Digital Lamang: Dali, Sunod Kanako
Mga Leksiyon sa Pagpangulo gikan ni Moises
Ang mga tagsulat nagpuyo sa Utah, USA.
Upat ka kasinatian gikan sa kinabuhi ni Moises ang makatabang kanato nga moserbisyo nga mas masaligon diha sa atong mga calling.
Ang tanang calling sa Simbahan naglakip og mga responsibilidad sa pagpangulo ug daghan usab ang nagkinahanglan og buluhaton sa pagdumala. Apan dili tanan nato ang adunay kasinatian sa pagpangulo ug pagdumala sa dihang kita gitawag. Unsaon nato sa pagkat-on nga mahimong epektibo diha sa pagpangalagad ug pagdumala?
Isip dugang sa pagtuon sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw , kita makatuon kon giunsa sa nag-unang mga propeta sama ni Moises sa pagdumala ang ilang mga responsibilidad sa pagpangulo. Ania ang upat ka baroganan nga atong makat-onan gikan ni Moises.
1. Si Moises miserbisyo bisan pa og gibati niya nga dili pa andam.
Si Moises kinahanglang dali nga mobiya sa Ehipto human niya gipugngan ang pagkulata sa usa ka ulipon nga Israelita ug napatay ang Ehiptohanon nga kapatas diha sa proseso (tan-awa sa Exodo 2:11–12, 15), ug, kutob ra sa atong nahibaloan, siya hilom nga nagpuyo isip magbalantay sa karnero ubos sa panudlo ni Jetro, ang tawo kinsa nahimo niya nga ugangan (tan-awa sa Exodo 2:21; 3:1).
Dayon usa ka adlaw ang Ginoo mipakita kang Moises (tan-awa sa Hubad ni Joseph Smith, Exodo 3:2) ug mitawag kaniya aron “pagluwas [sa katawhan] gikan sa mga Ehiptohanon, ug pagdala kanila ngadto sa usa ka maayo ug dakong yuta” (Exodo 3:8).
Bisan kon si Moises mipanalipod sa usa ka Israelita kinsa gikulata sa usa Ehiptohanon nga kapatas, wala ikonsiderar ni Moises ang iyang kaugalingon isip usa ka tawo kinsa moluwas sa tanang Israelita. Siya, kon tan-awon, usa ka kinabig lamang ngadto sa pagtuo taliwala niadtong kinsa nakat-on ug nagpuyo niini sa tibuok nilang kinabuhi.
Si Moises gani nangutana sa Ginoo, “Kinsa ba ako, aron ako moadto kang Faraon, ug magakuha gikan sa Ehipto sa mga anak sa Israel?” (Exodo 3:11). Ug sa dihang si Moises gihangyo sa paghatod sa mensahe ngadto sa mga katigulangan sa Israel (tan-awa sa Exodo 3:16), siya mitubag ngadto sa Ginoo, “Apan Ginoo, dili ako maayong mosulti sukad pa kaniadto. Yungit ako ug magkanga-kanga nga mosulti” (Exodo 4:10).
Apan ang Ginoo misaad sa pagtudlo kaniya unsay angay niya nga buhaton (tan-awa sa Exodo 4:12), busa si Moises milakaw uban sa hugot nga pagtuo (tan-awa sa Exodo 4:18, 20). Si Moises nagduhaduha tungod sa mga kahuyang nga iyang nakita sa iyang kaugalingon, apan iya lang gihapon nga gidawat ang mga pagdapit sa Ginoo.
Paggamit diha sa Atong Kinabuhi
Sama ni Moises, tingali wala nimo batia nga angayan ka sa pagdawat ug usa ka partikular nga calling. Tingali nasurprisa ka ug nagmapaubsanon sa dihang ikaw gitawag. Kadaghanan kanato gibati og ingon nianang paagi. Apan kon ang usa ka tawo gitawag sa pagserbisyo diha sa Simbahan, atong hinumdoman nga ang Ginoo mipili niini nga tawo alang niini nga calling niining panahona. Kana nga baroganan magamit sa matag calling.
Matag usa kanato adunay kapasidad nga labaw sa unsay klaro sa unang tan-aw. Kitang tanan usab adunay potensyal nga dili hingpit nga matuman niining kinabuhia. Apan kita makasalig nga ang Ginoo nagkinahanglan kanato sa pagserbisyo diha sa partikular nga mga calling sa piho nga mga panahon aron makatabang sa atong kaugalingon ug sa uban nga molambo. Ug sama ni Moises, kita makasalig sa saad sa Ginoo: “Sa pagkamatuod ako magauban kanimo” (Exodo 3:12).
