Digital Lamang
Pangandam alang sa Sakramento sa Tibuok Semana
Pagsunod kang Jesukristo sa matag adlaw makapahimuot sa atong kinabuhi.
Paghulagway pinaagi ni Joshua Dennis
Usa ka mahinungdanong rason nga nagpundok kita sa Igpapahulay mao ang “mohalad sa inyong mga sakramento diha sa balaan nga adlaw [sa Ginoo]” (Doktrina ug mga Pakigsaad 59: 9). Mahinungdanon kini nga panahon sa semana aron mamalandong kang Jesukristo ug sa Iyang Pag-ula ug sa pagbag-o sa atong pasalig sa pagpuyo sa ebanghelyo ug mosunod sa plano sa Langitnong Amahan, nga makapahimo kanato sa pagbalik ngadto Kaniya.
Si Elder Jeffrey R. Holland sa Korum sa Napulog Duha ka Apostoles miingon nga ang atong mga miting sa simbahan sa Igpapahulay gihimo aron sa paghatag og gibug-aton “sa sakramento sa Panihapon sa Ginoo isip ang sagrado, giila nga maoy sentro sa atong sinemana nga kasinatian sa pagsimba.” 1
Gani bisan sa kamahinungdanon sa sakramento, kita usahay malinga pa sa saag nga mga hunahuna ug mga kabalaka atol sa pagpahigayon niini nga ordinansa. Wala kaha tingali kita nakatutok lamang sa kamahinungdanon sa unsay atong gibuhat.
Unsaon nato sa pagpangandam sa atong mga hunahuna ug mga kasingkasing aron hingpit nga mosimba sa Ginoo atol sa pagpahigayon sa sakramento? Unsaon nato sa pagpangandam sa Dominggo ug sa tibuok semana kon daghan kaayong mga kabalaka ug mga responsibilidad nga anaa sa atong mga abaga? Aniay lima ka ideya sa paghimo sa sakramento nga labing sagrado nga kasinatian.
1. Tinguhaa ang pagsunod ni Kristo sa tanan ninyong buhaton.
Si Elder Alfred Kyungu sa Seventy miingon: “Ang pagkahimong sumusunod ni Kristo mao ang pagpaningkamot nga maparehas ang atong linihokan, kinaiya, ug kinabuhi ngadto sa Manluluwas. Kana mao ang pag-angkon og mga hiyas. Kana mao ang pagkahimong tinuod nga disipulo ni Jesukristo.” 2
Ang Langitnong Amahan ug ang Manluluwas kinahanglan nga maoy sentro sa atong kinabuhi. Isip kabahin sa atong pakigsaad nga sa kanunay mohinumdom ni Jesukristo (tan-awa sa Doktrina ug mga Pakigsaad 20:77, 79), makahimo kita sa atong pinaka maayo matag adlaw sa pagsunod Kaniya. Kon magpuyo kita niini nga paagi, Siya mopanalangin kanato, ug ang atong mga kasingkasing mahimong mas andam sa pag-ambit sa sakramento matag adlaw sa Igpapahulay. Mas sayon ang pagtutok diha Kaniya kon maninguha kita sa pagpuyo sama sa Iyang pagpuyo.
2. Paninguhaa nga motambong sa miting.
Si Presidente Dallin H. Oaks, Unang Magtatambag sa Unang Kapangulohan, mitudlo nga “ang ordinansa sa sakramento naghimo sa miting sa sakramento nga ang labing sagrado ug mahinungdanon nga miting sa Simbahan.” 3 Ang atong mga paningkamot sa pagtambong niini nga miting makahimo og kalainan.
Si Elder Holland miingon: “Kita giawhag sa pag-abot og sayo sa atong mga serbisyo madominggo ug magpakita og balaang pagtahod, haom ang sininaan alang sa pag-apil sa sagrado nga ordinansa. Ang ‘pangsimba nga panamit’ nawad-an og gamay sa iyang kahulugan sa atong panahon, agig pakita og pagtah[o]d alang Kaniya kansang presensiya atong gianhi, kinahanglan natong ibalik kadtong tradisyon sa sininaan ug pamustura ma-Dominggo ug kon kanus-a ug asang dapita kita makahimo.”
Siya midugang, “Kabahin sa pag-ab[o]t sa husto nga oras, ang pagtugot nga maulahi kanunay nga mapinanggaong ihatag ngadto sa bulahang mga inahan kinsa, uban sa mga anak, mga makaon-kaon, ug bag nga dunay diaper ug ilisan nga paspas misulod nga nagkagidlay, swerte ganing nakaab[o]t pa gayod sa simbahan.” 4
Usahay ang pag-adto sa simbahan inig Dominggo mahimong lisod. Apan ang Langitnong Amahan nakakita sa inyong mga panlimbasog ug nakadungog sa inyong mga pag-ampo. Nakakita usab Siya sa inyong mga paningkamot, ug Siya mopanalangin kaninyo samtang kamo moadto sa simbahan ug moambit sa sakramento bisan og ang kinabuhi daw sama sa alimpulos o ang pag-adto sa simbahan malisod. Si Elder Randy D. Funk sa Seventy miingon, “Aron makadawat sa madagayaon nga mga panalangin nga ang [Langitnong Amahan] nagtanyag, kinahanglan gayod kitang molihok aron sa pagdawat niini.” 5 Ang Langitnong Amahan ug ang Ginoo ganahan og aksiyon; Ganahan Sila nga motan-aw kanato nga naningkamot sa atong pinakamaayo sa pagsunod ni Jesukristo.
3. Pamalandong sa mga panalangin gikan sa inyong semana—sa dihang nakakita kamo sa impluwensiya sa Ginoo sa inyong kinabuhi.
