Alang sa mga Ginikanan

Si Jesukristo Mao ang Atong Manluluwas

Minahal nga mga Ginikanan,

Ang isyu karong bulana makatabang ninyo nga makatudlo sa inyong mga anak kabahin ni Jesukristo isip ilang personal nga Manluluwas ug sa kahulogan sa Iyang Pag-ula, sama sa gitudlo sa atong mga propeta sa Daang Tugon. Mahimo usab ninyong gamiton ang mga ideya dinhi aron makatabang ninyo nga makasugod og mga panaghisgotan kabahin sa Napulo ka Sugo ug ang kamahinungdanon sa pagsunod sa mga gipili nga mga sulugoon sa Ginoo.

Mga Panaghisgotan sa Ebanghelyo

Mga Pagtulon-an sa Daang Tugon kabahin sa Pag-ula ni Kristo

Basaha ang kabahin kon giunsa sa Daang Tugon pagpunting ngadto sa Pag-ula ni Kristo sa pahina 40. Paghimo og lista sa mga sanglitanan nga gihatag kabahin sa Pag-ula sa Manluluwas diha sa Daang Tugon.

Ang mga propeta, lakip na kadtong anaa sa Daang Tugon, nagpamatuod ni Jesukristo ug sa Iyang Pag-ula. Hisgoti kauban sa inyong pamilya kon sa unsang paagi nga ang tahas sa mga propeta nagpabilin nga mao ra gihapon karon. Sa unsang paagi nga ang propeta sa bag-ohay lang mipamatuod ni Kristo?

Pagtuman sa mga Lider sa Simbahan

Basaha ang artikulo ni Elder Duncan diha sa pahina 44 kabahin sa pagpaminaw ug pagtuman sa mga lider sa Simbahan. Hisgoti uban sa inyong pamilya ngano nga importante nga kita mosunod sa tambag nga gihatag kanato gikan sa atong mga lider. Tingali dapiton ang inyong pamilya sa pagdula sa dula nga “Simon Says” aron sa paglarawan niini nga baroganan.

Suporta sa Dali, Sunod Kanako

Tan-awa sa pahina 48 alang sa usa ka pagtandi tali sa mga simbolo sa unang Pagsaylo ug sa Pag-ula ni Jesukristo aron sa pagsuporta sa sinemana nga pagtuon sa Dali, Sunod Kanako sa inyong pamilya.

Kalingawan sa Pamilya sa Dali, Sunod Kanako

Pagpabiling Magbarog ug Magbaton og Hugot nga Pagtuo

Exodo 14–17

Uban sa tabang sa Ginoo, gigiyahan ni Moises ang mga anak ni Israel paggawas sa Ehipto. Sila nahadlok tungod kay natanggong sila sa Pulang Dagat ug gigukod sila sa mga sundalo sa Paraon. “Ug si Moises miingon sa katawhan, Ayaw kamo kahadlok! Pabilin sa inyong nahimutangan ug tan-awa ang buhaton sa Ginoo niining adlawa aron pagluwas kaninyo ” (Exodo 14:13).

1. Pagpakita og larawan sa pagbahin sa Pulang Dagat. Basaha og dungan ang Exodo 14:21–29. Timan-i ang mga aksiyon niana nga mga bersikulo.

2. I-drama-drama ang pagkabahin sa Pulang Dagat, gamit ang mga aksiyon sa ibabaw. I-drama drama hangtod nga ang tanan adunay kahigayonan nga makahimo sa mga parte nga ilang ganahan.

Panaghisgotan: Giunsa sa mga anak ni Israel pagpakita og hugot nga pagtuo pinaagi sa paghimo kon unsay gisugo sa Ginoo? Unsaon nato sa pagpakita sa atong hugot nga pagtuo kon makasinati kita og mga hagit sa atong kinabuhi?