Si Elder Neal A. Maxwell (1926–2004) sa Korum sa Napulog Duha ka Apostoles naghatag og maayo nga tambag kabahin sa pagdawat og mga calling bisan kon wala nato batia nga kita andam: “Ang Dios wala magsugod pinaagi sa pagpangutana kanato kabahin sa atong abilidad, apan kabahin lang sa atong pagkaanaa, ug kon atong mapamatud-an ang atong pagkamasaligan, iyang padak-an ang atong kapabilidad!” 1
Si Presidente Thomas S. Monson (1927–2018) mipahinumdom usab kanato: “Kon kita anaa sa buluhaton sa Ginoo, may katungod kita sa panabang sa Ginoo. Hinumdomi nga kon si kinsa ang tawagon sa Ginoo, ang Ginoo mohimo kaniyang sarang.” 2
Si Elder David A. Bednar sa Korum sa Napulog Duha ka Apostoles misulti kabahin sa paghatag sa iyang pagsalig sa Ginoo sa dihang gitawag siya isip Apostol: “Para kanako mas nasy[o]d ko kay ni bisan kinsa nga sa sulod sa Ang Simbahan ni Jesukristo sa mga Santos sa Ulahing mga Adlaw adunay gat[o]san ug liboan ka mga lalaki nga mas kwalipikado, mas sarang pa kay kanako, … pero ako nasay[o]d gay[o]d kon diin ang mao nga tawag nagagikan. Ug mao nga madungganon akong motubag. Nagpaabot akong moalagad, ug ako matinguhaon alang sa kahigay[o]nan nga makat-on.” 3 Kita makapakita og sama nga pagsalig samtang kita magtinguha sa pagkat-on ug pagserbisyo kon ang atong mga calling mora og mas dako pa kay sa atong mga abilidad sa pagbuhat.
Si Moises gisultihan nga siya adunay buhat nga himoon (tan-awa sa Moises 1:6). Si Joseph Smith gisultihan nga ang Dios adunay ipabuhat kaniya (tan-awa sa Joseph Smith—Kasaysayan 1:33). Sama nga butang ang pwedeng ikasulti kabahin sa matag usa kanato. Kini tinuod sa atong mga calling, ug tinuod usab kini sa ubang paagi nga ang Ginoo midasig kanato sa pagserbisyo samtang kita maningkamot nga mahimong “[mag]matinguhaon nga moapil diha sa usa ka maayo nga katuyoan, ug mobuhat og daghan nga mga butang diha sa [atong] kaugalingon nga gawasnon nga kabubut-on, ug magpahinabo sa daghan nga pagkamatar[o]ng” (Doktrina ug mga Pakigsaad 58:27). Mahimo kitang moserbisyo isip patron sa templo o ordinance worker. Mahimo kitang moapil sa mga kalihokan sa JustServe.org ug uban nga angayan nga mga oportunidad sa pagserbisyo. Mahimo kitang usa ka matinabangon nga silingan. Ug, oo, mahimo kitang usa ka sensitibo ug makugihon nga tigpangalagad nga brother o sister niadtong mga miyembro diin kita gisangonan.
Dili tingali gayod kita mahutdan sa tanang posibli nga atong mabuhat kon kita anaa sa “buluhaton sa Ginoo” (Doktrina ug mga Pakigsaad 64:29).
2. Si Moises misalig sa Ginoo.
Ang Ginoo mipasalig ni Moises nga siya sa kataposan magmalamposon sa pagpalingkawas sa Israel, bisan pa kon adunay mga babag diha sa agianan. Human Niya gitawag si Moises ngadto sa buluhaton, gipakita sa Ginoo si Moises nga siya makahimo og mga milagro, sama sa paghimo sa sungkod ngadto sa usa ka bitin (tan-awa sa Exodo 4:2–4). Ang Ginoo mihatag og instruksiyon ni Moises kon sa unsang paagi nga siya ug ang iyang igsoong lalaki, si Aaron, mopahinabo sa nagkalain-laing bug-at nga silot (tan-awa sa Exodo 7–11), ug kadto nabuhat. Ang Ginoo misulti ni Moises nga pinaagi sa pagpahid og dugo sa karnero sa Pagsaylo diha sa duha ka haligi sa pultahan ug sa babag ibabaw sa pultahan, ang mga Israelita maluwas gikan sa kamatayon diha sa ilang mga panimalay (tan-awa sa Exodo 12:3–13, 21–23). Sa wala madugay, gisultihan sa Ginoo si Moises nga pinaagi sa pagpatan-aw lamang sa mga tawo ngadto sa bitin nga bronsi, sila mamaayo gikan sa makamatay nga mga pinaakan sa bitin (tan-awa sa Numeros 21:8–9; Alma 33:19–22).
