Au na Lako Tani Beka?

Mai vei Sandra Martinez, Wisconsin, Amerika

Ni oti na noqu veiwalitaki ena dua na itaviqaravi ni iSoqosoqo ni Veivukei, e a tiko e dua na digidigi me’u vakayacora.

iVakatakilakila

marama e raica tiko na itaba ni iVakabula

iTaba vakarautaka o koya ka tabaki

Ni oti ga vakalailai noqu lewena na Lotu, a veiwalitaka tiko e dua na iliuliu ni iSoqosoqo ni Veivukei e dua na ituvaki lasa. Vakasauri sara sa tekivu me veiwalitaki au e matadra na tamata kecega. Au a logaloga ca kina ka vakalaiva ga me’u veiwalitaki.

Na imatai ni ka au a nanuma o ya me’u sa na kua ni lesu tale mai ki na tabanalevu o ya. Au a dolava na noqu ivolanikalou, ka tovolea me’u kunea na veivakacegui. Ni’u wilika tiko, au raica sara e dua na tikina a taroga o Jisu vei ira era tarabe ena Nona ivakavuvuli, “Dou sa via lako tani talega koi kemudou?” (Joni 6:67).

Ena gauna vata oya, au a kaya e lomaqu, “Sega, au na sega ni lako tani!”

Au qirita na peresitedi ni iSoqosoqo ni Veivukei, ka vakatura mai me’u qirita na marama a veiwalitaki au. Au a qiriti koya ka vakaraitaka vua na lomaqu. Keirau duavata ni yalo ni veiwali e vinaka ia meda kakua ga ni veiwalitaka e dua eda sega ni kila e matadra e dua na ilawalawa tamata. Keirau veitalanoataka talega na noda dau nanumi ira na lewe ni tabanalevu vou.

Au a tomana tiko na noqu lewena na tabanalevu o ya ena gauna au a tiko kina ena siti o ya. E vuqa na ka totoka au a sotava ni oti na noqu saumaki ki na kosipeli.

Ena noqu ilakolako vakai au ena vorati ni caka cala, au kunea na veivosa veivukei oqo mai vei ira na noda iliuliu ni Lotu:

“Kevaka e dua na tamata e kaya se cakava e dua na ka eda nanuma ni veivakatarabetaki, na imatai ni noda itavi sa ikoya meda kakua ni ciqoma na ca ka qai veitaratara vata taudua ga, ena yalodina, ka vakadodonu sara kei koya na tamata o ya.” ¹

“Au sa yalataka vei kemuni, ni ko ni sa digitaka mo ni kakua ni vakatarabetaki … , ko ni na vakila na loloma kei na veivakadonui ni [iVakabula].” ²

Au vakavinavinaka ni’u a digitaka me’u kakua ni biuta na Lotu ena dua na vosa ka tauci vakasabalia. Ka’u vakavinavinaka ni’u lewena na Lotu vakalesui mai, ka’u ciqoma kina na kaukauwa me’u yalodina ka tomana tiko na lako ena salatu ni bula vakatisaipeli. Au vakavinavinakataka na nodra ivakasala na parofita kei na iapositolo, ka vakavulica vei keda na sala meda veimaliwai kina kei ira na tacida kei na ganeda ena kosipeli.

Au rawa ni tomana tiko na noqu yalodina ka digitaka me’u kakua ni vakacudrui. Au rawa ni vakanamata ena noqu sasaga me’u vakataki Karisito ka vakila na loloma kei na veivakadonui ni iVakabula.

Au na lako tani beka? Sega. Au vakadinadinataka ni oqo na Lotu vakalesuimai i Jisu Karisito e vuravura nikua ka sa tu kina “na vosa ni bula tawamudu” (Joni 6:68).