Autalavou Matutua
O Le Poloaiga a le Alii ia “Saili le Aoaoina”
O le mauaina o se aoaoga e le na o se manatu lelei mo lou lumanai—o se poloaiga foi mai le Alii.
Ata na pueina e Robyn Jones
I le Feagaiga Tuai, o loo ta‘u mai ai e Hana ia i tatou “o Ieova o le Atua sisila mai o ia” (1 Samuelu 2:3). Ma ua faaali mai e faaaliga o ona po nei ia i tatou o loo moni pea lenei mea i aso nei. Ua tuuina mai e le Atua ia i tatou le faatonuga e “saili … tusi sili ona lelei upu o le poto; saili i le aoaoina, e ala lava lea i le suesue ma le faatuatua foi’ (Mataupu Faavae ma Feagaiga 88:118).
Ae a tatou talanoa e uiga i le sailia o le aoaoina po o le malamalama, e le na ona tatou faatatau i le ituaiga o aoaoga o le tikeri e fa-tausaga i le kolisi (e ui e faatatau i ai lena mea)—e sili atu nai lo lena! O le sailia o le malamalama e aofia ai aoaoga aloaia, isi aoaoga faamasani faapitoa, aoaoina o le talalelei, ma le aoaoga e le aloaia.
O loo i ai se mafuaaga ua onaina ai e le Ekalesia ia iunivesite, lagolagoina se polokalama faaleaoaoga maualuga atu i le initoneti (BYU–Pathway Worldwide) ma i ai se polokalama e aoao ai le talalelei mo talavou matutua (inisitituti o mataupu faalelotu)—ona, e pei ona faamalamalama mai e Elder Dieter F. Uchtdorf o le Korama a Aposetolo e Toasefululua, “Mo tagata o le Ekalesia, o le a‘otauina e le na o se manatu lelei—o se poloaiga.”1
Aoaoina Faalelalolagi: “Ia Saunia i Mea Uma”
Talu mai uluai aso o le Ekalesia, o aoaoga ua avea ma se faamuamua maualuga. Ina ua faamautu le Au Paia i Katelani, Ohaio, i le vaitau o le 1830, sa latou amataina ni faalapotopotoga faaleaoaoga e pei o le Aoga a Perofeta (o le autu sa faaaoga e saunia ai faifeautalai), o se Aoga mo Toeaina, o se aoga faaEperu, o se aoga maualuga, ma le mea e sili ona taua, o le Malumalu o Katelani, o lona faamoemoega o le avea ma “se fale o le aoaoga” (Mataupu Faavae ma Feagaiga 109:8). Mulimuli ane, i Navu, sa latou faatuina ai le Iunivesite o le Aai o Navu, le Seminare i Navu, ma aoga tumaoti ma faalauaitele. Sa latou talitonu ma le mausali o le “mauaina o le malamalama, o le poto faalelalolagi ma le paia, o se tulimataiga tamalii.”2
A o agai atu le Au Paia i sisifo, sa faaauau pea ona latou fausia a‘oga amata ma tulagalua po o aoga maualuluga i o latou nofoaga. Ae sa latou naunau lava e aoao sa latou faia ai ni vasega i fale o tagata, i faleie, po o fafo foi. Na tusia e Peresitene Siaosi A. Samita (1817–75), Fesoasoani Muamua i le Au Peresitene Sili, le ala na faapotopoto ai uluai tagata na nofoia le Itumalo o Iron, Iuta, e faataamilo i se afi o le tolauapiga i le maatiati o le malulu o Fepuari e faalogologo ai i lana lauga i le kalama faaPeretania, ma fepasiai ai se tusi kalama ia i latou lava ona sa na o le pau lea o le tusi sa ia i latou.3
O lenei ituaiga o naunautaiga mo le aoaoina o la tatou talatuu lea o ni tagata o le Ekalesia! Ua faaauau pea ona uunaia i tatou e perofeta ma isi taitai o le Ekalesia ina ia maua se aoaoga. Na aoao mai Peresitene Russell M. Nelson:
