2022
E Rawa ni Vukei Keda na Kalou ena Veigauna Dredre
Maji 2022

“E Rawa ni Vukei Keda na Kalou ena Veigauna Dredre,” Liaona,, Maji./Epe. 2022.

iVakavuvuli ni Veiqaravi

E Rawa ni Vukei Keda na Kalou ena Veigauna Dredre

Ka rawa ni da vakayagataka na veika eda vulica mai na noda vakatovolei me da vukei ira kina na tani.

iVakatakilakila
na marama e dabe ka sarava tiko na dromu ni matanisiga e dela ni wai

iTaba mai na Getty Images

O Marcela Endrek, e dua na itaukei kei Órdoba, Argentina, a tauvimate ka rarawa. A vakavuna me bikai koya sara vakalevu. Ena nona nanuma ni sa sega na madigi me na vakacegui kina, a rogoca o koya e dua na vosa ni koniferedi e tukuni tiko kina na masu. A yaco mai vakadodonu ki yalona na vakasama o ya me masu vagumatua me baleta na nona leqa.

Sa tekivu me masu vakawasoma me vakacegui kina. Na masu a kauta mai vua na yalo vakacegu kei na veivakacegui dina ga ni a sega ni vinaka cake na nona bula. A yaco, me ca vakalevu tiko ga mai na ituvaki ni nona bula me yacova ni sa sega ni rawa ni cakacaka tale. Sa qai mai kuria tale oqo na lomaocaoca ni nona sega ni rawa ni sauma na veiqaravi vakavuniwai.

Ena vuku ni kena gadrevi, sa tekivu me vakadikeva e dua tale na sala e rawa ni na walia kina na leqa ni nona bula. A vakauqeti me vakanamata ena veisautaki ni so na ivakarau ni kana ka kurabuitaka na levu ni kena veivuke. A veivakurabutaki sara vakalevu na nona vakabulai mai ka sa tekivu me vulica vakatitobu na ka me baleta na kakana.

Ena dua na gauna e muri, a sotava o koya e dua na goneyalewa na yacana o Evelyn ena ituvaki vata ga a sotava o Marcela—tauvimate, rarawa, kei na nuiqawaqawa me saumi na vakatataro. A raica o Marcela ni sotava tiko na nona itokani vou na veika a sotava. A wasea eso na ka a vulica tiko me baleta na digitaki ni kakana kei na vakani ni yagoda. A wasea talega vei Evelyn na nona ivakadinadina me baleta na kaukauwa ni masu. A sureti Evelyn me masu me na vakila talega o koya na loloma ni Kalou ka kila ni o Koya e kauwaitaki koya tiko.

Ni oti e vica na siga, a marau vakalevu sara o Marcela ni raici Evelyn tale. E dua na veisau vakayago ka vakayalo talega sa laurai votu. O Evelyn a vakaraitaka vua ni nona bula sa veisau tiko ka sa rawa vua me vakila na loloma ni Kalou vei koya.

Mai na nona vakatovolei kei na bolebole, a rawa kina vei Marcela me dau yalololoma ka rawata na itukutuku e gadrevi me na vukei ira kina na tani.

Sereki Me Rawa Ni Da Veisereki

iVakatakilakila
A veisoliyaka yani o Josefa na sila ena gauna ni dausiga mai Ijipita

Josefa e Ijipita, mai vei Robert T. Barrett

Na italanoa kei Josefa e Ijipita e dua tale na ivakaraitaki ni veika e rawa ni yaco ni da sa nakita me da nuitaka na Kalou ni da noda vakatovolei: e sega walega ni rawa ni sereki keda o Koya, ia o Koya e rawa ni biuti keda ena itutu me vakayagataki kina na veika eda sa sotava oti me vukei ira kina na tani (raica nai Vakatekivu 37–45).

A nakita o Josefa me nuitaka na Kalou ka muria na Nona ivakaro veitalia na cakitaki, na veika a yali vua, kei na tiko vakavesu. Ena vuku ni nona vakabauta na Kalou o Josefa kei na nona lomasoli me vosota na nona vakatovolei ena yalovosota ka sega ni yaloca kina, “sa tiko vata kei Josefa ko Jiova” (Vakatekivu 39:21) ka biuti koya ena itutu me vakalougatataka e vuqa (raica na Vakatekivu 45:5–8).

iVakavuvuli me Vakasamataki

Ni o vakasamataka na nomu madigi mo veiqaravi vei ira na tani, vakasamataka na vei ivakavuvuli ka vakaraitaki ena vei italanoa oqo:

  • Na noda bolebole e rawa ni veivakalougatataki. Kevaka eda “masu tikoga, ka vakabauta” ni da sotava na noda bolebole, ena rawa ni vakayagataki ira na Tamada Vakalomalagi meda vinaka kina (raica na Vunau kei na Veiyalayalati 90:24; raica talega na Roma 8:28).

  • Na noda bolebole e rawa ni vakarautaki keda. Kevaka eda na yalomalua ena veivakatovolei, sa rawa vua na Kalou me vakayagataka na veika eda sotava me vakavulici keda ka veisautaki keda (raica na Vunau kei na Veiyalayalati 112:13).

  • Na noda bolebole e rawa ni yaco me madigi ni veiqaravi. Kevaka eda sa tuvakarau me da nuitaki Koya, ena biuti keda na Tamada Vakalomalagi ena itutu me da vakayagataka na veika eda sa vulica ena veika eda sa sotava me da vukei ira kina na tani (raica na Mosaia 24:13–14).

Na Cava E Rawa Ni Da Cakava?

Masulaka mo kila na sala e rawa ni vukei iko kina na veika o sa sotava oti mo vakalougatataki ira kina o veiqaravi vei ira. Mo qai dodoliga yani.

Tabaka