E Na’o le Tusiga Faatekinolosi: Talavou Matutua
O Le Auala e Mafai ona Avea ai le Malumalu o se “Fale o le Aoaoina” mo Oe
E masani ona fautuaina i tatou e aoao i totonu o le malumalu, ae e faapefea ona tatou faia lena mea?
“O le a e le malamalama i mea uma i le taimi muamua, ae ia alu atu soo i le malumalu ma faaauau pea ona aoao atili i lou olaga atoa.”
Sa tuuina mai e lo‘u epikopo ia te a’u lenei fautuaga ae ou te lei mauaina o‘u faaeega paia, ma sa sa’o o ia! O le a le galo lava ia te au le Agaga ma le alofa sa ou lagonaina i totonu o le malumalu, ae mulimuli ane, sa vave ona galo ia te au le tele o mea, ma sa ou le mautinoa pe faapefea ona faaaoga mea uma sa ou aoaoina.
O lea na mafua ai ona ou manao e toe alu pea e aoao atili.
Na aoao mai Elder Robert D. Hales (1932–2017) o le Korama a Aposetolo e Toasefululua, “O malumalu o iunivesite aupito sili ia o le aoaoga ua iloa e tagata.”1
Ae e mafai faapefea ona tatou aoao i totonu o le malumalu?
E eseese auala tatou te aoao ai, pe a tatou sailia faaaliga, e mafai e le Agaga Paia ona aoao i tatou taitoatasi ma avea le malumalu o se “fale o le aoaoina” mo i tatou taitoatasi (Mataupu Faavae ma Feagaiga 109:8).
O ni nai aafiaga nei ua faaali mai ai ia te au le auala e mafai ona i ai le aoaoina patino i totonu o le maota o le Alii.
E Mafai Ona Tatou Saunia e Aoao Muamua
O sauniuniga mo le malumalu e le na o se vasega tatou te faia a o lei mauaina o tatou faaeega paia. E mafai ona tatou saunia i tatou lava i taimi uma e aoao a o lei faia asiasiga taitasi.
E finagalo le Tama Faalelagi ia tatou aoao ma ia tuputupu a’e. E mafai ona tatou tatalo mo se fesoasoani, e mafai ona tatou suesue i tusitusiga paia, ma e mafai foi ona tatou anapopogi pe faia galuega o talafaasolopito o aiga a o lei oo i la tatou asiasiga i le malumalu e tatala atili ai o tatou loto i le malamalama lea e mafai ona maua iina. Na saunoa Peresitene Russell M. Nelson: “E mafai e se tasi … ona faitau i le Feagaiga Tuai ma tusi a Mose ma Aperaamo i le Penina Tau Tele. O se iloiloga faapea o tusitusiga anamua e matuai faamalamalamaina ai pe a mavae ona masani se tasi i faaeega paia i le malumalu.”2
A o lei oo i asiasiga uma i le malumalu, ou te taumafai ia i ai se fesili i lou mafaufau e uiga i le talalelei, e uiga i lou olaga, pe e uiga i sauniga, ma ou te ole atu i le Tama Faalelagi e fesoasoani mai ia ou iloa le siufofoga o le Agaga ia malamalama i mea e finagalo o Ia e aoao mai ia te a’u. O le saunia muamua e fesoasoani ia te au e valaaulia ai se agaga o le aoaoina i totonu o le malumalu. Ma a tatou laa ese mai mea o le lalolagi i totonu o le malumalu ma saili e faalogo ia te Ia, e mafai ona tatala o tatou loto i le Agaga ma aoao i soo se auala e finagalo o Ia e aoao ai i tatou.