Gisumiter ni Lisa Thomas

Paggamit sa Napulo ka Sugo diha sa atong Kinabuhi

Exodo 20

Basaha ang Napulo ka Sugo (Exodo 20:3–17). Ang Dios mihatag niini nga mga balaod ngadto sa mga Israelita aron matabangan sila nga molambo sa espirituhanong paagi ug magpuyo og mas maayong kinabuhi. Ang mga sugo makita usab diha sa Basahon ni Mormon (tan-awa sa Mosiah 13:11–24) ug diha sa Doktrina ug mga Pakigsaad (tan-awa sa 42:18–29; 59). Sa unsang paagi nga ang mga sugo makatabang kanato karon?

1. Ilista ang matag usa sa Napulo ka Sugo diha sa magkalahi nga mga piraso sa papel.

2. Palingkora ang pamilya nga nagporma og sirkulo ug ipahimutang ang mga sugo diha sa tunga.

3. Pabasaha ang matag tawo og usa ka sugo ug isulti kon giunsa niini nga mahiangay sa usa sa mosunod nga mga grupo:

   • Ang mga sugo 1–4 nagtudlo kanato kabahin sa paghigugma sa Dios.

   • Ang mga sugo 5–10 nagtudlo kanato kabahin sa atong mga relasyon ug mga inter-aksiyon sa uban.

4. Daghan diha sa mga sugo ang nagsulti kanato unsa ang mga dili buhaton. Pahunahunaa ang matag sakop sa pamilya og usa ka positibo nga aksiyon alang sa matag sugo.

Panaghisgotan: Paghunahuna og mga paagi nga ang Napulo ka Sugo nakaimpluwensiya sa inyong kinabuhi ug sa kultura nga inyong gisunod. Unsay atong mabuhat aron mahinumdoman ang mga sugo ug makasunod niini?

Gikan sa Alang sa Kalig-on sa mga Kabatan-onan nga Magasin 

“Si Jesukristo Mao ang Imong Manluluwas”

Basaha ang usa ka mensahe gikan ni Presidente Russell M. Nelson kabahin sa walay kataposan nga Pag-ula sa Manluluwas ug sa unsang paagi nga kini magamit sa matag usa kanato sa personal nga paagi.

Ang Dios Moluwas Kanato

Gikan sa sanglitanan sa karaang mga Israelita, pagkat-on og pito ka paagi nga ang Ginoo moluwas kanato gikan sa atong mga hagit.

Magkauban sa Pagkat-on ug Paglambo

Basaha ang mga kasinatian sa pipila ka kabatan-onan uban sa ilang mga igsoon nga adunay mga kakulangan ug giunsa nila pagtabang ang matag usa ug magkauban nga nagkat-on og mahinungdanon nga mga leksiyon sa kinabuhi.

Gikan sa Higala nga Magasin

Pag-ihap paingon sa Dominggo sa Pagkabanhaw

Matag adlaw sa semana sa wala pa ang Dominggo sa Pagkabanhaw, pagbasa og kasulatan ug kolori diha sa katugbang nga luna. Pangita usab og uban pa nga istorya kabahin sa Dominggo sa Pagkabanhaw diha sa tibuok magasin!

Adunay usa ka tawo ang Nahigugma Gihapon Kanimo

Basaha kon unsa ang gisulti ni Sister Susan H. Porter, Unang Magtatambag sa Kinatibuk-ang Kapangulohan sa Primary, ngadto sa mga bata.

Pagtuon sa Kasulatan

Pagbasa og usa ka gihulagway nga istorya kabahin ni Moises ug sa mga anak ni Israel ug sa manna nga gipadala sa Dios kanila aron kaonon.

Hello gikan sa Canada!

Himamata ang usa ka higala gikan sa Canada kinsa mitabang sa uban, sama sa gihimo ni Jesus. Dayon mobiyahe uban ni Margo ug Paolo aron magkat-on pa og dugang mahitungod sa Canada.

Ang Parte ni Capri sa Programa

Bisan kon si Capri dili makasulti, aduna gihapon siyay mahinungdanon nga parte nga himoon diha sa pasundayag sa miting sa sakramento sa Primary.