“Veisautaki ni Veisaqasaqa ki na Veilomani,” Liaona,, Maji./Epe. 2022.
O sa Kidavaki Mai ki na iLavelave Oqo
Veisautaki ni Veisaqasaqa ki na Veilomani
Josefa mai Ijipita, mai vei Michael T. Malm
Ena so na gauna eda dau sotava na veisaqasaqa ena noda veimaliwai. Na kilai ni kena veisautaki na veisaqasaqa dau veivakarusai ki na kena vakameautaki na veisaqasaqa sa ka bibi ki na noda tiko-vinaka. Ia eda dau sotava na dredre ena kena vakayacori.
Na veisaqasaqa veivakarusai e sa rui dau veirawai sara vakalevu. Sa sega ni dautarovi rawa na veisaqasaqa. E vaka me yalani na noda digidigi. Eda vakila na malumalumu kei na nuiqawaqawa. Na veimaliwai kavoro kei na veitikotiko era veisei tu era sa vaka na ikakavorovoro ni dua na vale e talaraki sobu.
Ia eda rawa talega ni vakaitavi ena vakameautaki ni veisaqasaqa, ka na rawa ni da vagalalataki keda kina mai na yasa ca ni veisaqasaqa. Sa rawa meda karona na lewa dodonu kei na veivosoti, vaqaqacotaka na noda veimaliwai, ka walia na veileqa titobu. Ena rawati na vakacegu—ena noda veimaliwai ka vakakina ena noda itikotiko raraba.
Me vaka ni’u dua na dautataro ni veisaqasaqa, tagane vakawati, ka tama, au sa raica ni kosipeli i Jisu Karisito e rawa ni kauta mai vei keda na rarama kei na kaukauwa e gadrevi me veisautaka na veisaqasaqa ki na veilomani.
Ena ilavelave oqo o na wilika kina na sala a rawa kina vei Jekope, Iso, kei Josefa meratou vakameautaka na veisaqasaqa ena nodratou dui matavuvale kei na sala eda rawa ni cakava vakakina ena noda itikotiko kei na itikotiko raraba (raica na tabana e 20). Ena yaco talega mo wilika na itukutuku veilaveti nei Elder D. Todd Christofferson baleta na sala e rawa ni vakasavasavataki keda kina na veika dredre kevaka eda gole vua na Turaga me vukei keda (raica na tabana e 6).
E vuqa vei keda eda colata tu na mosi levu me baleta na kavoro ni veimaliwai e vale vakakina e vuravura. Au nuitaka na ilavelave oqo e solia na inuinui vei ira era nanuma ni sa sega na betena na veivakaduavatataki, ka vakauqeta na vakabauta ni da sega ni tu duadua voli, ka bibi duadua, ni da vakila na loloma i Jisu Karisito ena dua na sala e sega ni veisautaki walega kina na yaloda ia na yalodra talega o ira eda sasaga bula vata tiko.
Ena yalomarau,
Chad Ford
Parofesa ni Intercultural Peacebuilding, Brigham Young University–Hawaii