“Na Bukawaqa Veivakasavasavataki ni Veika Rarawa,” Liaona, Maji./Epe. 2022.
Na Bukawaqa Veivakasavasavataki ni Veika Rarawa
Sa noqu masu ni oi keda yadua eda na toro voleka yani vua na Tamada Vakalomalagi kei na iVakabula ena veika dredre yadudua eda sotava.
iTaba eso mai na Getty Images
Na veika dredre ni bula e sega ni dodonu me na vakidacalataki keda. Se vu mai na noda ivalavala ca kei na cakacala se mai na dua tale na ka, na veika dredre e tiki ni bula vakayago. Eso na tamata era nanuma ni dodonu me ra vakabulai mai na veikadredre kevaka era muria na ivakaro ni Kalou, ia sa ikoya “na lovo bukawaqa ni veivakararawataki” (Aisea 48:10; 1 Nifai 20:10) eda sa digitaki kina. A sega mada ga ni vakuwai kina na iVakabula:
“Ia sa dina ga sa Luvena ko Koya a sa vakatavulici ga ena ivalavala ni talairawarawa ni sa vosota tiko na ka rarawa;
“Ia ni sa vakarautaki oti sa yaco me vu ni bula tawamudu vei ira kecega sa talairawarawa vua” (Iperiu 5:8–9).
Kivei keda e tu na noda itavi, na dredre sa dau dua tu na tiki bibi ni noda yaco meda “uasivi sara.” Sa ikoya oqo na ka e uasivi cake kina na bula mai na dua na veitarogi rawarawa ga. Na Kalou e sega walega ni kauwai ki na veika eda cakava se sega ni cakava ia ena veika eda sa yacova tiko. 1 Kevaka eda sa tuvakarau, ena vakavulici keda o Koya meda cakacaka me vakataki Koya, ka kua ni vakatara edua tale na kaukauwa me vakatulewataka na noda bula (raica na 2 Nifai 2:14–16). E dodonu meda vulica meda bula dodonu ena ituvaki kece sara se, me vaka a kaya o Peresitedi Brigham Young (1801–77), io “ena butobuto” sara mada ga. 2
Au vakabauta ni bolebole meda qaqa ka tubu mai na veika dredre, e a taleitaki vei keda ni a vakaraitaka na Kalou na Nona ituvatuva ni veivueti ena vuravura taumada. E dodonu meda torova yani na bolebole oqori ni kua ena noda kila ni na tokoni keda na Tamada Vakalomalagi. Ia sa ka bibi sara meda golevi Koya. Ni sega na Kalou, na veika sotavi butobuto ni rarawa kei na veikadredre eda sotava ena vakavuna na yalolailai, mosi, kei na yalorarawa.
Ena veivuke ni Kalou, na vakacegu ena sosomitaka na vutugu, sautu ena sosomitaka na tiko yavavala, kei na inuinui ena sosomitaka na yaluma. Na Kalou ena saumaka na veivakatovolei ki na veivakalougatataki ka, ena vosa i Aisea, “solia … nai sala vakaiukuuku mei sosomi ni dravusa.” (Aisea 61:3). Sa Nona yalayala me kakua ni vakabulai keda mai na veisaqasaqa, ia me maroroi ka vakacegui keda ena noda vakararawataki ka vakayagataki ira na veika oqo me da tubu kina (raica na 2 Nifai 2:2; 4:19–26; Jekope 3:1).
E dina ni Tamada Vakalomalagi ena sega ni vakasaurarataka vei keda na Nona veivuke kei na veivakalougatataki, ena cakacaka o Koya ena loloma veivueti kei na loloma soliwale ni Luvena Daulomani kei na kaukauwa ni Yalo Tabu me tokoni keda ni da vakasaqarai Koya. Eda kunea e vuqa na ivakaraitaki ni veitokoni oya ni wavoliti keda tu ka kunei talega ena ivolatukutuku vakaivolanikalou.
