O Vakasaqarai Karisito Tiko Beka E Veisiga?

Mai vei Orson S. Franco

Na veika au sotava ena valetabu a vukei au me’u kila ni dodonu me’u vakasaqara me’u kunei Karisito ena veisiga.

E vakaitikotiko mai Guatemala o koya e vola.

iVakatakilakila

wili ivolanikalou tiko e dua na itabagone qase cake e yasa ni katubaleka ka dola tu

Ni’u a se gonelailai, au dau taroga vei au na taro me vaka “E dau vosa beka na Yalo Tabu?” “Ni’u lako ki lomalagi, au na raica beka na Kalou?”

Ia oqo ni’u sa qase cake, au rawa ni railesu ka raica ni Tamada Vakalomalagi e dau dusimaki au ka vakaraitaka vei au na ivakadinadina ni bula tiko o Koya, ia au sega ni dau kila rawa na Ligana ena noqu bula. Au a kalougata ni’u a susugi cake ena dua na itikotiko vata kei na kosipeli vakalesui mai i Jisu Karisito, ia au a vakararavi ki na nodra ivakadinadina na tani ena dua na gauna balavu. E a dredre vei au me’u vakabauta ni bula dina tiko na Kalou.

Dua na siga, ni’u sa yabaki 15, a kacivaka na noqu bisopi e dua na ilakolako ni tabanalevu ki na valetabu. Au sa dau lako tiko ki na valetabu vata kei na noqu matavuvale, ka’u sega ni nanuma ni oqo e dua na ka levu. Au a sega vakadua ni bau vakila e levu na ka ka’u sega ni kila na bibi ni veiyalayalati kei na cakacaka vakalotu e vakayacori ena valetabu.

Ni yaco mai na siga, au a curuma na valetabu ka veisau ki na noqu sulu vulavula. Ni’u taubale sivita yani e dua na iloilo, au raica e dua na kequ i yaloyalo ni’u sulu vulavula tu ka matadredredre tale tu ga. Ni’u waraki ira tiko na vo ni noqu lewe ni tabanalevu, sa dua na ka na noqu qoroqoro. Au vakasamataka tiko na totoka ni tobu ni papitaiso kei na droini eso ka vakasauri, au vakila vakamalua na Yalotabu ni tara na yaloqu.

Au na sega vakadua ni guilecava na vosa e votu mai noqu vakasama: “I Osoni, oqo na vale ni Turaga. E lomani iko o Koya. E vinakata o Koya mo veisautaka na nomu bula ka segata mo yaco mo tamata vinaka cake vakalalai.”

Au vakila vakalevu na loloma ena veimalanivosa oqori ia au luvuci vakasauri ena yalo ni kilaiyaloqu. Au a se bera mada ni taura vakabibi na valetabu me yacova mai na gauna oqo. Au mani cavuta e dua na masu e yaloqu, ka kerea vua na Tamada Vakalomalagi me vosoti au.

Ka’u kila ni a rogoca o Koya na noqu masu baleta ni’u vakila na vakacegu levu e yaloqu.

Ena siga oya, au a vakatitobutaka na noqu vakabauta ka ciqoma na ivakadinadina dina ni kosipeli ka’u a gadreva tu mai. Ena siga oya, au a rawa ni vakadeitaka me vakataki rau na tisaipeli nei Joni: “Au sa kunea na Mesaia” (raica na Joni 1:41).

Na Sala Rawarawa Me Semati

Mai na veika au sotava oqo, au dau segata me’u kila vakavinaka cake na veivakayarayarataki ni Tamada Vakalomalagi ena noqu bula ena noqu vakasaqarai Jisu Karisito e veisiga. E dina ga ni na vakadredretaka na vuravura me rogoci na domo ni iVakabula ena so na gauna, ia oqo au sa kila ni bula dina o Koya ka sa tiko vata kei au o Koya.

