“Na Cava na iBalebale Dina ni Vakarokoroko?,” Liaona, Maji./Epe. 2022.

Na Cava na iBalebale Dina ni Vakarokoroko?

Mai vei Destiny Yarbro

Ni da vakarabailevutaka na noda kila vinaka na vakarokoroko, ena vakalevutaka cake na noda rawata me da dau vakarokoroko ena veituvaki sega sara mada ga ni namaki.

iVakatakilakila

daramaka tu na tagane na irogorogo

Ena vuku ni so na veika matalia au sa sotava mai, au dau vakasamataka tiko na ibalebale ni vakarokoroko. Oqo na sala e vakamacalataka kina o Peresitedi Dallin H. Oaks, na iMatai ni Daunivakasala ena Mataveiliutaki Taumada:

“Na sokalou e vakavuqa me dau okati kina na cakacaka, ia na sokalou dina e dau tiko kina edua na ivakarau duatani ni vakasama.

“Na yalo ni sokalou e vakavurea cake mai na yalodina titobu, na vakarokoroko, kei na qoroqoro. Na sokalou e cokota vata na loloma kei na vakarokoroko ena dua na ituvaki ni loloma titobu ka vakavolekataka na yaloda vua na Kalou.” ¹

Na cava e lako mai ki na vakanananu ni ko vakasamataka na vakarokoroko? Ena okati beka na ivakaraitaki eso oqo me vakarokoroko se sega ena dua na soqoni ni sakaramede?

Droini tiko e dua na gone ena nona ivola ni rokarokataki.
E vota na sakaramede e dua na cauravou ni daramaka tiko na irogorogo.
Edua na turaga e ladelade ka yaloyalo tiko.
E dua na goneyalewa e qitora tiko edua na qito ena nona talevoni.
E dua na daukaulotu e kaila tiko vakaveitalia.
E dua na marama e dau dabe toka ga e na olo, ka sega e loma ni valenilotu.
E dua na turaga e davo koto ena meteresi e maliwa ni dabedabe e valenilotu.
E dua na ilawalawa lewenilotu era yavalavala ka mamaue tiko.
E dua na goneyalewa yabaki tinivakacaca e dabe toka e ruku ni nona idabedabe.
E dua na marama e veilakoyaki tiko e daku ni valenilotu.

E vuqa vei keda eda na duavata ni dua na daukaulotu ka kaila ena soqoni ni sakaramede e sega soti ni dau vakarokoroko ka tautauvata kei ira na gone ka ra droinitaki iyaloyalo tiko me ra vakaogai ira tiko kina. Ia me da taura mada e dua na gauna me da railesuva na noda vakatutu baleta na vakarokoroko ena noda raica yadua na 10 nai yaloyalo dina —na veika yadua au sa sotava oti vakai au ena veisoqoni ni Lotu.

E dua na gone e droini tiko e valenilotu. Na ivakarau oqo e matau ka ciqomi vakarawarawa mai vei ira na lewenilotu taucoko. Eda kila ni oqo e sega ni dau okati me tawa vakarokoroko vakavo ga ke da vakatara me vagolei keda tani.
E dua na turaga e vota tiko na sakaramede ka vakarorogoca tiko na sereivakatagi ena nona irorogo. Oqo ena yaco me sega sara ga ni rakorako ena vuqa na gauna. Ia me’u wasea mada “na vo ni italanoa.” Au kila e dua na turaga e kaukauwa vinaka na nona ivakadinadina ka sa veiqaravi oti vakadaukaulotu ka sa ciqoma oti e vuqa na veikacivi. Ena veiyabaki se qai oti toka ga oqo, a kunei vua e dua na ituvaki ni mate ni vakasama. Na daramaki ni irogorogo e vakatara vua me vakarorogo ki na ivakatagi malumu, veivakacegui ka veivuke ena kena tabonaki na vei domo ka dau rogoca tiko ena nona vakasama. Sa rawa vua me vakila na Yalotabu ka qaravi ira na tamata ena vakarokoroko ena veivuke ni nona irogorogo.
E dua na tagane e ladelade ka yaloyalo tiko. Na vo ni italanoa: Na cauravou sega ni vosa rawa oqo ka tauvimate tiko sa dau marautaka na gauna e dau raici bisopi kina ena tavata. E vakadewataka na nona marau ena nona yalovaka na ligana ka ladelade.