Si Elder Ronald A. Rasband sa Korum sa Napulog Duha ka Apostoles mitudlo: “Ang kamot sa Ginoo nagagiya kaninyo. Pinaagi sa ‘balaan nga plano,’ anaa Siya sa ginagmayng mga detalye sa inyong kinabuhi ingon man usab sa mahinungdanong mga panghitabo.” 6
Paggahin og panahon matag adlaw sa pag-ila kanus-a ang Langitnong Amahan ug si Jesukristo mitabang kaninyo sa paglambo o paglampos. Tingali nakahuman kamo og usa ka tumong. Tingali nakadawat kamo og maayong balita bahin sa temporal nga panalangin. Tingali nakabati mo og kalig-on sa paglahutay og kalisod. Bisan unsa pa ang nahitabo, paningkamot sa paghinumdom sa Dios sa tanang butang ug ilha ang balaang mga panalangin. 7
Nasayod ang Ginoo sa atong mga kasub-anan, ug nasayod usab Siya sa atong mga kalipay. Ang paghinumdom Kaniya sa tanang butang nakatabang kanato sa pagsalig Kaniya ug sa gahom sa Pag-ula. Sa wala pa ipahigayon ang sakramento, ang Manluluwas “nagpasalamat” (Lucas 22:19); makakita kita og hingpit nga kalipay samtang magsunod sa Iyang ehemplo.
4. Paghanduraw sa mga panahon atol sa semana sa dihang ang inyong mga plano wala matuman; maghinulsol ug maghimo og plano alang sa pag-uswag.
“Sa pagpangandam alang sa sakramento matag semana, ang mga miyembro sa Simbahan mogahin og panahon sa paghinuklog sa ilang kinabuhi ug maghinulsol sa mga sala. Sila dili kinahanglan nga perpekto aron makaambit sa sakramento, apan sila kinahanglan nga anaay espiritu sa pagkamapainubsanon ug paghinulsol diha sa ilang kasingkasing.” 8
Ang sakramento usa ka sinemana nga pahinumdom sa paghinulsol sa atong mga sala. Apan ang paghinulsol kinahanglan usab nga usa ka inadlaw nga proseso sa pagtabang kanato sa pagpangandam sa pagbag-o sa atong mga pakigsaad sa Igpapahulay. Paggahin og panahon matag adlaw sa pagpamalandong kon sa unsang paagi kamo nasayop ug dayon paghimo og plano uban sa Langitnong Amahan ug sa Manluluwas aron mamahimong maayo alang sa sunod nga adlaw ug sa mosunod nga semana. Kining kanunay nga proseso sa paghinulsol makatabang kaninyo nga mas madugangan ang pagpasalamat sa sakramento samtang bation ninyo kanunay ang makapalimpyo nga gahom nga gihalad nato pinaagi ni Jesukristo ug sa Iyang Pag-ula.
Samtang mangita kita aron molambo, makahinumdom kita unsay gitambag ni Elder Michael A. Dunn sa Seventy sa pagdapit kanato nga mahimong “mas maayo bisan og usa ka porsento” matag adlaw: “Ang ginagmay ba nga mga pagpahiangay mopahinabo nianang ‘dako nga kausaban’ [Alma 5:14] nga inyong gitinguha? Kon tukma nga ipatuman, 99 porsento akong segurado nga magsilbi kini! Apan ang usa ka pasidaan niini nga pamaagi mao nga aron mohugpong ang ginagmay nga mga pag-uswag, kinahanglan nga adunay makanunayon, inadlaw-adlaw nga paningkamot. Ug bisan lagmit dili kita mahimong hingpit, kinahanglang determinado kita nga tugbangan ang atong pagkamalahutayon sa pagpailob. Buhata kana, ug ang matam-is nga mga ganti sa giusbawan nga pagkamatarong maghatag kaninyo sa hingpit nga kalipay ug kalinaw nga inyong gitinguha.” 9
5. Hinumdumi nga ang paghinulsol usa ka malipayon nga proseso, dili magul-anon nga hitabo.
Si Presidente Russell M. Nelson mitudlo: “Walay laing mas makapagawasnon, mas makapahamili, o mas importante sa atong kaugalingong pag-uswag kay sa usa ka kanunay, matag-adlaw nga paghatag og gibug-aton sa paghinulsol. Ang paghinulsol dili usa ka panghitabo; usa kini ka proseso. Mao kini ang yawe ngadto sa kalipay ug kalinaw sa hunahuna. Kon inubanan sa hugot nga pagtuo, ang paghinulsol moabli sa atong agianan ngadto sa gahom sa Pag-ula ni Jesukristo.” 10
Ang Langitnong Amahan ug si Jesukristo nasayod nga dili kita perpekto ug nga kitang tanan makahimo og mga sayop. Ang Pag-ula ni Jesukristo naghatag kanato og kahigayonan sa pagbalik ngadto sa Ilang presensiya. Tungod niini, ang paghinulsol usa ka panalangin, ug ang sakramento nagtabang kanato niana nga proseso. Kita moambit sa sakramento matag semana aron kita mopasalig pag-usab ngadto sa Ginoo.
Si Presidente Nelson nagdapit kanato nga “[Himoon] ang [atong] Igpapahulay nga kahimot-an samtang [kita] nagsimba Kaniya, moambit sa sakramento, ug mobalaan sa Iyang adlaw.” 11 Samtang mosunod kita sa tambag sa mga propeta ug apostoles sa pagpasalamat sa Langitnong Amahan, kang Jesukristo ug sa Iyang Pag-ula, ug sa sakramento, ang Igpapahulay dili lamang ang atong mao ra nga kahimot-an—ang pagsunod sa Langitnong Amahan ug ni Jesukristo mohimo sa atong kinabuhi nga usa ka kahimot-an.