“Ona o lo tatou manatu paia mo le atamai faaletagata, ua tatou mafaufau ai i le mauaina o se aoaoga ina ia avea ma se tiutetauave faalelotu. …
“O la‘u fautuaga la … o le faaauau pea o lau aoga i soo se mea o e i ai, po o le a lava lou naunau ma avanoa, po o le a lava le auala e te fuafuaina e sili ona lelei e te auauna atu ai i lou aiga ma le sosaiete.”4
E tele mafuaaga e tulitulimatagauina ai aoaoga: e fesoasoani tatou te malamalama atili ai e uiga i tagata ma le lalolagi o loo siomia ai i tatou, ma o le a mafai ai ona tatou aoao atu a tatou fanau, auauna atu i le Ekalesia ma le nuu, ma saunia mea mo i tatou lava ma o tatou aiga. Na aoao mai Peresitene Gordon B. Hinckley (1910–2008):
“Ua ia te outou se poloaiga mai le Alii ina ia aoaoina o outou mafaufau ma o outou loto ma o outou lima. Ua fetalai mai le Alii, “Ia outou aoao atu ma le filiga … mea o i le lagi ma o i le lalolagi, ma o i lalo o le lalolagi … ; o mea o loo i le atunuu, o mea o i isi atunuu; o taua ma faafatiatamaʼiga o atunuu, ma faamasinoga o loo i luga o le laueleele; ma se malamalama foi i atunuu ma malo—ina ia mafai ona outou saunia i mea uma” (Mataupu Faavae ma Feagaiga 88:78–80).
“E finagalo le Alii ia aoao faamasani o outou mafaufau ma lima ina ia avea o se uunaiga mo le lelei a o outou agai atu i luma i o outou olaga. … O lau aoga o le a faamalosia ai lau auaunaga i le Ekalesia.”5
Aoaoina Faaleagaga: “Iloa Mealilo ma Mea Filemu”
E ui lava i le taua o le a‘otauina i totonu o se potuaoga, o lo tatou a’otauina faaleagaga e sili atu ona taua i la tatou malaga i le olaga nei.
A o avea o ia ma komesina o le Ofisa o Aoga a le Ekalesia, sa saunoa Elder Kim B. Clark, o se Fitugafulu o le Pulega Aoao ua malolo faamamaluina:
“O le poto silisili ona taua e tatau ona e mauaina o le malamalama i mea a le Atua. …
“O le faamuamuaina o le poto faaleagaga i lou mafaufau ma lou loto e faamautinoaina ai o le a e faalagolago i le Alii ma le Agaga Paia i lau aoaoga, o le a e vaai i mea uma e te suesue i ai i le malamalama o Lana talalelei, ma o le a faaauau pea ona e aoao loloto i o lou olaga atoa.”6
O le taimi nei ua tele naua punaoa o loo avanoa e fesoasoani ia i tatou i la tatou sailiga o le aoaoina o le talalelei. E le gata ua tatou maua tusitusiga paia ma upu a perofeta soifua o loo avanoa mo i tatou, ae ua tatou maua foi le Sau, Mulimuli Mai ia te A‘u, konafesi aoao, vasega o le Aoga Sa, ma afiafi faaleaiga, o avanoa uma ia mo le aoaoina e le aunoa o le talalelei. O malumalu paia ua faamoemoe foi e aoao ai i tatou i ala a le Atua.
E mafai foi e talavou matutua ona faaaoga le polokalama a le inisitituti o mataupu faalelotu a le Ekalesia, lea e aofia ai kosi i mea uma mai tusitusiga paia i le talafaasolopito o le Ekalesia e fesoasoani ai e ola ai i se olaga faamanuiaina. O le auai i le inisitituti e mafai ona fesoasoani ia te oe e avea ai ma se tagata atamai sili atu o tusitusiga paia, tuu atu ia te oe avanoa e faia ai ni uo, ma, afai o oe foi o se tagata aoga i le kolisi po o le iunivesite, e aumai ai le paleni i lou aoaoina faalelalolagi.
