“Kanunay nga Mohinumdom Kaniya”, Liahona, Abr. 2022.
Kanunay nga Mohinumdom Kaniya
Kon mas kanunay nato nga gihinumdoman ang Ginoo, mas dugang nga gahom ang maanaa kanato aron magpabilin sa insakto nga dalan, mohimo sa unsay Iyang gilaoman gikan kanato.
To Always Remember Him [Sa Kanunay Mohinumdom Kaniya], ni Walter Rane, dili mahimong pakopyahan
Atong nakat-onan diha sa mga kasulatan ang kabahin sa balik-balik nga hitabo sa pag-uswag ug garbo nga nakaapektar sa mga anak sa Dios sa tibuok kasaysayan sa tawo. Sa dihang ang katawhan nahinumdom sa Ginoo, sila miuswag. Apan sa dihang sila nakalimot Kaniya, sila natagak ngadto sa balik-balik nga hitabo sa garbo tungod sa ilang mga katigayonan, paglambo sa teknolohiya, ug mga kahigayonan sa edukasyon. Isip resulta, sila nahimo nga katawhan nga misalikway sa Ginoo ug sa Iyang mga pakigsaad.
Atong ikonsiderar ang usa sa mga pakigsaad nga atong gihimo matag semana sa atong pag-ambit sa sakramento—ang pakigsaad nga “sa kanunay mohinumdom kaniya,” ang Manluluwas (Doktrina ug mga Pakigsaad 20:77, 79). Kini nga pakigsaad gibalik sa duha ka pag-ampo sa sakramento. Ang mahinungdanon nga pulong niini nga pakigsaad mao ang mohinumdom.
Ang pulong nga mohinumdom makita sa gatosan ka higayon diha sa mga kasulatan. Sa karaang Israel, ang mohinumdom gigamit sa daghang higayon aron matabangan ang katawhan sa Ginoo nga makahinumdom kon unsa ang Iyang gibuhat kanila sa nangaging mga panahon. Kini gani mas komon pa nga gigamit diha sa konteksto sa mga pakigsaad nga gihimo sa Ginoo uban sa Iyang katawhan.
Ang mga anak ni Israel, sama sa kadaghanan karon, maglisod sa paghinumdom sa Ginoo ug sa Iyang mga sugo, ug tungod sa ilang kamalimtanon, kanunay sila nga nag-antos sa sakit nga mga sangpotanan. Mao kana ang usa sa mga rason ngano nga ang Ginoo migamit sa pulong nga mohinumdom. Pananglitan, ang panaw gikan sa Israel paingon sa Ehipto nagsugod sa usa ka sugo nga “hinumdomi ninyo kining adlawa, nga maoy inyong pagbiya sa Ehipto, diin kamo giulipon kay gipagawas kamo sa Ginoo pinaagi sa Iyang talagsaong gahom” (Exodo 13:3).
Ang Iningles nga pulong nga mohinumdom gikan sa Latin nga pulong nga memor ug nagpasabot nga “pagmahunahunaon sa.” Niini nga konteksto, ang pulong nga mohinumdom nagpasabot sa pagkaanaa sa hunahuna o paghunahuna sa namatikdan nga usa ka tawo o usa ka butang nga nakita, nahibaloan, o nasinati sa nangagi. 1 Adunay lig-on nga relasyon tali sa emosyon nga gibati ug sa moresulta nga panumdoman. Busa, kon mas lig-on ang emosyon, mas klaro ug mas adunay impluwensiya ang panumdoman. Sa Hebreohanon nga konteksto, ang pulong nga mohinumdom naglangkob sa usa ka kahibalo nga gikuyogan sa nahiangay nga aksiyon. Sa ingon, ang pagbuhat usa ka mahinungdanon nga bahin sa paghinumdom.
Kon mas kanunay nato nga gihinumdoman ang Ginoo, mas dugang nga gahom ang maanaa kanato aron magpabilin sa insakto nga dalan, mohimo sa unsay Iyang gilaoman gikan kanato. Niini nga panabot, kon kita moambit sa sakramento, kita mosaksi ngadto sa Dios, ang Amahan sa Kahangtoran, nga kita mohinumdom sa Manluluwas diha sa atong mga hunahuna ug diha sa atong mga kasingkasing sa tanan nga mga panahon ug sa tanan nga mga dapit. Kita misaad nga atong tipigan sulod sa atong mga kasingkasing ang klaro nga mga emosyon ug mga pagbati sa pasalamat alang sa Iyang sakripisyo, Iyang gugma, ug Iyang mga gasa alang kanato. Kita usab misaad nga atong buhaton kini nga mga panumdoman, mga pagbati ug mga emosyon.