iVakaraitaki eso mai na Veiyalayalati Makawa
Ena Veiyalayalati Makawa eda raica kina na talairawarawa nei Eparaama ni waraka tiko ena vosota e vuqa na yabaki na yalayala ni Kalou vua—na vanua ni ivotavota vakawa kei na kawa buladodonu—me vakayacori mai. Ena dausiga, veivakarerei ki na nona bula, rarawa, kei na vakatovolei, a vakararavi tikoga o Eparaama ka qarava na Kalou ka kena isau na nona a tokoni mai Vua. Eda sa rokovi Eparaama tu nikua ni sa “tama ni vakabauta.” 3
A dro mai vale na makubui Eparaama o Jekope, o koya ga kei na so tale na ka lalai mai na isulu e daramaka tu, me drotaka na veivakarerei ni veivakamatei nei tacina, o Iso. Ena loma ni 20 na yabaki ka tarava, a veiqaravi o Jekope vua na vugona, o Lepani. E dina ga ni a maroroi Jekope o Lepani ka qai solia e rua na luvena yalewa me vakamautaki rau, a cakacaka vakailawaki vei Jekope, ka veisautaka na kena isau kei na nodrau veidinadinati vakavica vata ena veigauna e vaka me sautu vakalevu kina o Jekope mai vua (raica nai Vakatekivu 31:41).
Ni rau sa veitalatala, a vosakudrukudru o Jekope vei tamai watina ka kaya, “Kevaka sa sega ni tiko vata kei au na Kalou ni noqu qase … ko sa qai vakatalai au wale tu ga” (Vakatekivu 31:42). Ia, me vaka ni Kalou a tiko vata kei koya, a lesu ki vale o Jekope ka veisautaki mai na dua na vulagi dravudravua ki na dua na tagane vakawati ka tama ni dua na matavuvale levu. A levu sara na nona tamata cakacaka ka vakalougatataki vakalevu ena levu ni nona gauna—qele ni sipi, qele ni manumanu, kei na kameli (raica na Vakatekivu 32).
O Josefa na luvei Jekope sa ivakaraitaki uasivi ni dua ka dau qaqa tikoga ena veigauna dredre ena nona vakararavi vua na Kalou ena gauna era a vakila beka kina eso ni ra sa biu tani mai Vua. Taumada, e a volitaki vakabobula mai vei iratou na tuakana. Ia, ni sa toso cake na nona itutu kei na nona rokovi ena vale ni nona turaga na kai Ijipita, o Potifa, a beitaki vakailasu o Josefa mai vua na wati Potifa ka vesu kina dina ga ni a drotaka na ivalavala ca. Ia, a vakararavi tikoga vua na Kalou o Josefa. A sautu o koya ena loma mada ga ni vale ni veivesu ia a guilecavi mai vei ira ka vukei ira, dina ga ni ra a yalataka mera nanumi koya. (Raica na Vakatekivu 37; 39–41.) Ena kena itinitini, me vaka eda kila, me kena i sau, a tosoi cake na itutu nei Josefa ka vakarautaki vua na sala me vakabula kina na matavuvale nei tamana (kei Ijipita taucoko) ena gauna ni dausiga.
Vosota Ena Yalovosota
Na ivakaraitaki oqo kei na ivakaraitaki tale eso e vakaraitaka vei keda ni dau taura na gauna me vorati kina na veika dredre. E gadrevi kina na vosota vakadede kei na gugumatua. Ia na Tamada Vakalomalagi e dau wanonovi keda ka vukei keda ena ilakolako ni vosota vakadede o ya—e sega ni waraka o Koya me yacova ni sa oti.
O Elder Neal A. Maxwell (1926–2004) ena Kuoramu ni iApositolo Le Tinikarua e a dikeva ena dua na gauna: “Vakaikoya, e dina sara, na toso ni gauna e sega ni kauta mai e dua na toso vakaikoya. Ia, me vaka na gone cidroi, eda dau gadreva vakalevu na ‘cakacaka nei gauna’ me rawa ni da kilai keda kina vakayalo. (Luke 15:17.) Na nodrau veivakaduavatataki vakaciriloloma o Jekope kei Iso ena vanua dravuisiga, ni oti e vuqa na yabaki ni nodrau veilecalecavi vakaveitacini, sa dua na ivakaraitaki uasivi sara. Na lomasoli e rawa ni sosomitaka na veicati. Na vakanananu titobu e rawa ni kauta mai na rai titobu. Ia na vakanananu titobu kei na noda ilovi keda vakai keda ena taura na gauna. E vuqa na icavacava vakayalo e gadrevi kina na dina veivakabulai me waki vata kei gauna, ka basika kina edua na wainimate ni bula, ka iwali cecere ni veileqa e vuqa.” 4
O Elder M. Russell Ballard na Peresitedi Vakatawa ena Kuoramu ni iApositolo Le Tinikarua, e kaya:
“Na waraka na Turaga e sega ni kena ibalebale meda wawa ka vakasavuliga tiko. Mo kakua vakadua ni nanuma ni ko tiko ena dua na rumu ni wawa.
