Mga Tingog sa mga Santos sa Ulahing mga Adlaw

Ang Tubag didto sa Tanaman

Ni Ju Pil Sun, North Jeolla, Korea

Wala ako makaamgo niini sa sinugdanan, apan ang tubag sa akong pag-ampo anaa na gyod sa akong atobangan.

Litrato gihatag sa maayong kabubut-on sa tagsulat (naa sa tuo, uban ni Sister Lim naa sa wala)

Bag-ohay lang pipila ka misyonaryo sa JeonJu Korea Stake ug ako naghimo og tanaman sa bulak sa may entrada paingon sa akong apartment. Usa ka buntag sa wala pa ako moadto sa akong tanaman, nag-ampo ko sa Langitnong Amahan sa pagpanalangin kanako nga magamit ang tanaman aron makahimo og bag-o nga higala kinsa andam nga maminaw sa ebanghelyo. Nianang adlawa samtang nagtrabaho ko sa tanaman, usa ka babaye miduol.

“Nangita ko sa simbahan nga anaa duol sa supermarket,” miingon siya. “Nasayod ka ba kon asa ko kini makita?”

“Wala ko mahibalo ana nga simbahan,” mitubag ko.

Milakaw siya apan mibalik human sa 30 minutos.

“Nakadungog ko nga adunay simbahan dinhi,” miingon siya. “Mibalhin ko sa akong apartment pipila pa lang ka adlaw ang milabay, ug nangita ko og simbahan nga makatambong ko.”

Nianang higayona, may misantop sa akong hunahuna. Siya ang tubag sa akong pag-ampo. Akong nahibaloan nga mibalhin diay siya sa samang andana sa samang apartment sa gambalay diin ang akong bana ug ako nagpuyo.

Pagkasunod adlaw nagkita mi sa dako nga lugar luyo sa tanaman. Sulod sa sobra sa tulo ka oras, si Lim Bo Nam ug ako naghisgot sa mga detalye sa among kinabuhi. Nagbuhat sa kusog nga pagbati, mipakigbahin ko sa akong mga gituohan isip usa ka miyembro sa Ang Simbahan ni Jesukristo sa mga Santos sa Ulahing mga Adlaw. Miistorya usab ko niya mahitungod sa mga panagtigom alang sa sakramento nga among gibuhat sa among panimalay atol sa COVID-19 nga pandemya. Dayon gidapit nako siya sa among panimalay sa pag-apil kanamo. Sa akong katingala, misaad siya nga moadto.

Among gitudloan si Sister Lim mahitungod sa paghinulsol ug sa kahulogan sa mga simbolo sa sakramento. Mipakigbahin usab kami og may kalabotan nga mga bersikulo sa Biblia mahitungod sa kamahinungdanon nga kita “matawo pinaagi sa tubig ug sa Espiritu” (Juan 3:5). Ang Espiritu mitandog kaniya.

Si Sister Lim mipahayag og pasalamat nga makakat-on mahitungod sa tinuod nga ebanghelyo ni Jesukristo. Human madawat ang mga panaghisgotan gikan sa full-time nga mga misyonaryo, nabunyagan siya pagka-Agosto 1, 2020.

Atol sa iyang unang miting alang sa puasa ug pagpamatuod isip usa ka miyembro sa Simbahan, siya mipamatuod nga nag-ampo siya aron makahimo og mga higala sa iyang bag-o nga lugar. Nianang adlaw nga nagkita mi, nag-ampo usab siya kon asa nga simbahan ang tambongan.

Mapasalamaton ko nga gitubag sa Ginoo ang pag-ampo namong duha ug mipanalangin kanako og kahigayonan sa pagpakighigala ug nakapaambit sa ebanghelyo uban kaniya.