Ang Ngano, Unsaon, ug Unsa ang buhaton sa Paghinumdom Kaniya
He Is Not Here [Wala Na Siya Dinhi], ni Walter Rane, dili mahimong pakopyahan
Usa ka tuig human sa pag-organisar sa Ang Simbahan ni Jesukristo sa mga Santos sa Ulahing mga Adlaw, ang Ginoo mihatag ni Joseph Smith og pagpadayag nga naghatag kaniya og mas lapad nga dimensiyon sa pakigsaad nga mohinumdom Kaniya sa kanunay:
“Kamo mohalad og usa ka sakripisyo ngadto sa Ginoo nga inyong Dios diha sa pagkamatar[o]ng, gani niana nga usa ka masulub-on nga kasingkasing ug usa ka mahinuls[o]lon nga espiritu.
“Ug nga kamo mahimo unta nga labaw nga moamping sa inyong mga kaugalingon nga walay buling gikan sa kalib[o]tan, ug kamo moadto sa balay alampoanan ug mohalad sa inyong mga sakramento diha sa akong balaan nga adlaw; …
“Bisan pa niana ang inyong ligdong nga mga panaad ihalad diha sa pagkamatar[o]ng sa tanan nga mga adlaw ug sa tanan nga mga panahon;
“Apan hinumd[o]mi nga dinhi niini, nga adlaw sa Ginoo, kamo mohalad sa inyong mga halad ug sa inyong mga sakramento ngadto sa Labing Halangdon, mok[o]mpisal sa inyong mga sala ngadto sa inyong mga kaigsoonan, ug sa atubangan sa Ginoo.” (Doktrina ug mga Pakigsaad 59:8–9, 11–12).
Pinaagi niini nga pagpadayag, ang Ginoo nagtudlo kanato kabahin sa ang ngano, ang unsaon, ug ang unsa ang buhaton aron kanunay nga mohinumdom Kaniya.
-
Ang ngano: nga “labaw nga moamping sa inyong mga kaugalingon nga walay buling gikan sa kalib[o]tan.”
-
Ang unsaon: nga “ang inyong ligdong nga mga panaad ihalad diha sa pagkamatar[o]ng” uban sa “usa ka masulub-on nga kasingkasing ug usa ka mahinuls[o]lon nga espiritu.”
-
Ang unsa: nga “mohalad sa inyong mga halad ug sa inyong mga sakramento ngadto sa Labing Halangdon, mok[o]mpisal sa inyong mga sala ngadto sa inyong mga kaigsoonan, ug sa atubangan sa Ginoo.”
Kini nga kasulatan naghisgot sa pulong nga mga halad. Diha sa mga kasulatan, ang mga halad nagpasabot og hingpit nga debosyon ngadto sa Ginoo, mohalad Kaniya og usa ka masulub-on nga kasingkasingug ug mahinuls[o]lon nga espiritu. Kini usab nagpasabot og bisan unsa nga sakripisyo nga atong gihimo alang sa Ginoo. Sa ingon, ang pakigsaad nga kanunay nga mohinumdom Kaniya may kalambigitan sa pagsakripisyo sa tanang butang alang sa Ginoo uban sa usa ka masulub-on nga kasingkasing ug mahinuls[o]lon nga espiritu. Kining tanan mikompirmar nga ang paghinumdom sa Manluluwas mao ang pagbuhat sa mga butang nga mopahilayo kanato sa dalan sa pagkamatarong.
Pagkabililhon sa gasa nga gihatag kanato samtang kita moambit sa mga simbolo sa gipikas-pikas nga lawas ug sa gipaagas nga dugo sa Agalon sa Iyang adlaw nga Igpapahulay. Samtang kita moambit sa sakramento, mikaon kita sa gipikas-pikas nga pan isip paghinumdom sa Iyang lawas. Moinom kita sa tubig isip paghinumdom sa Iyang dugo, nga gipaagas alang kanato. Ug kita mipakigsaad uban sa Ginoo nga kita kanunay nga mohinumdom Kaniya.
Dayon kita modawat sa nindot kaayo nga saad nga “sa kanunay makabaton sa iyang Espiritu uban [kanato]” (Doktrina ug mga Pakigsaad 20:77; tan-awa usab sa bersikulo 79) kon kita molihok sa atong pakigsaad. Ang pag-ambit sa sakramento gihatagan gayod og dakong importansiya sa atong Langitnong Amahan nga kita giawhag sa pag-ambit niini matag Dominggo.
Akong minahal nga kahigalaan, ang pakigsaad nga kanunay nga mohinumdom Kaniya kinahanglan nga moimpluwensiya ug modasig kanato sa matag desisyon ug aksiyon sa atong mga kinabuhi. Si Haring Benjamin mitudlo:
“Busa, ako manghina[o]t nga kamo kinahanglan modala diha kaninyo sa ngalan ni Kristo, tanan kamo nga nakasulod ngadto sa pakigsaad uban sa Dios nga kamo kinahanglan magmasulundon ngadto sa katap[o]san sa inyong mga kinabuhi. …
“Ug ako manghina[o]t nga kamo kinahanglan mahinumdom usab, nga kini mao ang ngalan nga ako miingon nga ako kinahanglan mohatag nganha kaninyo nga dili na pagapapason, gawas kon kini pinaagi sa kalapasan; busa, pagmatngon nga kamo dili makalapas, nga ang ngalan dili mapapas gikan sa inyong mga kasingkasing” (tan-awa sa Mosiah 5:8, 11).
