Au Digitaka me’u Rogoci Koya

Mai vei Rirhandzo Nkonyane, Pretoria, Ceva kei Aferika

Ena nona cavuta e dua na marama na keke ena nona ivakadinadina, au a ta cake ka tekivu vakarorogo.

iVakatakilakila

e dua na itui ki e dela ni teveli, ka dua na marama e masu tiko mai dakuna

Au a sucu mai ki na Lotu, ka’u dau lakova na itaviqaravi ni Lalai kei na itabagone. Au dau marautaka na Lalai baleta na sere kei na lesoni.

Ni’u se qai yabaki tinivakacaca, au sa tekivu lutu tani tiko ni oti noqu toki ki na dua na tabanalevu vou. Au dau tiko ena itaviqaravi ni itabagone ena vica vata na macawa, ia au sega ni dau veitalanoa ka sega soti talega ni vakaitavi vakalevu. Au a sega ni taleitaka na lotu ena Sigatabu, ia au dau lotu vagauna. Au sa qai kila ni’u a sega ni saumaki dina sara ki na kosipeli kei na kena ivakavuvuli. E sega ni dua na noqu ivakadinadina vakai au.

Me vaka ga na kena ivakarau ena dua na soqoni ni lolo kei na soli ivakadinadina, sa tekivu me veiciriyaki na noqu vakanananu. Au a sega ni vakarorogo vakaidina tiko ni ra wasea na lewe ni tabanalevu na nodra ivakadinadina, ia au dau cavuta na emeni ni sa cava edua. A qai gole yani ki na itutu ni vunau e dua na marama ka tekivu wasea na nona ivakadinadina. Ni cavuta o koya na keke, au rai cake ka tekivu vakarorogo.

“Au dau vosa vua na Tamada Vakalomalagi, ena gauna mada ga au vavi keke kina,” e kaya o koya. “Au cavuta e dua na masu lailai me na tubu na keke ka buta vinaka. Au kila ni dau sauma o Koya na noda masu.”

Au sega ni vakasamataka vakalevu na ivakadinadina oya me yacova ni sa sega ni yavala rawa na neitou motoka ni keitou gadreva me gole ki na sitoa me kauta mai eso na kakana. Ena gauna o ya au a nanuma sara na vosa ni sisita o ya. Au sa mani lesu tale ki na noqu rumu ni moce me’u kerea vua na Kalou me vukei keitou me yavala rawa na motoka. Au a tekiduru ka masu. Ni’u masu oti, au a taura na ki ni motoka ka cobara ena qara ni ki. Ka qai yaco mai na isau ni noqu masu—na irorogo ni motoka ni sa tekivu me yavala mai.

Ena vuku ni isau ni dua na masu rawarawa, au a gole mai na noqu voleka ni lutu tani, ki na dua na salatu ka sa vukei au me’u rawata e dua na noqu ivakadinadina vakataki au ka yaco me’u saumaki vakataucoko sara ki na kosipeli. Na qaqa ni noqu sere taleitaki ni Lalai, “Au Vakilai Koya,” ¹ a yaco me uasivi cake mai na qaqana walega ni dua na sere. Era yaco me veika au vakila ni ra tiko dina vei au.

Au dau masulaka na veika kece ena gauna oqo. E dina ga ni isau ni masu se na gauna e saumi kina e sega ni vaka na ka au gadreva, au se digitaka tikoga me’u rogoci Koya ni’u nanuma na vosa i Nifai: “Ia raica, au sa kaya vei kemudou mo dou daumasu tikoga ka kakua ni ceguoca” (2 Nifai 32:9).