“Ania Kami alang Kanimo,” Liahona, Abr. 2022.
Mga Tingog sa mga Santos sa Ulahing mga Adlaw
Ania Kami alang Kanimo
Kanunay akong mahinumdom sa panag-istoryahanay ug gugma nga nakatabang kanako sa akong malisod nga pagbiyahe pauli.
Bag-o lang ko nahuman sa pagpatambal sa kanser sa San Diego, California, USA, ug nagkinahanglan magdrayb pauli, sobra sa 600 (965 km) ka milya ang gilay-on. Gikapoy ko ug nag-inusara, ug nag-ampo ko alang sa panabang ug giya.
Nakahimo na ko og sobra sa 50 ka sinemana nga pagbiyahe ngadto sa San Diego alang sa pagpatambal didto sa cancer center, apan kini nga biyahe mas lisod tungod sa COVID-19 nga pandemya. Ang mga restriksiyon sa pandemya nakapugong sa akong asawa sa pagbiyahe uban nako, ug dili ko makabiyahe sakay sa eroplano tungod kay ang akong mga doktor nabalaka nga matakdan ko sa virus. Kon masakit ko, basin og dili ko makasugakod. Ang pagdrayb nga mag-inusara mao lamang ang opsiyon.
Ang akong asawa ug akong inahan nanawag. Silang duha nabalaka para nako. Taas gayod kadto nga kagabhion.
Sa dihang ang akong tigpangalagad nga brother, si Brother Brough, nahibalo nga tua ko sa San Diego ug mouliay na nga magdrayb, nabalaka usab siya. Nanawag siya aron sa pagsusi kanako ug dayon miorganisar og phone brigade. Nanghangyo siya og daghang miyembro sa among korum sa mga elder nga magpulipuli sa pagtawag ug pakig-istorya kanako sulod sa usa ka oras. Ang ilang mga tawag maoy akong kauban, makapamata, ug makapaalerto.
Panahon sa akong 10 ka oras nga pagdrayb, nalingaw ko sa panag-uban niining mga brother samtang nakig-istorya sila nako. Inig ka human sa matag usa ka oras nga tawag, mag-babay na mi. Dayon ang akong telepono mobagting na usab, ug malipayon akong mobutang sa bag-ong nanawag sa speaker phone sa akong sakyanan.
Sa akong pagpasalamat sa matag nanawag, kasagaran silang moingon, “Nalipay ko nga makatabang. Ania kami alang kanimo, Brother.”
Nahinumdom sa kamabination niining maayong mga brother kinsa migiya kanako sa ilang gabii sulod sa usa ka oras aron luwas ra ang akong pagpauli sa gihapon makapaluha kanako. Taas gayod kaayo kadto nga kagabhion, apan kanunay nakong hinumdoman ang among panagsultihanay ug ang gugma nga gipakita ngari kanako niini nga mga brother.
Kitang tanan anaa sa usa ka taas, usahay malisod nga panaw balik ngadto sa atong langitnong panimalay. Nagkinahanglan kita og maayo nga mga tawo nga moawhag kanato samtang nagpadayon.
Mapasalamaton ako sa daghang mga tawo nga nag-ampo alang sa akong pamilya ug kanako, nangalagad kanamo, ug nahigugma kanamo panahon sa akong taas nga pakigbugno sa cancer—ilabi na sa mga brother sa akong korum sa mga elder nga nangalagad, misuporta, ug migiya kanamo sa matag lakang (tan-awa sa Mateo 25:35–40).