Sa ingon, ang paghinumdom sa Manluluwas matag adlaw makaapektar sa matag desisyon nga atong himoon. Kini makaapektar, pananglitan, unsaon nato sa pag-istorya; unsay atong pilion nga buhaton, tan-awon, basahon, ug paminawon, ug unsaon nato sa pagtratar ang matag usa. Ako makapanigurado ninyo nga ang Ginoo Mismo modasig niini nga mga desisyon, mogiya kanato sa atong mga hagit, ug mosiguro nga ang resulta mahimong positibo.
Base sa reyalidad sa Pag-ula ni Jesukristo, ang kinabuhi adunay mahangtoron ug balaan nga mga posibilidad alang niadtong kanunay nga mohinumdom Kaniya. Kini dako kaayo og importansiya sa paghinumdom sa atong mga pagbati kon kita moambit sa sakramento. Kita nag-andam alang sa kinabuhing dayon ug kahimayaan samtang kita moambit sa sakramento ug mosaad nga mohinumdom sa Manluluwas diha sa atong mga kasingkasing ug mga hunahuna, nakahibalo nga ang paghinumdom Kaniya makatabang sa paggiya kanato sa matag desisyon ug aksiyon.
“Ako Nagpabilin nga Natingala”
Ako modapit kaninyo sa pag-apil kanako sa pagpamalandong sa epekto niini nga mahinungdanong baroganan diha sa atong personal nga mga kinabuhi. Palihog ikonsiderar ang pipila ka butang nga atong mabuhat aron kanunay nga mohinumdom ni Jesukristo kada adlaw. Ang Manluluwas miingon, “Kamo akong mga higala, kon buhaton ninyo ang gisugo ko kaninyo” (Juan 15:14).
Ang atong Manluluwas nga si Jesukristo nadasig tungod sa Iyang pasalig nga kanunay nga mohinumdom sa Amahan ug sa pagbuhat kanunay sa kabubut-on sa Dios tungod sa Iyang walay kataposan nga gugma sa Dios ug kanato. Ang Iyang sinsero nga pag-ampo sa Getsemani nagbalik-balik pa gihapon sa akong hunahuna: “Amahan ko, mahimo mo ang tanan. Kuhaa kining k[o]pa gikan kanako. Apan dili ang akong pagbuot maoy matuman kondili ang imo” (Marcos 14:36).
Kon lahion og sulti ang mga pulong sa himno nga “Ako Nagpabilin nga Natingala,” 2 ako nahingangha, nahibulong sa higayon dihang si Jesus, gilansang sa krus, nga miingon, “Amahan, pasayloa sila; kay wala sila masayod sa ilang gibuhat” (Lucas 23:34).
Ako nagpabilin nga natingala, nahibulong nga alang kanako Siya gilansang, nga kanako, nga usa ka makasasala, Siya, nag-antos, Siya nasamdan, Siya namatay ug Siya nabanhaw. Ug misaad Siya kanako nga kon ako adunay mahinulsolon nga espiritu, moangkon sa akong mga sala ug mga pagkulang, ug kon ako andam nga maghinulsol, mohigugma sa mga anak sa Dios sama sa paghigugma sa Manluluwas kanila, ang Ginoo mosiguro sa akong kapasayloan ug sa akong luna sa Iyang kiliran.
Mobati sa Gugma sa Manluluwas
Kanunay nga mohinumdom ug moila sa Manluluwas diha sa inyong mga kinabuhi. Kanunay nga mohinumdom nga moduol ngadto Kaniya, motugot sa Iyang impluwensiya nga mogiya sa inyong mga hunahuna, inyong mga pagbati, ug sa inyong mga desisyon, ug mosunod Kaniya kanunay. Kanunay nga motan-aw Kaniya panahon sa kasakit, sa mga higayon sa mga kalisod, sa mga higayon sa depresyon, ug sa mga higayon sa mga hagit. Mobati sa gugma sa Manluluwas ug sa Iyang tinud-anay nga pagpakabana alang sa imong kaayohan.
Ako mangamuyo kaninyo sa paghinumdom nga kamo bililhon nga mga anak sa atong Langitnong Amahan, giandam nga moari sa kalibotan niini nga punto sa kasaysayan. Hinumdomi nga kamo gipili sa Amahan nga moabot niini nga panahon tungod kay kamo adunay gahom sa pag-atubang sa mga hagit niini nga katuigan. Palihog hinumdomi nga ang kalipay ug kalinaw niini nga kinabuhi ug sa kinabuhi nga moabot nakadepende sa matag adlaw nga paghinumdom sa Manluluwas ug sa imong mga pakigsaad Kaniya.
Gikan sa usa ka debosyonal nga pakigpulong nga gihatag sa Brigham Young University pagka Pebrero 5, 2019.