Vakavuvuli Taumada ni Kosipeli

Veiqaravi ena Veikacivi ni Lotu

O ira na iliuliu ni Lotu era na kerei ira na lewenilotu me ra veiqaravi ena veilesilesi vakatabakidua e vakatokai me “veikacivi.” Na veikacivi e solia vei ira na lewenilotu na madigi me ra qaravi ira na tani ka toro voleka yani vua na Kalou.

dua na turaga ena idabedabe qiqi e vakavulica tiko e dua na kalasi ni Lotu

iTaba mai vei David Bowen Newton

Ni da veiqaravi ena noda veikacivi, eda veivuke ena kena vakayacori na cakacaka ni Kalou. Eda vakavulici ira na tani me baleta na Tamada Vakalomalagi kei Jisu Karisito ka vukei ira me ra toro voleka yani vei Rau. Eda ciqoma talega na veivakalougatataki ni da veiqaravi ena yalodina.

Ciqomi ni Veikacivi

tucake tu na cauravou e matadra e dua na ivavakoso ni Lotu

O ira era veiqaravi ena Lotu era kacivi mai vua na Kalou. Era masuta na iliuliu ni Lotu na veivakauqeti me ra kila se o cei mera kerea me veiqaravi ena veikacivi yadua. Ena qai kerea na iliuliu e dua na lewenilotu me veiqaravi ka vakamacalataka vua na itavi ni veikacivi. Ena vuqa na veikacivi, era na tokoni na lewenilotu ena dua na soqoni ni Lotu. O ira na lewe ni tabanalevu se tabana era na veitokoni ena laveliga. Sa kena ibalebale oqo ni ra sa tuvakarau me ra tokona na tamata e kacivi. Ena qai soli vua na lewenilotu e dua na veivakalougatataki mai vua e dua na iliuliu ni matabete. Oqo e vakatokai me vakatikori. Ena soli vua na lewenilotu na lewa me cakacaka ena veikacivi kei na veivakalougatataki tale eso me vukei koya me veiqaravi.

Ira na Bisopi

Na bisopi e iliuliu ni dua na tabanalevu. (Ena dua na tabana, na peresitedi ni tabana e via tautauvata kei na dua na bisopi.) Ena vakatura na peresitedi ni iteki e dua na matabete bula kilikili me kacivi me bisopi. Na Mataveiliutaki Taumada ena vakadonuya na veikacivi. Ena qai tokoni ka vakatikori o bisopi me veiqaravi. E ciqoma talega na idola ni matabete, ka kena ibalebale ni tu vua na dodonu me liutaka na tabanalevu. Me vaka ni bisopi, ena veiqaravi ka veituberi vei ira kece na lewe ni tabanalevu.

Mataveiliutaki

Na kuoramu ni matabete kei na iSoqosoqo ni Veivukei, Goneyalewa, Lalai, kei na Matawilivola ni Sigatabu era liutaki mai vei ira na mataveiliutaki, e kena ivakarau me dua na peresitedi kei na rua na daunivakasala. Na mataveiliutaki ni kuoramu ni Talatala qase ena kacivi ka vakatikori mai na mataveiliutaki ni iteki. Eratou na kerea na matabisopi vei ira na lewenilotu me ra veiqaravi ena mataveiliutaki tale eso ena tabanalevu ka vakatikori ira kina. O ira kece na iliuliu era na qaravi ira na lewe ni nodra kuoramu se mataisoqosoqo. Era qarava na nodra gagadre na lewenilotu ka vukei ira me ra vakila na loloma ni Kalou.

marama e kauta na kakana vua e dua na tina e keveta tiko e dua na gone

Veikacivi Tale Eso

Na veikacivi tale eso ni Lotu e oka kina na veivakatavulici, veivuke ena sere kei na ivakatagi, maroroi ni ivolatukutuku, tuvai ni itaviqaravi baleti ira na itabagone se gonelalai, kei na veiqaravi ena veisala tale eso. Na veikacivi yadua ena Lotu e bibi ka solia vei ira na lewenilotu e dua na gauna vinaka me ra qaravi ira kina na tani ka qarava na Kalou. Ni da cakacaka vata kece me da vakayacora na noda veikacivi, eda na vaqaqacotaki ira na tani ka vukea na tubu ni Lotu.

Mai na iVolanikalou

Na veikacivi me veiqaravi ena Lotu e vu mai vua na Kalou (raica na Yavu ni Vakabauta 1:5).

Eda kacivi ka vakatikori ni bera ni da veiqaravi ena dua na veikacivi (raica na Vunau kei na Veiyalayalati 42:11).

Ni da veiqaravi ena noda veikacivi, eda vukea tiko na tarai cake ni Lotu (raica na Vunau kei na Veiyalayalati 84:109–10).

Vulici ni iVakarau ni Nomu Veikacivi

Na noda veikacivi sa ikoya e dua na madigi cecere ni veiqaravi vei ira na tani. Na veikacivi yadua e tiko na ituvatuva ni kena itavi, ka sa bibi kina me vulici ni o tekivu veiqaravi. Oqo eso na ivurevure me vukei iko:

• Veitalanoa kei na iliuliu ka solia vei iko na veikacivi. Taroga se na veituberi cava o rawa ni ciqoma.

• Raica na nomu veikacivi ena iVoladusidusi Raraba , ni Lotu sa vakarautaki tu ena ChurchofJesusChrist.org. E tiko kina na iwasewase nodra na iSoqosoqo ni Veivukei, kuoramu ni italatala qase, Lalai, kei na so tale.

• Ena ChurchofJesusChrist.org, kiliki ena “Callings” ena ruku ni Serve ena menu levu. Ena vakarautaka na itukutuku e baleta na nomu veikacivi.

• Masulaka na veivakauqeti ka vulica na ivolanikalou kei na vosa ni koniferedi raraba ni ko nanuma tiko na nomu veikacivi. Ena vakalougatataki iko na Tamada Vakalomalagi mo qaravi ira kina vakavinaka na Luvena.