E Mafai Ona Tatou Maua Tali Patino
Ao ou sauni e faaipoipo, sa ou lagonaina le popole. E taliē pea lo‘u aiga i le auala na ou tatā ai o’u tamatamailima i luga o lo‘u tulivae (o se mea ou te faia pe a ou popole) a o saunoa mai le fai faamauga o le malumalu ia i matou. Sa ou le fefe e faaipoipo i lo’u toalua—sa ou alofa ia te ia! Ae sa ou popole e uiga i le lumanai aua sa ou osia se feagaiga taua tele. Sa ou tatalo le leoa ina ua ou ulu atu i le malumalu ia iloa le mea e mafai ona ou faia e faatumauina ai le malosi o le ma faaipoipoga i se lalolagi ua faateleina le le mautonu.
I ni nai minute mulimuli ane, na ta’u mai ai e le fai faamauga o le malumalu ia te a’u ma lo’u toalua ia manatua o sauniga uma i le malumalu e faasino atu ai i tatou ia Iesu Keriso. Sa fesoasoani mai le Agaga ia te a’u ia iloa lenei savali o se tali mai le Tama Faalelagi, ma o upu a le fai faamauga i le malumalu na faalolotoina ai la‘u molimau e faapea, a o ma liliu atu pea ma lo’u toalua i le Faaola, aemaise lava e ala i galuega o le malumalu, e mafai ona faamalosia la ma faaipoipoga e oo i le faavavau.
O lenei aafiaga na faamanatu mai ai ia te a’u e popole le Tama Faalelagi i fesili i o tatou loto ma e mafai ona tuuina mai le poto faamafanafana ia i tatou i le malumalu i ni auala patino. E pei ona sa aoao mai Peresitene Ezra Taft Benson (1899–1994): “Ina ua mamafatu ia te a’u se faafitauli po o se faigata, sa ou alu i le Maota o le Alii ma se tatalo i lou loto mo ni tali. O nei tali ua oo mai i ni auala manino ma le le mafaaseseina.”3
E Mafai Ona Tatou Aoao i le Tele o Auala
I le taimi o se tasi o asiasiga i le malumalu i se taimi sili ona pisi i lo‘u olaga, sa ese mea na ou mafaufau i ai, ma sa ou faanatinati atu e faia sauniga ma alu i lo’u ala. Ae sa fautua lemu mai se tagata faigaluega agalelei o le malumalu afai tatou te faifai lemu ma mafaufau i le galuega paia o loo tatou faia, e mafai ona tatou lagonaina le Agaga loloto lea e na o totonu lava o le maota o le Alii e nofo ai. Ou te talitonu sa uunaia le tagata faigaluega o le malumalu e fesoasoani ia ou malamalama i se upumoni. Ma sa faamanatu mai ia te au le auala e mafai ai ona tatou maua le malamalama mai le tele o punaoa eseese i totonu o le malumalu. Ua ou maua faaaliga i totonu o le malumalu e ala i le tatalo le leoa, suesue i tusitusiga paia i eria faatalitali, mafaufau loloto i upu o sauniga, ma, ioe, e oo lava i le talanoa atu i tagata faigaluega musuia o le malumalu.
A o tatou aoao i totonu o le malumalu, atonu tatou te maua se malamalama faateleina o sauniga ma feagaiga, se molimau loloto, uunaiga, lagona o le faamafanafanaga, ma isi. E finagalo le Tama Faalelagi ia tatou maua ni aafiaga patino o le aoaoina i totonu o le malumalu ma ia tatala i le tele o auala e mafai ona tatou maua ai le malamalama i Lona maota.
O Le a Faamanuiaina i Tatou a o Tatou Faamuamuaina le Malumalu
O loo tele pea mea o loo ia te au e aoao ai e uiga i sauniga o le malumalu ma le mana lea e sau mai le tausia o a‘u feagaiga. Ae ou te matua faafetai lava ona e mafai ona faaauau pea ona ou aoao i lo’u olaga atoa.
A o tatou faamuamua o tatou taimi i le malumalu ma tuuese taimi e toe manatunatu ai i a tatou feagaiga, o le a tatou tatalaina le faitotoa i le malamalama lea e mafai ona fesoasoani ia i tatou e tumau ai i luga o le ala ia Keriso. E moni lena mea mo au a o ou toe foi mai pea lava pea e aoao i le ala a le Alii i Lona maota paia.