Digital Lamang: Mga Young Adult
Paggamit sa 5 ka Sugyot ni Presidente Nelson aron sa Pagpalambo sa Inyong Hugot nga Pagtuo
Kon gibati ninyo nga ang inyong hugot nga pagtuo nagduhaduha, sunda kining lima ka sugyot gikan sa propeta.
Kitang tanan nag-atubang og mga pagsulay ug mga kaugtas nga nagsulay sa atong hugot nga pagtuo matag adlaw. Usahay kini nga mga hagit daw sobra ra ka lisod nga antoson. Apan tugoti ako nga mopasalig kaninyo pag-usab nga matag usa kanato makahimo, gani, makaangkon og hugot nga pagtuo.
Si Presidente Russell M. Nelson bag-ohay lang miawhag kanato sa pag-ila ug “ayaw paus-osi ang hugot nga pagtuo nga anaa na [kanato].” 1 Miingon siya:
“Ang pag-ugmad og hugot nga pagtuo ingon og malisod. Dunay mga panahon nga kita maghunahuna kon makalikom ba kaha kita og igong hugot nga pagtuo aron makadawat sa mga panalangin nga ato kaayong gikinahanglan. …
“Ang Ginoo mosabot sa atong mortal nga kahuyang. Kitang tanan usahay masayop. Apan nahibalo usab Siya sa atong talagsaon nga potensyal. …
“Ang Ginoo wala magkinahanglan og hingpit nga hugot nga pagtuo aron kita makagamit sa Iyang hingpit nga gahom. Apan mihangyo Siya kanato nga motuo.” 2
Uban niini nga kamatuoran sa hunahuna, ikonsiderar kining lima ka rekomendasyon gikan ni Presidente Nelson kon unsaon nato sa pagpalambo sa atong hugot nga pagtuo diha kang Jesukristo bisag ginagmay matag adlaw.
1. “Magtuon.”
Isip mga young adult, nagdumala kita og mga kinabuhi nga daghang buluhaton. Apan ang kinabuhi kanunay gayod nga daghan og buluhaton, ug makagahin pa gihapon kita og panahon alang sa Ginoo ug magtuon sa Iyang ebanghelyo. Si Presidente Nelson nagtudlo, “Kon magkat-on kamo og mas daghan mahitungod sa Manluluwas, mas sayon ang pagsalig sa Iyang kalooy, sa Iyang walay kinutoban nga gugma, ug sa Iyang makalig-on, makaayo, makatubos nga gahom.” 3
Ang pagtuon sa mga kasulatan wala ra gayod nagpasabot og pagbasa niini sulod sa pila ka oras. Ang pagtuon mahimong 20, 10, o bisan 5 ka minuto nga magtuon og piho nga hilisgotan. Dili igsapayan unsa ka kadugay kita nga magtuon, kon andam kitang modawat sa mga mensahe sa mga kasulatan matag adlaw, ang atong hugot nga pagtuo kang Jesukristo molambo.
Ang mga kasulatan puno sa tinuod nga mga tawo kinsa adunay igo nga hugot nga pagtuo kang Jesukristo nga makabalhin og mga bukid o makasinati og ubang milagro. Ang pagpaapil sa inyong kaugalingon niadtong mga istorya makatabang kaninyo sa pagsabot og maayo sa kamahinungdanon sa hugot nga pagtuo, kon unsay hitsura sa hugot nga pagtuo, ug kon unsaon ninyo pagsugod sa paghimo sa inyong hugot nga pagtuo nga dili matarog.
Ang pagtuon sa misyon ni Kristo, pagpangalagad, ug doktrina diha sa mga kasulatan makatabang kaninyo sa pagsabot sa gahom nga dala sa hugot nga pagtuo diha Kaniya sa inyong kinabuhi ug sa unsang paagi ang Pag-ula may kalabotan diha kaninyo. 4
2. “Pilia ang motuo kang Jesukristo.”
Ok ra nga adunay mga pangutana. Hinumdomi nga ang Simbahan napahiuli tungod kay ang usa ka batang lalaki adunay mga pangutana ug nangutana sa Langitnong Amahan aron makat-on sa kamatuoran.
Kon kita adunay mga pangutana o nakulangan og kaalam (tan-awa sa Santiago 1:5–6), siksika ang mga kasulatan, pangitaa ang katuohan nga mga kapanguhaan, ug pangutan-a ang Langitnong Amahan diha sa pag-ampo mahitungod niadto nga mga pangutana. Gusto Niya nga pangitaon nato ug mahibalo sa kamatuoran ug dili mopahisalaag kanato.
Bisan niadto nga mga pangutana o mga pagduhaduha nga anaa kanato, si Presidente Nelson naghangyo kanato sa gihapon “pilia nga motuo ug pagpabiling matinud-anon. Ipaabot ang inyong mga pangutana ngadto sa Ginoo ug sa ubang katuohan nga mga kapanguhaan. Magtuon dala ang tinguha nga motuo kay sa maglaom nga inyong makit-an ang sipyat sa kinabuhi sa propeta o sayop sa mga kasulatan.” 5
Makahunahuna tingali kita, “Apan unsaon nako pagpabilin nga matinud-anon kon ako adunay mga pangutana o mga pagduhaduha nga wala koy makit-an nga mga tubag?”