Si Moises walay kaalam o gahom sa paghimo sa bisan unsa niadto nga mga butang pinaagi sa iyang kaugalingon nga mga abilidad. Apan siya hingpit nga misalig nga ang Ginoo mohimo sa gisaad nga resulta nga mosunod. Tungod kay si Moises mihimo sa unsay gitudlo sa Ginoo, ang Ginoo midala og daghang milagro ngadto sa Iyang katawhan (tan-awa sa 1 Nephi 17:23–42).
Paggamit diha sa Atong Kinabuhi
Kita usab makapakita sa atong pagsalig sa Ginoo samtang kita mopili sa paglihok uban sa hugot nga pagtuo. Si Presidente Henry B. Eyring, Ikaduha nga Magtatambag sa Unang Kapangulohan, nagtudlo kanato kon unsaon: “Kamo nagpakita sa inyong pagsalig Kaniya kon kamo maminaw uban sa tinguha sa pagkat-on ug paghinulsol ug dayon moadto ug mobuhat sa bisan unsay Iyang gihangyo.” 4
Sa dihang si Nephi gisugo sa paghimo og usa ka butang nga lisod, siya miingon, “Ako moadto ug mobuhat sa mga butang nga ang Ginoo nagsugo kanako, kay ako nasay[o]d nga ang Ginoo dili mohatag og mga sugo ngadto sa mga katawhan, gawas kon siya moandam og paagi alang kanila nga sila unta makatuman sa butang diin siya misugo kanila” (1 Nephi 3:7). Uban niana nga kinaiya, si Nephi mipadayon, “wala masay[o]d sa sinugdanan sa mga butang nga [siya] mobuhat” (1 Nephi 4:6). Siya milakaw og layo kutob sa iyang makita nianang higayona, misalig nga siya makakita pa og dugang samtang siya molakaw pa og mas layo. Ug dayon ang sunod nga lakang nahimong klaro ngadto kaniya, ug dayon ang sunod, hangtod nga iyang natuman ang iyang buluhaton.
Kita makasalig nga ang “tanan nga mga butang maghiusa sa paglihok alang sa [atong] kaayohan” (Doktrina ug mga Pakigsaad 90:24) kon kita mosunod sa Ginoo.
3. Si Moises nakat-on gikan sa Ginoo, ug dayon nagtudlo siya sa uban.
Diha sa Moises 1–4, kita nakat-on nga ang Ginoo mipakita kang Moises og usa ka panan-awon kabahin sa mga kalibotan nga dili maihap ug sa paglalang sa kalibotan. Kini mihan-ay sa pundasyon alang kang Moises aron masabtan ang plano sa Dios sa kaluwasan samtang siya nangandam sa paggiya sa katawhan. Sa wala madugay, si Moises gihatagan og lista sa mga sugo nga mopahimo sa mga Israelita nga magpuyo nga takos sa mga panalangin sa Dios (tan-awa sa Exodo 20:1–17). Gitudlo dayon ni Moises kini nga mga sugo ngadto sa iyang katawhan. Ang pagtudlo sa mga katawhan usa ka mahinungdanon nga parte sa iyang buluhaton.
Ug human makita kon sa unsang paagi nga ang katawhan kanunay nga moduol ni Moises aron siya mohukom sa mga butang nga sila nanginahanglan og tabang, si Jetro mitambag ni Moises: “Kinahanglan imo silang tudloan sa tanang mga balaod ug ipasabot kanila kon unsaon nila pagkinabuhi ug unsay angay nilang buhaton” (Exodo 18:20).
Paggamit diha sa Atong Kinabuhi
Ang Ginoo sa kanunay nag-awhag sa Iyang katawhan sa pagpangita og kaalam ug kamatuoran. Si Adan gisultihan sa gawasnon nga pagtudlo sa doktrina ngadto sa iyang mga anak (tan-awa sa Moises 6:58). Sa atong dispensasyon, kita gisugo sa Manluluwas nga “pangitaa ang pagtul[o]n-an, gani pinaagi sa pagtuon ug usab pinaagi sa hugot nga pagtuo” ug han-aya ang inyong mga kaugalingon,” sa pagtukod og “usa ka balay sa pagtul[o]n-an, … usa ka balay sa kahusay” (Doktrina ug mga Pakigsaad 88:118, 119; tan-awa usab sa Doktrina ug mga Pakigsaad 93:36).
Ug human kita makat-on, kita kinahanglan nga makugihon nga magtudlo sa uban (tan-awa sa Doktrina ug mga Pakigsaad 11:21). Kita gisugo sa pagtudlo sa usag usa sa doktrina ug mga baroganan sa ebanghelyo (tan-awa sa Doktrina ug mga Pakigsaad 42:12–14). Samtang kita magtudlo, kita kinahanglan nga maghatag og kaayohan sa usag usa sa “pagbuhat sa tanan nga pagkabalaan” diha sa atubangan sa Dios (Doktrina ug mga Pakigsaad 43:9; tan-awa usab sa mga bersikulo 7–8).