E vuqa vei keda e tu na noda veisiga eda vakila ni da voleka cake yani ki lomalagi mai na kena ivakarau sa matau tu. E dau tiko talega na veisiga dredre eda dau tovolea kina me da vakila na Nona veivakayarayarataki se vakacava sara na i gu ni noda tovolea, ka tiko na veisiga osooso eda sega ni kunea rawa e dua na gauna me da vakasaqarai Koya kina. Ia au kila ni kevaka eda gadreva dina meda vakasaqarai Koya, eda na raica na Ligana ena noda bula.

Ni ko vakila ni ko tagutuvi mai vua na iVakabula, tarogi iko mada, Au sa saga tiko li me’u kunea na Mesaia ena veisiga yadua?

Ni da vakasaqara meda vakataki ira na iApositolo ena gauna makawa, biuta na noda lawa (raica na Maciu 4:20) kei na itavi kei na gagadre eso ena dua na gauna lekaleka ka gole Vua, eda na kunei Koya.

Era tu na ivurevure ni kaukauwa vakayalo e rawa ni vukei keda. E vakananumi keda na parofita ko Alama ni mai, “na ka lalai ka beci ena tubu mai kina na ka levu” (Alama 37:6). Na cakacaka lalai ni vakabauta kei na itovo vakayalo eda vakayacora e veisiga sa rawa ni vukei keda meda vakalevutaka na noda rawa ni kila na Turaga ena noda bula.

Na iyaragi eso ni cakacaka vakayalo oqo e rawa ni oka kina na:

Masu ena vakabauta
Na vulici ni ivolanikalou e nakiti ka vakaibalebale vakalevu
Qaravi ira na tani ena yalo ni guilecavi koya
Wasea na nomu ivakadinadina vua e dua na itokani
Vakarorogo ki na serenilotu se sereivakatagi vakayalo
Tauri kalasi ni inisitute
Maroroi na Siga ni Vakacecegu me ka tabu
Dau lolo
Lako ki na valetabu vakawasoma

E vuqa na ka e rawa ni vukei keda meda kunei Jisu Karisito, ia na idola sa ikoya me tomani tikoga noda vakasaqarai Koya. Me vaka a vakavuvulitaka ena dua na gauna walega oqo o Peresitedi Nelson, “Ni da saga meda tisaipeli i Jisu Karisito, sa gadrevi sara ki na noda sasaga meda rogoci Koya me sa lomada sara. Ena taura na vakasama donu kei na sasaga gugumatua meda vakasinaita noda bula e veisiga ena Nona vosa, Nona veivakavulici, Nona dina.” ¹

O Kunei Koya Beka Nikua?

Kevaka mada ga o se bera ni ciqoma na isaunitaro kece o vakasaqara tiko ena gauna oqo, toso tikoga! Vakasaqarai Karisito ga ka digitaka mo vakabauti Koya. Kevaka o na tovolea mo kunei Koya e veisiga ena cakacaka lalai, au kila ni ko na vakila na Nona veikaroni mai lomalagi. Au kila ni dina oqo baleta ni’u sa vakila oti.

Sa kila na Tamada Vakalomalagi na noda sasaga. E sega soti ni kauwaitaka vakalevu o Koya na levu ni veika eda cakava me tarai cake na yaloda kevaka eda rawa ni kaya ena veisiga ena yalodei ka dina: “Nikua au sa kunea na Mesaia!”

Sa noqu masu ni da na kila ka lomana na noda iVakabula e veisiga. Oqori eda na kitaka me vaka a vakatura o Moronai, mo dou “vakasaqarai Jisu” (Ica 12:41). O iko kei au me daru na kunei Jisu na kai Nasareci, ni oti na veisiga yadua, o Koya ka volavola kina ko Mosese kei ira na parofita eso. Ni da vakasaqarai Karisito, eda na raica na liga ni Kalou ena noda bula. Kei na levu ni noda vakasaqara na Karisito e veisiga, na levu ni noda kunei Koya ka rawa ni kila na Domona, ni liutaki keda ka dusimaki keda ena noda bula taucoko.