Qiriti Au Taumada Mai

Mai vei Diana Loski, Pennsylvania, Amerika

Au marau ni’u sega ni vakayalia na madigi me’u vukea e dua na sisita ka gadrevi au ka’u gadrevi koya talega.

iVakatakilakila

e dua na marama qase cake kei na dua na marama gone erau veivosaki tiko

Ni’u a se tina gone ga vata kei na imatai ni luvequ, a se vuli tiko ena koliji na watiqu. Keirau a cakacaka va gauna me rawa ni sotavi kina na bula.

Ni’u vakanamata ki na dua na siga ni cegu mai na cakacaka, au a navuca me’u sarava e dua na iyaloyalo makawa ena retio iyaloyalo. Oqo ni se bera na DVD se veiqaravi ni yaloyalo ena initaneti.

Ena tekivu na iyaloyalo ena gauna vinaka duadua—10:00 ena mataka—na gauna ni moce nei luvei keirau tagane. E a vakaraitaki kina o Cary Grant, e dua vei ira na dau saravi ena iyaloyalo yavala e Amerika ka’u dau taleitaka.

Na bogi ni bera na siga me’u na cegu kina, a qiri mai na peresitedi ni iSoqosoqo ni Veivukei ni tabanalevu. E dua na marama ena neitou tabanalevu e a mate edua na yasa ni yagona ka gadreva na veiqaravi ena siga ka tarava me yacova ni sa suka mai ena cakacaka na luvena tagane.

“Au rawa ni cakava, ia e tiko na noqu vulagi,” a kaya na peresitedi ni iSoqosoqo ni Veivukei. A vakamacalataka ni sega tale ni dua e rawa ni kerea, ka lomasoli me meimei vei luvei keirau ni’u veiqaravi tiko vua na marama o ya. Au a vakadonuya ena yalo voraki.

Ena mataka ka tarava, au a laki biuti koya na luvei keirau tagane ka laki sikova na sisita. Na yacana o Louise, ka’u vakila vakasauri na noqu taleitaki koya. Sa qase toka o koya ka taba vata kei buqu, ka se qai mate wale toka ga.

Au a vukei Louise me vakaisulutaki ka vakarautaka na kena i katalau. A dabe yani ena dua na idabedabe ka sara iyaloyalo sara ena retio iyaloyalo. Sega ni dede sa 10:00 na kaloko ena mataka. Ni veisautaka tiko na jenala ena rimote, a kaya mai, “Na retio iyaloyalo oqo e sega ni dua na ka e rawa ni solia.”

Au a wawa vakalailai ka’u qai kaya, “E dua na iyaloyalo kei Cary Grant ena jenala 11.”

“E dina?” e a taroga mai. “Au taleitaki Cary Grant!”

Keirau sarava na iyaloyalo ka marautaka sara vakalevu. Ni oti oya, a wasea o koya na veika me baleta na nona bula ni a se tiko ena noqu itabayabaki. A tukuna vei au na veika me baleta na luvena tagane, ka’u tukuna vua me baleta na noqu. A tukuna o koya me baleta na Lotu kei na nona dau nanuma vakalevu.

Ni sa suka mai na luvena tagane, au a yalataka ni’u na lesu tale mai. Au tukuna vua na peresitedi ni iSoqosoqo ni Veivukei me qiriti au taumada mai kevaka e gadreva o Louise e dua.

Ena dua na gauna ena loma ni rua na macawa ka tarava, a tauvimata tale o Louise ka takali yani ni bera ni’u raici koya tale. Keirau se qai wasea vata ga e ciwa na auwa kei na dua na iyaloyalo, ia a yaco o koya me dua na itokani lomani. Au dau vakananumi koya vakawasoma.

Au vakavinavinaka ni’u sega ni vakayalia na madigi me’u vukea e dua na sisita ka gadrevi au—ka’u a gadrevi koya talega, dina ga niu a sega tu ni kila.