Adunay mahinungdanon usab nga baroganan diha sa Lucas 22:32 : “Ug inigbalik na nimo kanako, kinahanglan lig-onon mo ang imong kaigsoonan.” Kita mahimong magtinguha una sa pagpaduol sa Dios sa atong kaugalingon, ug dayon kita makatabang sa paglig-on sa uban pinaagi usab sa pulong sa Dios.
Kon kita anaa sa mga posisyon sa pagpangulo, imbes nga modirekta sa matag buhaton niadtong nagserbisyo kauban kanato, kita mahimong motutok sa pagtudlo sa doktrina ug mga baroganan ug pagdapit nila una sa “pagpakigtambag sa Ginoo” (Alma 37:37) ug dayon magkuyog isip usa ka grupo aron nga sila makalihok isip “mga tinugyanan ngadto sa ilang mga kaugalingon” (Doktrina ug mga Pakigsaad 58:28).
4. Si Moises nakat-on sa pagtugyan sa ubang buluhaton ngadto sa uban.
Si Jetro mihatag og maayo nga tambag ngadto ni Moises sa dihang si Moises nabug-atan sa iyang tahas isip maghuhukom sa katawhan: “Kay ang hulosayon mabug-at [ra] kaayo alang kanimo, dili ka arang makahimo sa pagbuhat niini nga ikaw lamang [usa ra]” (Exodo 18:18). Iyang gitambagan si Moises sa pagtudlo sa uban unsaon sa paghukom ug sa pagtukod usab og hirarkiya nga pang-administratibo diin si Moises mohukom lamang sa labing lisod nga mga butang ug ang uban mahimong moatiman sa ubang butang (tan-awa sa Exodo 18:14–26). Sa wala madugay, 70 ka ubang lalaki ang nahatagan og kahigayonan nga makakita sa Ginoo uban ni Moises ug mitabang sa espirituhanong mga butang (tan-awa sa Exodo 24:9–10; Numeros 11:16–17, 25).
Paggamit diha sa Atong Kinabuhi
Sa atong pagserbisyo, kita kinahanglan nga maningkamot sa pagtutok diha sa labing mahinungdanon nga mga responsibilidad. Kita mahimong makakat-on og daghan niini pinaagi sa pagtuon sa Kinatibuk-ang Tamdanan nga Basahon . Kita mahimong mangita ug molihok diha sa direksiyon gikan sa Langitnong Amahan aron mahibalo kon unsa ang angay nato nga buhaton ug unsa ang atong angay nga itugyan sa uban. Samtang gusto tingali nato ang pagbuhat sa tanang butang nga kita ra, kita mahimong mohinumdom sa sanglitanan sa bag-ohay lang nga mga kausaban sa organisasyon, nga gihimo aron sa pagtabang sa mga bishop nga motugyan sa ubang buluhaton ngadto sa uban ug motutok sa ilang labing taas nga mga prayoridad. Si Elder Quentin L. Cook sa Korum sa Napulog Duha ka Apostoles nagtudlo, “Sama sa inyong mahinumd[o]man, niadtong 2018 ang mga korum sa Melchizedek nga Pagkapari giusab aron mas makatrabaho og maayo uban sa mga Relief Society aron ang mga elders quorum ug mga Relief Society, ubos sa direks[i]yon sa bishop, motabang sa pag-abaga sa importanting mga responsibilidad nga kaniadto mokuha og daghan sa iyang panahon.” 5
Si Elder Dieter F. Uchtdorf sa Korum sa Napulog Duha ka Apostoles nagpahinumdom kanato nga dili palabihan og kakomplikado ang atong pagserbisyo:
“Isip mga lider kinahanglang higpit natong panalipdan ang Simbahan ug ang ebanghelyo sa kalunsay ug kayano niini ug likayan ang paghatag og wala kinahanglana nga palas-anon diha sa atong mga miyembro.
“Ug kitang tanan, isip mga miyembro sa Simbahan, kita kinahanglang mahunahunaong maningkamot sa paggahin sa atong kusog ug panahon sa mga butang nga tinud-anayng importante, samtang naglig-on sa atong isigkatawo ug nagtukod sa gingharian sa Dios.” 6
Adunay pipila ka leksiyon nga atong makat-onan gikan ni Moises ug usab gikan sa mga lider sa Simbahan sa modernong panahon kinsa nagsunod sa mga lakang sa Halangdon nga Lider, si Jesukristo. Samtang kita maghunahuna sa atong kaugalingon nga serbisyo diha sa Iyang gingharian, kita magtinguha sa paghinuktok kon unsaon nga kita makahimo og sama nga mga kapasidad sa pagpangulo diha sa atong mga kaugalingon ug sa uban.