“Na waraka na Turaga e vakatututaka meda cakacaka tiko. Au sa vulica ena veiyabaki ni noda nuitaki Karisito ena tubu ni da qaravi ira na tamata. …
“Na tubu vakatamata yadua ka rawa ni rawata e dua ni kua ni waraka tiko na Turaga kei na Nona yalayala e yaga vakalevu sara, ka sa gacagaca tabu ni Nona ituvatuva kivei keda vakayadua.” 5
Na vosota vakadede e dua na ivakarau ni gole ka vakararavi vua na Kalou. Ena veitikina ni bera na nona ivakasala meda kerekere vua na Kalou kevaka e lailai vei keda na vuku, e kaya vakaoqo o Jemesa me baleta na vosota:
“Dou nanuma me ka ni reki sara ni dou sa lutu ki na ka e vuqa sa dauveivakatovolei;
“Ni dou sa kila sa vakatubura na dauvosota na vakatovolei ni nomudou vakabauta.
“Ia me tini vinaka na cakacaka ni dauvosota, mo dou vinaka taucoko sara kina, me kakua na ka e [yali]” (iVakadewa i Josefa Simici, Jemesa 1:2 [ena Jemesa 1:2, vakamacala e botona a]; Jemesa 1:3–4).
Vakasavasavataki mai na Veika Rarawa
iTaba mai vei Rachael Pancic
Ni veivuke vei keda na Tamada Vakalomalagi, ena vakasavasavataki keda na veika dredre kei na veika rarawa ka sega ni na vakadrukai keda (raica na Vunau kei na Veiyalayalati 121:7–8). Eda na yaco me tamata mamarau ka savasava cake. Ena dua na ivakatakila vua na Peresitedi ni Kuoramu ni iApositolo Le Tinikarua ena gauna oya, o Tomasi B. Masi, na Turaga a tukuna vakaoqo baleti iratou na Nona iApositolo: “Ia ni sa oti na nodra vakatovolei, kei na nodra vakararawataki, raica koi Au na Turaga, au na qai lako yani vei iratou ka vakataudeitaki iratou, ia kevaka eratou na sega ni vakaukauwataka na lomadratou, ka vakadomoqataki iratou vei au, eratou na saumaki mai, ka’u na vakabulai iratou.” (Vunau kei na Veiyalayalati 112:13).
Eda rawa ni tukuna ni ena dela ni veika rarawa eda mai kila kina “na Kalou dina duadua ga, kei Jisu Karisito, o [Koya ko] ni a tala mai” (Joni 17:3). Ena gauna ni dredre, eda lako vata kei Rau ena veisiga. Ni da vakayalomalumalumutaki, eda vulica meda rai vei Rau “ena vakasama kecega” (Vunau kei na Veiyalayalati 6:36). Era na qaravi keda ena dua na iwalewale ni sucu tale vakayalo. Au vakabauta ni sega ni tiko edua tale na sala.
Sa noqu masu ni oi keda yadua eda na toro voleka yani vua na Tamada Vakalomalagi kei na iVakabula ena veika dredre yadudua eda sotava. Ena gauna vata oqori, me da vulica me da qaravi ira na tani ena veika dredre era sotava me vaka na ivakarau ni Kalou. Ena nona “sotava na mosi kei na veika rarawa kei na veivakatovolei kecega” a yaco vua na iVakabula me “kila na sala me vukei ira kina na nona tamata me vaka na nodra veimalumalumu” (Alama 7:11–12). Ia vei keda, “ena dua na tiki ni gauna, ka da sega ni sotava tiko kina na veika rarawa e dodonu me da vukea e dua ka sotava tiko na veivakatovolei—meda sinai ena yalo ni veinanumi ka dulaka yani na veivakabulabulataki vakayalo.” 6