Meda Sikova Mada na Valetabu

Mai vei Luz Stella de Berrio Arenas, Bogotá, Colombia

Ni’u masu me’u kila na sala au rawa ni vukei tinai watiqu kina, au vakasamataka sara na valetabu.

Ena gauna ni matedewa na COVID-19, a sogo kina na Valetabu e Bogotá Colombia. Baleta ni’u sa sega ni lako rawa, ena so na gauna au dau raitayaloyalotaka ni’u curuma tiko na valetabu, ni’u vakananuma na veiqaravi au a vakayacora e kea vaka-liganicakacaka ni valetabu.

A tauvimate bibi sara o tinai watiqu ni oti ga vakalailai na kena tekivu e Colombia e dua na sogosogo ena vuku ni COVID-19. Ni’u masu me’u kila na sala au rawa ni vukei koya kina, au vakasamataka sara na valetabu.

Ni’u vakasamataka na valetabu, au vakila na veivakauqeti ni Yalo Tabu me’u tarogi tinai watiqu kevaka e vinakata me sikova ena nona raitayaloyalotaka “e dua vei ira na vanua totoka duadua e vuravura” vata kei au.

Ena domo malumalumu, a sauma mai o koya, “Io.”

Keirau raitayaloyalotaka tekivu mai nona vale e Medellín, ka gole yani ki na noqu vale mai Bogotá, ka yaco yani ki valetabu. Keirau raitayaloyalotaka ni keirau curu ka veiqaravi ena valetabu. Keirau raitayaloyalotaka ni keirau dabe vata ena rumu vakasilesitieli, ka cavuta e dua na masu ni vakavinavinaka vua na Turaga.

Ni oti o ya, keirau a vakatakekere vua na Tamada Vakalomalagi, me yaco na Nona lewa, me vakalesui tale vua na bula vinaka ka qai vakatarai me lesu vakayago tale ki na valetabu. Sa dua na ka sotavi duatani duadua, ka bibi ka vaqaqacotaki koya ka vakayaloqaqataki koya talega.

E dua na italanoa baleta na iVakabula ka tarai au vakalevu duadua e yaco ena korolevu o Kapenaumi. E vakavulica vei keda na italanoa oqo ni Turaga e rawa ni vakalougatataki ira ka vakabulai ira na tani ena veivuke mai vei ira na lewe ni matavuvale kei na itokani.

Ni ra sa kila na tamata e Kapenaumi ni o Jisu a tiko ena dua na vale, era qai kauta mai vua e dua na tamata tauvi paralasi.

“Ia ni ratou sa sega ni torovi koya rawa e na vukudra na lewe vuqa, e ratou sa basuka na dela ni vale sa tiko kina ko koya: ia ni ratou sa basuka rawa, e ratou sa tukuca sobu nai mocemoce sa davo kina ko koya sa tauvi paralasi.”

Ni sa raica o Jisu na nodratou vakabauta, a kaya vua na tamata o Koya, “Tucake, ka kauta na nomu imocemoce, ka lako ki na nomu vale.” (Raica na Marika 2:1–11.)

Me vakataki koya na tagane paralasi, a vakabulai o tinai watiqu ena kaukauwa ni iVakabula mai na dua na veivakalougatataki ni matabete kei na nona vakabauta kei na vakabauta ni matavuvale kei na itokani.

Ena veigauna veilecayaki oqo, au kila ni rawa ni da ciqoma na veidusimaki me da vaqaqacotaki ka vakayaloqaqataki ira era vakaleqai tu. Kevaka eda vuki vua na Tamada Vakalomalagi ka dau nanumi Koya kei na Luvena, eda rawa ni rawata na vakacegu, inuinui, kei na veivakabulai.