresitene James E. Faust (1920–2007), o le sa avea muamua ma Fesoasoani Lua i le Au Peresitene Sili, e faapea “o se faamanuiaga faapeteriaka o se taiala paia o fautuaga, folafolaga, ma faamatalaga mai le Alii. Peitai, e le tatau i se tagata ona faamoemoe o le faamanuiaga o le a auiliili ai mea uma o le a tutupu ia te ia, pe avea o se tali i fesili uma. O le le faia o faamanuiaga o se mea maoae na tupu i le olaga e pei o se misiona po o se faaipoipoga e le faapea o le a le tupu. O lo‘u lava faamanuiaga e puupuu ma e tapulaa pe a ma le tolu kuata o le itulau e tasi i le tasi itu, ae ua matuai lava ma atoatoa mo a’u.” Na saunoa foi Peresitene Faust e faapea “o faamanuiaga faapeteriaka e tatau ona faitauina soo ma le lotomaualalo ma le agaga tatalo.”6
“O lo tatou matua faaleagaga e faaauau pea ona suia mo le lelei sili atu e tusa ai ma a tatou taumafaiga,” o le tala lea a Brother Bailly. “O le mafuaaga lena e lelei ai le toe faitau o o tatou faamanuiaga faapeteriaka mai lea taimi i lea taimi, aua o uunaiga fou ma lagona ma le malamalama faaopoopo e mafai ona tuuina mai ia i tatou mo lo tatou faagaeetiaina. E le muta lava le finagalo o le Tama Faalelagi mo i tatou taitoatasi i mea lelei uma tatou te mafaia. O nei mea uma o le a oo mai i le taimi e tatau ai, pe a tatou saunia mo na mea, a le o lenei olaga po o le olaga a sau.