Una, makapadayon kita sa pagpangita alang sa kamatuoran uban ang tinguha nga motuo kay sa mangita uban ang paglaom nga makakita og mga bakak o mga sayop. Ug ikaduha, mahimo kitang mosunod sa tambag ni Presidente Nelson nga “[hunongon] ang pagdugang sa inyong pagduhaduha pinaagi sa paghisgot niini ngadto sa ubang mga maduhaduhaon. Tugoti ang Ginoo nga mogiya kaninyo sa inyong panaw sa espirituhanong panimpalad.” 6
Samtang ato kining buhaton, ang Espiritu Santo mopamatuod ngari kanato sa saad nga kita “mahimo nga masayod sa kamatuoran sa tanan nga mga butang” (Moroni 10:5).
3. “Lihok gamit ang hugot nga pagtuo.”
Atong nakat-onan gikan sa mga kasulatan nga wala ang hugot nga pagtuo kon walay buhat (tan-awa sa Hubad ni Joseph Smith, Santiago 2:17).
Miingon si Presidente Nelson: “Unsay inyong buhaton kon kamo adunay dugang nga hugot nga pagtuo? Hunahunaa kini. Isulat kini. Dayon dawata ang dugang pa nga hugot nga pagtuo pinaagi sa paghimo og butang nga nagkinahanglan og dugang nga hugot nga pagtuo.” 7
Ang paglihok nga may hugot nga pagtuo dili kinahanglan nga komplikado. Ang yanong pagkuha sa inyong mga kasulatan matag adlaw, pagsalig nga makakaplag kamo og giya, pag-ampo nga may pagtuo nga ang Langitnong Amahan mogiya kaninyo; ug pagpili sa pagsunod sa mga sugo matag adlaw bisan pa sa mga tintasyon sa kalibotan tanan kini mga buhat sa hugot nga pagtuo. Ug kon magsige ta og buhat niining ginagmay nga mga aksiyon nga puno sa hugot nga pagtuo, magkadako ang atong madawat nga dugang nga hugot nga pagtuo.
4. “Moambit sa sagradong mga ordinansa sa takos nga paagi.”
Ang inyong pasalig sa pag-ambit sa sagrado nga mga ordinansa sa takos nga paagi, lakip ang senemana nga sakramento, ingon sa gitudlo ni Presidente Nelson, “moabli sa gahom sa Dios alang sa inyong kinabuhi.” 8
Si Elder Taniela B. Wakolo sa Seventy miingon, “Ang pag-apil sa mga ordinansa ug pagtahod sa kaubang mga pakigsaad magdala kaninyo og talagsaong kahayag ug proteksiyon niining padayong nagkangitngit nga kalibotan.” 9
Ang Langitnong Amahan gusto sa matag usa kanato nga moani sa mga panalangin sa pag-apil sa mga ordinansa sa templo. Kon gusto kamo moapil niining mga ordinansa apan dili sigurado asa mosugod, ayaw kahadlok sa pagpangayo og tabang sa inyong bishop aron mahibalo kon unsaon sa pag-andam ug mahimong takos niini nga mga ordinansa.
5. “Pangayo sa inyong Langitnong Amahan og tabang, sa ngalan ni Jesukristo.”
Si Presidente Nelson miingon: “Ang hugot nga pagtuo nagkinahanglan og buhat. Ang pagdawat og pagpadayag nagkinahanglan og buhat. Apan ‘ang tanan nga magapangayo magadawat; ug ang magapangita makakaplag; ug ang magatuktok pagaablihan’ [Mateo 7:8]. Ang Dios nahibalo unsay makatabang aron motubo ang inyong hugot nga pagtuo. Mangayo, ug dayon mangayo na usab.” 10
Sama sa gipamatuod ni Presidente Nelson, ang Langitnong Amahan ug si Jesukristo anaa aron pagtabang kanato. Nahigugma Sila kanato. Makahimo kitang mag-ampo kanunay sa atong Langitnong Amahan alang sa tabang aron masayod kon unsaon pagpalambo sa atong hugot nga pagtuo. Ug samtang ang atong hugot nga pagtuo kang Jesukristo naglambo, ang atong hugot nga pagtuo makabalhin sa mga bukid sa kasub-anan sa atong kinabuhi ug “makatabang kaninyo sa pagbalhin sa inyong mga hagit ngadto sa dili hitopngan nga kalamboan ug oportunidad.” 11
Mao nga kon mobati kamo nga ang inyong hugot nga pagtuo mura og nagkaluya, sunda kining gamhanang mga lakang aron sa pagsugod sa pagpalambo sa inyong hugot nga pagtuo ngadto kang Jesukristo ug sa Iyang ebanghelyo imbis tugotan kini nga mokunhod. Samtang inyo kining buhaton, ang Ginoo “mohimo sa mahuyang nga mga butang nga mahimo nga malig-on” (Ether 12:27), ug inyong makit-an nga ang inyong hugot nga pagtuo tinuod gyod nga mahimong lig-on igo nga makabalhin sa inyong espiritwal nga mga babag.