Lako Mai, Mo Muri Au

Na iVakatekivu 37–50

Veika e Tautauvata vei rau ko Josefa mai Ijipita kei Jisu Karisito

Na Veiyalayalati Makawa e tiko kina e vuqa na parofisai, italanoa, kei na ivakatakarakara eso ka tukuna taumada tu mai na bula kei na ilesilesi ni iVakabula, o Jisu Karisito. E dua vei ira na italanoa oqo sa ikoya na italanoa kei Josefa mai Ijipita.

na ivakatakarakara eso, me vaka na lami kei na ibuli madrai, me vakaraitaka na ka e tautauvata vei rau ko Josefa mai Ijipita kei Jisu Karisito

Droini mai vei Andrew Colin Beck

Josefa mai Ijipita	Jisu Karisito
O Josefa a dua na ivakatawa ni sipi (raica na i Vakatekivu 37:2).	E dua na yaca i Karisito sa ikoya na “ivakatawa vinaka” (Joni 10:11).
A volitaki o Josefa vaka bobula ki Ijipita (raica na i Vakatekivu 37:26–28).	A volitaki o Jisu me 30 na tiki ni siliva—na isau ni dua na bobula (raica na Lako Yani 21:32; Maciu 26:15).
O iratou na tuakai Josefa eratou a sega ni kilai koya ni ratou lako ki Ijipita me voli kakana (raica na i Vakatekivu 42:7–8).	O ira na tamata nei Karisito era a sega ni kilai Koya ni sa iVakabula (raica na Luke 4:22, 28–29; Joni 1:10).
O Josefa a vakatakilai koya vei iratou na tuakana ni ratou lesu mai me veivosaki kei koya ena ikarua ni gauna (raica na i Vakatekivu 45:1–5).	O Karisito ena vakatakilai vei Isireli ena iKarua ni Nona Lako Mai (raica na Maciu 24:30–31; Vunau kei na Veiyalayalati 88:104).
Ni vakamuri na veidusimaki ni Kalou, a tiko kina vei Josefa na madrai e veirauti me vakabulai Ijipita kina mai na dausiga (raica na i Vakatekivu 47:13–19).	O Jisu Karisito na “madrai ni bula” (Joni 6:35; raica talega na tikina e 51).

Veivosaki

Na veika tautauvata cava tale o raica vei Josefa mai Ijipita kei na iVakabula? Na cava o vulica mai na veivakatauvatani oqo ka vukei iko mo kila vakavinaka cake se vakavinavinakataka na iVakabula? E tiko tale beka eso na itukutuku ena Veiyalayalati Makawa e vakananuma vei iko na bula kei na ilesilesi i Karisito?