Sau, Mulimuli Mai ia te A’u
O Faatusa i le Feagaiga Tuai
E faaaoga e tusitusiga paia faatusa e aoao mai ai mataupu taua o le talalelei. O le malamalama i faatusa o loo maua i totonu o le Feagaiga Tuai e mafai ona faaoaina ai lou aafiaga i le faitauga, faalolotoina lou malamalama i upumoni o le talalelei, ma faaleleia ai lou talisapaia o afioga a le Alii.
O nisi o faatusa e mafai ona faaliliuina i ni auala eseese. E taua le manatua o faaliliuga sa‘o o faatusa o le a fausia i luga o mea ua manino ona aoao mai e isi tusitusiga paia ma o tatou taitai o le Ekalesia.
O faatusa nei e fa o le a e tau i ai i le faitauga o le Sau, Mulimuli Mai ia te A‘u i lenei masina.
Lala Olive
Mai le agavale pito i luga: ata na pueina e le iStock.com/RayTango; James Jeffery; Matt Reier; ma Stephen Peel
O laau olive o loo ta‘ua soo i tusitusiga paia. O laau olive e faatusa i le aiga o Isaraelu, ma “o le lala olive e masani ona manatu i ai le lalolagi o se faatusa o le filemu.”1 O se lala olive o le laau muamua lea na ta‘ua ina ua mavae le Lolo (tagai Kenese 8:11), e faatusa i le toe foi mai o le filemu i le lalolagi ina ua maui lologa.
Nuanua
Ina ua mavae le Lolo, sa tuu e le Atua se nuanua i le lagi (tagai Kenese 9:12–17). O le nuanua sa sili atu nai lo o se vaaiga matagofie; o se faatusa o le folafolaga a le Atua o le a le toe ufitia le lalolagi i se lolo ma o le a toe afio ai le Alii i le lalolagi (tagai Faaliliuga a Iosefa Samita, Kenese 9:21–25 [i le faaopoopoga i le Tusi Paia]).
Mamoe
Ina ua talosagaina Aperaamo e osi le taulaga ia Isaako, sa saunia e le Atua se mamoe poa e osi ai le taulaga e suitulaga ia Isaako (tagai Kenese 22:13–14). E pei ona faamalamalama mai e Peresitene Dallin H. Oaks, Fesoasoani Muamua i le Au Peresitene Sili: “Ona o a tatou agasala ma lo tatou olaga faitino, ua faasalaina ai i tatou … i le oti. A mavae atu isi faamoemoega uma, e saunia e lo tatou Tama oi le Lagi le Tamai Mamoe a le Atua, ma ua laveaiina i tatou i lana taulaga.”2
Vai Eli
I le Kenese 26, o le a e faitau ai e uiga i vaieli a Isaako. O le vai e masani ona faatusa i lo tatou faalagolago i le Faaola, o Iesu Keriso. “E pei ona taua le vai e tausi ai le ola faaletino, o le Faaola ma Ana aoaoga (vai ola) e taua mo le ola e faavavau.”3