“E Mafai Ona Ou Fesoasoani ia te Oe?”
Ina ua ou faalogo i le leo, sa ou manatuaina sa ou mauaina talu ai nei le meaalofa o le Agaga Paia.
Atatusi mai le Getty Images
Pe a ma le lua masina talu ona uma lo‘u papatisoga, sa ou kolosi ai i luga o se auala taavale i se auala savali i se eria e igoa o Posto Dudu, i le aai o Parnamirim i Pasila. Sa ou agai atu i se fale faatali pasi i le isi itu.
A o ou kolosi atu, sa ou pasia se tamaitai sa pipiimau i se pa saogalemu. Sa punou lona ulu ma sa gatete lona tino. Sa foliga fefefe tagata ia te ia ina ua latou pasia o ia. Sa ou manatu atonu e i ai ni ona faafitauli o le mafaufau.
Ina ua ou pasia o ia, sa ou faalogoina se leo ua manino e pei o soo se leo o se tagata soifua na faapea mai, “Toe foi i tua!” Ou te lei vaai i se tasi na latalata mai ia te au ma sa ou manatu sa ou faalogo i ni leo.
Sa ou savali teisi ese ae ou toe faalogoina le leo: “Toe foi i tua!” Sa ou mafaufau e toe foi ae sa faaauau pea ona savali, ma mafaufau pe o le a faaoolima le tamaitai ia te au pe afai ou te toe foi atu ia te ia.
Ina ua ou taunuu i le isi itu o le auala savali, sa ou faalogoina le leo mo le taimi lona tolu: “Toe foi i tua!” Sa ou tu, ma manatua ai sa ou mauaina talu ai nei le meaalofa o le Agaga Paia ma le faamanuiaga e maua le taitaiga mai le Agaga. Sa ou toe faatopetope atu i le tamaitai.
“Tulou lava, ae e mafai ona ou fesoasoani ia te oe?” Sa ou fesili atu ai.
“Ioe,” sa ia fai mai ai ma loimata. “E tatau ona ou alu i le isi itu e pu‘e lau pasi, ae e le mafai ona ou alu ona ou te fefe i mea maualuluga. Ua leva ona ou tu ii e aunoa ma le iloaina po o le a le mea e fai.”
“O le a ou fesoasoani ia te oe,” sa ou fai atu ai ia te ia. “Uu lo‘u lima, moeiini ou mata, ma o le a ta taunuu faatasi i le isi itu.”
Sa ia pipii mau i lo‘u lima, moeiini ona mata, ma savali lemu faatasi ma a’u i le isi itu. Sa ia fai mai sa ia tatalo mo se taimi umi ia fesoasoani le Atua ia te ia e kolosi. Ona ia faafetai mai lea ia te a‘u ma ole atu i le Atua e faamanuia a’u. Ina ua uma ona ia pueina lana pasi, sa ou mafaufau mo ni nai minute e uiga i le mea lea na faatoa tupu.
Na fetalai le Faaola, “O a’u mamoe e faalogo mai i latou i lo’u leo, ua ou iloa foi i latou, ua latou mulimuli mai foi ia te au” (Ioane 10:27). O lena aso na ou aoaoina ai o se tasi o auala sili ona lelei e mulimuli ai ia te Ia ma lagonaina Lona alofa, o le uai atu lea i le siufofoga o le Agaga pe a valaauina i tatou e fesoasoani atu i isi.