NGAAHI PEESI FAKALOTOFONUÁ
Lea ʻa ʻEletā Natalesi ki ha Toʻu Tupu ʻe Toko Tahaafe Tupu ʻi Haʻamoa ʻAmelika
Naʻe laka hake he kakai kei talavou ʻe toko tahaafe naʻa nau fakafonu ʻa e Senitā Fakasiteiki Pago Pago Lotolotó ʻi he efiafi Sāpate, ko hono 7 ʻo Nōvema, ke fanongo ki he taki ʻo e Siasí ʻoku ʻaʻahi mai, ko ʻEletā K. Puleti Natalesi.
Ko ʻEletā Natalesí ko e Tokoni ʻUluaki ia ʻi he Palesitenisī Fakaʻēlia ʻo e Pasifikí ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
Naʻe lea foki mo ʻEletā Faʻapito Auapaʻau, ʻo e Fitungofulu Fakaʻēliá ʻi he fakataha lotu ʻa e toʻu tupú.
Naʻe haʻu ʻa e kau toʻu tupú mei he ngaahi haʻofanga lotu ʻi he motú kotoa ʻi he siteiki ʻe nima ʻi Haʻamoa ʻAmeliká.
Naʻe pehē ʻe ʻEletā Natalesi, “Kuo ʻomi ʻe Palesiteni Nalesoni ha faleʻi fakapalōfita ki he māmaní lolotonga e ngaahi taimi faingataʻa ko ʻení. ʻOku fie maʻu ke tau tui kia Sīsū Kalaisi. Pea, kuo pau ke tau manatuʻi maʻu pe hotau tuʻunga ko e ngaahi foha mo e ngaahi ʻofefine ʻo e ʻOtuá, pea mo ʻetau taumuʻa fakalangí.”
Naʻá ne hoko atu: “Naʻe ʻomi ʻe he toʻu tupu ʻi he fakataha lotú ha ngaahi fakakaukau fakalaumālie. Ko kinautolu ʻa e kahaʻu ʻo e Siasí. Ko ha tāpuaki maʻongoʻonga ia ke fealēleaʻaki mo ako meiate kinautolu. ʻOku mālohi ʻenau tui kia Sīsū Kalaisí pea ʻoku fotu nāunauʻia honau kahaʻú.”
Naʻe pehē ʻe ha taha ʻo e kau takí, “Naʻa nau tohoakiʻi ʻa e tokanga ʻo e toʻu tupú ni ke nau tohoakiʻi ʻenau tokangá ʻi ha houa ʻe taha mo e konga, ʻo akoʻi kiate kinautolu ʻa e ngaahi tefitoʻi moʻoni ʻo e ongoongoleleí ʻo fakafou ʻi he ngaahi akonaki ʻa e Palesiteni ʻo e Siasí, Lāsolo M. Nalesoni mo e kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá.”
Naʻe pehē ʻe ha talavou ʻe taha mei he Uooti Malaeimí naʻá ne ʻilo ai “ko e hala ki he Puleʻanga ʻo e ʻOtuá ʻoku fou ia ʻi he Temipale Māʻoniʻoní.”
Naʻe pehē ʻe ha finemui mei he Siteiki Pago Pago Hihifó, “ʻI heʻeku faʻa lotu mo ongoʻi e laumālie ʻo e ʻEikí, ʻe lava ke ongo kiate au ke u ʻiloʻi ʻoku ʻi ai maʻu pē ʻa Sīsū maʻaku.”
Ko ha polokalama fengāueʻaki lahi ia, ʻi he lue atu ʻa ʻEletā Natalesi ʻi he loto holó ke fanongo ki he ngaahi tali mei he toʻu tupú ʻi heʻene fai ange ha ngaahi fehuʻi fekauʻaki mo e founga ʻoku nau fakamuʻomuʻa ai e Fakamoʻuí ʻi he uho ʻo ʻenau moʻui.