iVakatakilakila
Children attend primary. One has a service dog and another is in a wheelchair.
E dua na goneyalewa e qitora tiko edua na qito ena nona talevoni. Na vo ni italanoa: Na sisita oqo e valuta na nona nuiqawaqawa ni veimaliwai ena nona qitotaka vakamalua na qito ena nona talevoni. Na ka dina, sa rawa vua me vakarorogo vakavinaka cake ena vakarokoroko ka ciqoma na nodra itukutuku na vosa, baleta ni dau vakanamata na nona nuiqawaqawa ki na veivanua tale eso.
E dua na daukaulotu e kaila tiko vakaveitalia. Na vo ni italanoa: Ni’u tiko ena vale ni veituberi ni kaulotu, e dua na daukaulotu ena noqu iwasewase a tauvi koya tiko na mate ni nave ni yago. Ena veigauna, ena dau kaila ena kalasi, na rumu ni vakasigalevu, kei na veisoqoni ni Lotu. Na nona kaila a sega ni laurai me tawa vakarokoroko; keimami raica vakatotolo ni sa vakarau tu me veiqaravi, maqusa me wasea na kosipeli, ka sinai ena Yalo.
E dua na marama e dabe tiko ena olo e veimacawa ka sega e valenilotu. Na vo ni italanoa: Ni’u cakacaka tiko ena Lotu e Salt Lake City, a volavola sara e dua na marama ki na neitou valenivolavola ni Disability Services me baleta na leqa ka dau yacovi ira na lesu mai nai valu. Baleta ni dua na taqiri ni talevoni se so tale na rorogo vakasauri e rawa ni kauti koya lesu ki na buca ni valu, a sega ni dau dabe e valenilotu me kakua ni vakamavoataka vakacalaka kina e dua.
E davo toka e dua na turaga ena meteresi e maliwa ni dabedabe e valenilotu. Na vo ni italanoa: Ni’u toki ki na dua na tabanalevu vou, au kurabui ni’u raica e dua na cauravou ena dua na idavodavo ni valenibula veikauyaki e loma ni valenilotu. E vuqa na leqa vakayago a tu vua na tamata oqo ka sa rawa walega ni laki lotu ena sala oqo. Au qai kila ni oqo e kena ivakarau me baleta na tabanalevu oqo, ka’u moici au vakatotolo sara kina. Na nona tiko e a sega ni laurai ni tawa vakarokoroko ia, na ka dina, e kena veibasai sara ga. Me kena isoqoni, a sega beka ni vakabula na iVakabula e dua na turaga ka tukuci sobu ena nona idavodavo mai vei ira na nona itokani ki na dua na vale osooso? (raica na Luke 5:18–20).
E dua na ilawalawa lewenilotu era a mamaue ka yavalavala tiko vakalevu. Na vo ni italanoa: Na ivavakoso didivara e rawa ni ra “rogo levu” vei ira na daliga rogo ka ra tiko rawa. Vei ira na isoqosoqo ni didivara, e sega ni tawa vakarokoroko me dua e mamaue, dredre, se vu ena domo levu, ia e okati me tawa vakarokoroko mera veitalanoataka ena vosa ni galu na veika vakavuravura ena lotu ni sakaramede.
E dua na goneyalewa yabaki tinivakacaca e dabe toka ena ruku ni idabedabe. Na vo ni italanoa: Ni’u a se yabaki tinivakacaca voli, e dua na goneyalewa keirau taba vata a dau dabe toka ga e ruku ni nona idabedabe ena kalasi. A tubu cake na goneyalewa oqo ena vuqa na veivale nodra na luveniyali ka dau vakila ga ni taqomaki ena dua na vanua sogobutu. Mai na gauna oya, au sa mai kila kina ni da na sega ni rawa ni namaki ira na gonevuli mera vuli ni ra sega ni logaloga vinaka tiko. O ira na gonevuli e dodonu me ra vakila na taqomaki kevaka me ra na vuli ka, bibi duadua, me ra vakila na loloma ni iVakabula.
E dua na marama e veilakoyaki tiko ena olo. Na vo ni italanoa: Oqo dina, oi au. Au a dau sotava tu na loma nuiqawaqawa ena loma ni tinivakacaca na yabaki, ka so na gauna e dau bibi sara vata kei na leqa tale eso ni bula. Ena gauna oqo, na sala duadua ga au rawa ni lako kina ki lotu sa ikoya kevaka au yavala tiko. Ni’u veilakoyaki se’u qitora e ligaqu e dua na ka ni vakatatalo, e sala duadua ga au rawa ni vakarorogo kina vei ira era vosa ka vakila na Yalo.

Sa dau cakacaka o Setani ena dina ni da sega ni kila na italanoa taucoko, ni da sega ni kila na bolebole cava era sotava tiko na tacida kei na ganeda e veisiga. E vinakata o koya me da guilecava ni vuqa na lewenilotu era vakayacora tiko na nodra vinaka duadua, se cava ga na kedra irairai vei ira na tani. Na ituvaki au sa tuva tu e cake ena yaco beka vakavudua, ia era matataka na dredre e vuqa vakatamata era sa sotava tiko na noda lewenilotu.