A o tatou tuuina atu le faamuamua i le aoaoina faaleagaga i o tatou olaga, o le a faamanuiaina i tatou i “faaaliga e faaopoopo i luga o lea faaaliga, lea malamalama e faaopoopo i luga o lea malamalama, ina ia [mafai ona tatou] iloa mealilo ma mea filemu—o mea ia e maua ai le olioli, lea e aumaia le ola e faavavau” (Mataupu Faavae ma Feagaiga 42:61).
“Iloa … le Atua ma Iesu Keriso”
I a tatou aoaoga uma—faalelalolagi pe faaleagaga—e tasi lava se fasi malamalama e tatau ona tatou sailia i luga atu o isi mea uma. Na aoao mai Elder Michael John U. Teh o le Fitugafulu: “E tatau ona tatou iloa o le iloaina o le Faaola o le sailiga aupito taua lea o o tatou olaga. E ao ona faamuamua i lo se isi lava mea.”7
Ua aoao mai e tusitusiga paia le mea lava lea e tasi:
“A ia tutupu outou i le alofa tunoa ma le poto i lo tatou Alii o lo tatou Faaola lea o Iesu Keriso” (2 Peteru 3:18).
“Malamalama moni … o le malamalama lea o lo latou Togiola” (Helamana 15:13).
“O le ola e faavavau foi lenei, ia latou iloa oe le Atua moni e toatasi, atoa ma le ua e auina mai, o Iesu Keriso lea” (Ioane 17:3).
A o tatou faaavanoaina se taimi e iloa moni ai le Tama Faalelagi ma Iesu Keriso, o le a sili atu ona mafai ona tatou avea atili e faapei o i Laua. Ma o le faia o lena mea o le a fesoasoani foi tatou te maua ai le uiga ma le faamoemoega a o tatou i ai i le olaga atoa. Sa faamalamalama mai e Peresitene Spencer W. Kimball (1895–1985), “Mai oa uma o le malamalama, o le mea aupito sili ona taua o le malamalama lea i le Atua, i lona i ai, o ona mana, lona alofa, ma ana folafolaga.”8
Aoaoina i le Olaga Atoa
I le avea ai ma talavou matutua, e tatau ona tatou tulitulimatagauina ma faaaoga avanoa uma e saili ai le aoaoina ma maua se aoaoga—i le aoga ma i le talalelei. O le faatusatusaina o aoaoga i le saunia o suauu i a tatou lamepa (tagai Mataio 25:1–13), na aoao mai ai Sister Mary N. Cook, o le sa avea muamua ma Fesoasoani Muamua i le Au Peresitene Aoao o Tamaitai Talavou: “O le taimi lenei mo oe e faaaoga ai ma le filiga outou lava i le faateleina o lou malamalama faaleagaga—i lea matāua ma lea matāua—e ala i le tatalo, suesueina o tusitusiga paia, ma le usiusitai. O le taimi lenei e tulitulimatagau ai lau a’oga—o lea matāua ma lea matāua.”9
Manatua ua poloaiina i tatou e le Tama Faalelagi e saili le aoaoina. Ma o le mafai ona aoao o se meaalofa moni mai ia te Ia. Afai e tau le mafai ona oo atu i aoaoga aloaia, e mafai ona e tatalo mo le taiala ma le taitaiga.
O le aoaoina i le olaga atoa e mafai ona avea ma se tasi o vaega aupito sili ona faamalieina o o tatou olaga. Afai tatou te saofaga i lo tatou aoaoina i le taimi nei, o le a tatou atiina ae se mamanu o le aoaoina i le olaga atoa lea o le a fesoasoani ia i tatou e avea ai ma ni matua sili atu ona lelei i a tatou fanau, tagata faigaluega lelei atu mo o tatou pule, tagatanuu sili atu o o tatou nuu, auauna sili atu i o tatou uso a alii ma tamaitai, ma ni soo sili atu o Keriso.