Mataupu Faavae o le Auaunaga
O Auaunaga Faigofie e Mafai Ona Anoa
Aua e te faatuai ona o loo e mafaufau pe ua laitiiti tele lau taulaga.
Ata na pueina e Bradley Slade
Sa feagai le aiga o le ma afafine ma se luitau ogaoga faasoifuamaloloina, ma sa faatulagaina ni taumafataga o le afiafi mai tuaoi agalelei. O le po muamua, na taunuu mai ai se ulo vevela o le supo moa, ma ni kuki sukalati mafanafana. O le aoauli na sosoo ai, na momoli atu ai e ni uo le taumafataga o le aoauli—supo moa ma kuki sukalati. Ma i lena po, ioe, o le supo moa ma kuki sukalati o le taumafataga o le afiafi na saunia e se isi Samaria agalelei. Ma o le po na sosoo ai—na e sao lau mate—o le isi ulo o le supo moa ma kuki sukalati na taunuu mai mo le taumafataga o le afiafi.
E le na o se tala malie lenei e uiga i supo moa ma kuki sukalati. O se tala o le tausiga o se tuafafine ma lona aiga o loo manaomia le fesoasoani. I asu taitasi o le supo ma u o le kuki sukalati, sa lagona ai e le ma tama teine ma lona aiga le alofaina ma le lagolagoina. O ulo taitasi o supo ma ipu kuki sa faia mai ni fua eseese o kuka e tulaga ese i tuafafine taitoatasi. Pe le o le ala ea lena o loo tatou i ai i la tatou auaunaga? Tatou te aapa atu i lo tatou lava tulaga ese, i o tatou lava ala ma fua musuia faaletagata lava ia. Tatou te le faatuai i le mea e fai; na ona tatou faia lava.
Rebecca L. Craven
Fesoasoani Lua i le Au Peresitene Aoao o Tamaitai Talavou
O Galuega Faigofie e Anoa
I le avea ai ma se nuu o le feagaiga, ua tatou folafola atu e auauna atu le tasi i le isi. O le naunau e auauna atu i ni auala faigofie e mafai ai e le Atua ona faamanuia isi e ala mai ia i tatou—ma faamanuia ai i tatou i le taimi lava e tasi. O se faatinoga faigofie o le auauna atu e le itiiti ifo le anoa.
Repeka i le Vaieli, saunia e Michael Deas
O Repeka o le Feagaiga Tuai o se faataitaiga o se auaunaga faigofie, ma le alofa. Ina ua o mai tagata malaga i lona fale ma talosaga atu mo se vaiinu mai le vaieli, sa ia auauna atu ma le fiafia ia i latou—ona alu lea i tua atu e ala i le ofoina atu o se vai mo a latou kamela. O lenei auaunaga faatauvaa e le faapea sa lei faigata—e mafai e kamela ona inuina kalone ma kalone, ae sa ia auauna atu ma le naunautai, ma faatumuina le faatanoa ma toe tamoe e aumai nisi vai seia uma ona feinu kamela uma e 10 i le vai e maua ai le ola. Sa faamoemoe Repeka mo se mamalu e maua mai i lana auaunaga faigofie, ae o le faaalia o lona uiga, sa talia ai o ia i le aiga o Isaako ma faamanuiaina ai augatupulaga e ala i lana tama o Iakopo, le tamā o le aiga o Isaraelu. (Tagai Kenese 24.)
Mataupu Faavae e Mafaufau i Ai
A o e mafaufau i ou avanoa ma tofiga e auauna atu ai i isi, mafaufau i nei mataupu faavae o loo faaalia i tala:
-
O auaunaga faigofie e mafai ona anoa. Aua le faatali seia e maua le ulo pito sili ona lelei o le supo. Aua le faatuai e fai le mea e te mafaia pe a e vaaia se manaoga.
-
Aua le matamuli i mea e te ofoina atu. Pe a tatou naunau e fai mea tatou te mafaia i mea ua tatou maua, e mafai e le Atua ona faia ni mea se tele mai sina mea itiiti (tagai Mareko 6:34–44).
-
“E fiafia le Alii i taumafaiga, ma o taumafaiga e aumaia ai taui.”1 E pei o le tala ia Repeka, e mafai e le Atua ona faaaoga a tatou taumafaiga faigofie e auauna atu e faamanuia ai i tatou ma isi, o nisi taimi mo augatupulaga a sau.
O Le a se Mea e Mafai ona Tatou Faia?
A e vaai i se avanoa e auauna atu ai, aua e te faatali ona e te mafaufau pe i ai sau mea e ofo atu. O le a faamanuia oe e le Atua ma isi mo lou naunau e auauna atu.