Au vakabauta ni na vinakata o Setani me da vakabauta ni noda sokalou ena yalani ena veika dredre, veika duidui, se nodra malumalumu na tani. Ia na dina, au sa raica ni ena veigauna sara ga vakaoqo e vaka meda vagolei tani, au sa vakavulici kina ena vuqa sara na ka me baleta na loloma ni iVakabula.

Na Veika Au sa Vulica me baleta na Vakarokoroko

iVakatakilakila

marama e vosa tiko vagalu

1. Na vakarokoroko e dua na digidigi kei na dua na kila maqosa.

Sa vakatau vei au me’u vakila na vakarokoroko. E vakavuqa noqu sega ni dau vakarokoroko baleta ni’u dau vakatara me’u vagolei tani. Ni’u taracake na noqu bula vakaivakarau vakayalo ka vakavulica na yaloqu me’u vakanamata ki na veika e bibi duadua, au sa na rawata vakavinaka cake me’u vakaitavi vakavinaka sara ena noqu veiwekani kei na Tamaqu Vakalomalagi.

2.Na vakarokoroko e sega ni tautauvata ki na tamata kecega.

E dua na itokani ni matavuvale ka tiko e vale ni veivesu me 17 na yabaki, a kidavaka na Yalo ki na nona rumu ena nona bulia eso na ivakatakarakara caka vakamaqosa ni valetabu mai na pepa. Na vakarokoroko e rawa ni tiko ena ituvaki cava ga kevaka eda kidavaka na Yalotabu.

3.Na vakarokoroko e rawa ni vakaukauwataki ia e digidigi ni tamata yadua.

Na vakarokoroko e vu mai na dua na yalayala ni lomada me susuga e dua na “ivakarau ni sokalou.” Ena rawa walega ni tiko ni da vakila vakaidina ka vakaraitaka na noda lomana na Turaga kei ira na lewenilotu tale eso. A tukuna vei au ena dua na gauna o tamaqu ni da ciqoma na itavi baleta na noda vakarokoroko, ena veisau na noda rai mai na “O iko o vakacacana tiko na noqu sokalou eke!” ki na “O iko o vinaka. O sa ciqomi eke. O sega ni vakacacana na noqu tiko vakarokoroko baleta ni’u digitaka me’u dau vakarokoroko.” Eda sa qai kila kina ni nodra ivalavala na tani e sega ni na mai vakalatilatia na sala ni noda veiwekani yadua kei na noda iVakabula kei na Tamada Vakalomalagi. E dina sara, na noda itavi yadua me baleta na noda vakarokoroko, e sega ni vuna me da lecava kina na sala, e rawa ni vakayaco-ka kina na noda itovo ki na veika era sotava na tani. Na noda sasaga ena vakarokoroko yadudua sa rawa me dua na isema ni noda loloma vei ira me vaka ni ra tacida ka ganeda.

Nona iLesilesi na iVakabula

Ena dua na ivakaraitaki totoka ni veiqaravi, na iVakabula a yalololoma vua na turaga ka curumi koya tu edua na ivavakoso yaloca. E dina ga ni a dau qoqolou ka lako voli ka sega ni vakaisulu, o Jisu a sega ni tu vakasuka me vakabulai koya. Ni sa vakabulai oti sa rawa vua na tamata oqo me dabe “ena yavai Jisu, vakaisulu, ka yalomatua,” ka kerea me rau lako vata kaya na Turaga. (Raica na Luke 8:27–39; raica talega na Marika 5:1–20.)

E vakakina, o Jisu a sega ni tukuna vua na gonetagane ka curumi yalo galu me kakua ni vakatoqiqi, busebuse kasivi ka vakasequruquru bati ni bera ni vakabulai koya (raica na Marika 9:17–27). A raica o koya na vei ituvaki vakaoqo mera tiki ni veika sotavi ena bula vakayago, ka sega ni malumalumu vakayalo. O ira walega na Farisi a vakatalai ira tani o Koya ni nodra bula dodonu vakai ira kei na dokadoka e a tarova na veivakabulai.

Ni da vakarabailevutaka na ibalebale ni vakarokoroko, eda na rawata vakavinaka cake me veivakatavulici ka veiqaravi ena ivakarau ni iVakabula. Eda na nanuma na talei ni tamata yadua ena mata ni Kalou (raica na Vunau kei na Veiyalayalati 18:10). Eda na rawa ni vakarokoroko ena vei ituvaki sara mada ga e sega ni namaki.

E rairai beka vua na Turaga, na vakarokoroko e kena ibalebale na vakanomodi ni noda vakanananu kei na malumu ni yaloda ka sega soti ni noda dabe vakanomodi ka vosa malumu.

E vakaitikotiko mai Texas, Amerika, o koya ka volavola.